ഏതാനും ദിവസങ്ങൾക്കു മുൻപ് വരെ ഇന്ത്യയിലെ ഏറ്റവും സമ്പന്നനായ ക്രിക്കറ്റ് താരം വിരാട് കോഹ്ലി ആയിരുന്നു. വലിയ ബ്രാൻഡ് വാല്യൂ ആയിരുന്നു കോഹ്ലിയെ ഈ രീതിയിൽ സമ്പന്നൻ ആകാൻ സഹായിച്ചത്. എന്നാൽ ഒറ്റരാത്രികൊണ്ട് കഥയെല്ലാം മാറിമറിഞ്ഞു. ഇപ്പോൾ ഇതാ വലിയ മുന്നേറ്റവുമായി കോഹ്ലിയെ പോലും കടത്തിവെട്ടിക്കൊണ്ട് ഇന്ത്യയിലെ ഏറ്റവും സമ്പന്നനായ ക്രിക്കറ്റ് താരമായി മാറിയിരിക്കുകയാണ് മുൻ ഇന്ത്യൻ ക്രിക്കറ്റ് ടീം അംഗമായിരുന്ന അജയ് ജഡേജ.
ഒറ്റ രാത്രിക്കുള്ളില്‍ ജഡേജയുടെ ആസ്തി 1450 കോടി രൂപയായാണ് മാറിയത്. ഇതോടെ ആയിരം കോടി ആസ്തിയുള്ള വിരാട് കോഹ്ലിയെ ബഹുദൂരം പിന്നിലാക്കി അജയ് ജഡേജ. അജയ് ജഡേജയെ ജാംനഗറിലെ പുതിയ രാജാവായി പ്രഖ്യാപിച്ചതിന് പിന്നാലെയാണ് സമ്പത്തിലെ ഈ വൻ വർദ്ധനവ് ഉണ്ടായത്. ഗുജറാത്തിലെ പ്രമുഖ നാട്ടുരാജ്യമായിരുന്ന നവ നഗർ ആണ് ഇപ്പോൾ ജാംനഗർ എന്ന പേരിൽ അറിയപ്പെടുന്നത്. ഈ രാജകുടുംബത്തിലെ അംഗമായ അജയ് ജഡേജ ആണ് ആചാരപ്രകാരം ഇവിടുത്തെ പുതിയ രാജാവ്.
ജാം നഗറിന്റെ നിലവിലെ മഹാരാജാവായ ശത്രുശല്യസിൻഹജി ദിഗ്വിജയ് സിൻഹജിയാണ് ദസറയുടെ പുണ്യ മുഹൂർത്തത്തിൽ ജാം നഗറിന്റെ പുതിയ ‘ജാം സാഹിബ്’ ആയി അജയ് ജഡേജയെ പ്രഖ്യാപിച്ചത്. അജയ് ജഡേജയുടെ പിതാവിന്റെ അർദ്ധസഹോദരനാണ് ശത്രുശല്യസിൻഹജി. ജാംനഗറിന്റെ കിരീടാവകാശിയായതോടെ ഒരൊറ്റ രാത്രി കൊണ്ട് ജഡേജയുടെ ആസ്തി 1450 കോടി രൂപയായി. ഇതോടെ ഇന്ത്യയിലെ ഏറ്റവും ധനികനായ കായിക താരമായി ജഡേജ മാറി. 1992 മുതൽ 2000 വരെയുള്ള കാലയളവിൽ ഇന്ത്യൻ ക്രിക്കറ്റ് ടീമിലെ പ്രധാന താരമായിരുന്നു അജയ് ജഡേജ. ഇന്ത്യൻ ടീമിന്റെ വൈസ് ക്യാപ്റ്റൻ ചുമതലയും അദ്ദേഹം നിർവഹിച്ചിട്ടുണ്ട്. ഐ.പി.എലിൽ വ്യത്യസ്ത ടീമുകളുടെ മെന്ററായും അഫ്ഗാനിസ്താൻ ക്രിക്കറ്റ് ടീമിന്റെ കോച്ചായും അജയ് ജഡേജ പ്രവർത്തിച്ചിട്ടുണ്ട്.
അജയ് ജഡേജയുടെ ഈ നേട്ടം മലയാളികളെ സംബന്ധിച്ചും സന്തോഷമുള്ള കാര്യമാണ്. പാതി മലയാളി കൂടിയാണ് അജയ് ജഡേജ. ആലപ്പുഴയിലെ മുഹമ്മ സ്വദേശിനിയാണ് അദ്ദേഹത്തിന്റെ മാതാവ് ഗ്യാൻബ ജഡേജ.
ജഡേജയുടെ പിതാവ് ദൗലത്‌സിൻജി ജഡേജ 3 തവണ ജാംനഗർ ലോക്‌സഭയിൽ നിന്നുള്ള പാർലമെൻ്റ് അംഗമായിരുന്നു. രാഷ്ട്രീയ നേതാവും സാമൂഹ്യപ്രവർത്തകയും ആയിരുന്ന ജയാ ജെയ്റ്റ്ലിയുടെ മകൾ അദിതി ജെയ്റ്റ്ലിയെ ആണ് അജയ് ജഡേജ വിവാഹം കഴിച്ചിരിക്കുന്നത്.
