അക്കൗണ്ട് ഉടമകളേ ബാങ്കുകാരുടെ ഉഡായിപ്പിന് നിന്ന് കൊടുക്കരുത്….എന്തിനാണ് ഇങ്ങനെ പൈസ പിടിക്കുന്നത്? കൊട്ടക്കണക്കിന് രൂപ പിഴ ചുമത്താമോ?

ഇന്നത്തെ കാലത്ത് ഒരു ബാങ്ക് അക്കൗണ്ട് എങ്കിലും ഇല്ലാത്തവർ വളരെ ചുരുക്കം ആയിരിക്കും. നമ്മുടെ ദൈനംദിന കാര്യങ്ങൾ നടന്ന് പോകാനും പണവിനിമയം എളുപ്പമാകാനും ഇന്ന് ബാങ്ക് അക്കൗണ്ടുകൾ കൂടിയേ തീരു. എന്നാൽ ഈ ബാങ്ക് അക്കൗണ്ടുകൾ ഇടയ്ക്ക് വല്ലാതെ പാര ആവാറുണ്ട് പല ഉപഭോക്താക്കൾക്കും. അക്കൗണ്ടിൽ മിനിമം ബാലൻസ് ഇല്ലെങ്കിൽ ബാങ്കുകൾ പിഴ ചുമത്താറുണ്ട്. എന്നാൽ ഒന്നറിഞ്ഞോളൂ. അക്കൗണ്ട് ഉടമകൾ അറിയാതെ പിഴ ചുമത്താൻ ബാങ്കിന് കഴിയില്ല. അത് മാത്രമല്ല അക്കൗണ്ട് ബാലൻസ് നെഗറ്റീവ് ആക്കാനും ബാങ്കുകൾക്ക് അധികാരമില്ല. അക്കൗണ്ടിലെ ബാലൻസ് ഏതാണ്ട് തീരാറാകുമ്പോൾ പിഴ ഈടാക്കിയാൽ, അക്കൗണ്ട് ബാലൻസ് നെഗറ്റീവ് ആകാനും സാധ്യതയുണ്ടല്ലോ. അങ്ങനെയെങ്കിൽ ആർബിഐ നിർദ്ദേശപ്രകാരം പിഴ ഈടാക്കേണ്ടത് എങ്ങനെയാമെന്ന് നോക്കിയാലോ

2014 നവംബർ 20 ന് ആർബിഐ പുറപ്പെടുവിച്ച സർക്കുലർ പ്രകാരമാണ് ബാങ്കുകൾ നിലവിൽ പ്രവർത്തിക്കേണ്ടത്. ഇത് പ്രകാരം ഉപഭോക്താവിന്റെ പ്രയാസങ്ങളും,അശ്രദ്ധയും ബാങ്കുകൾ അനാവശ്യമായി മുതലെടുക്കരുതെന്ന് വ്യക്തമാക്കുന്നുണ്ട്. ഉപഭോക്താക്കൾ മിനിമം ബാലൻസ് നിബന്ധന പാലിക്കുന്നില്ലെങ്കിൽ,ബാങ്കുകൾ ഇടപാടുകാരെ അറിയിക്കണമെന്ന് സർക്കുലറിൽ വ്യക്തമായി പറയുന്നുണ്ട്. സേവിംഗ്‌സ് അക്കൗണ്ടുകളിൽ മിനിമം ബാലൻസ് സൂക്ഷിക്കാത്തതിനുള്ള ചാർജുകളെ കുറിച്ചും ഉപഭോക്താക്കളെ അറിയിക്കണമെന്നും സോവിംഗ്‌സ് അക്കൗണ്ടിലെ ബാലൻസ് നെഗറ്റീവാകാൻ പാടില്ലെന്നും ആർബിഐ വ്യക്തമായി തന്നെ നിർദ്ദേശം നൽകിയിട്ടുണ്ട്.

ഒരു ഉപഭോക്താവ് മിനിമം ബാലൻസ് സൂക്ഷിക്കുന്നതിൽ വീഴ്ച വരുത്തിയാൽ ന്യായമായ കാലയളവിനുള്ളിൽ അത് പഴയ നിലയിലേക്ക് പുനഃസ്ഥാപിക്കാൻ അക്കൗണ്ട് ഉടമയ്ക്ക് അവസരം നൽകും. അനുവദിച്ച സമയം അതിക്രമിച്ചാൽ പിഴ തുക ഈടാക്കാം.

പിഴ തുക ഈടാക്കും മുൻപ്എ സ്എംഎസ് മുഖേനയോ ഇമെയിൽ, കത്ത് എന്നീ മാർഗങ്ങൾ വഴിയോ മിനിമം ബാലൻസ് സൂക്ഷിച്ചിട്ടില്ലെന്ന വിവരം അക്കൗണ്ട് ഉടമയെ ബാങ്കുകൾ അറിയിക്കണം. മിനിമം ബാലൻസ് അനുവദിച്ച കാലയളവിനുള്ളിൽ പുനഃസ്ഥാപിച്ചില്ലെങ്കിൽ പിഴ ചാർജുകൾ ഈടാക്കാവുന്നതാണ്. എത്ര രൂപ കുറവുണ്ട് എന്നതിനു ആനുപാതികമായിരിക്കണം പിഴത്തുക.