റേഡിയോ ജോക്കി അവതാരക അഭിനേത്രി ലൈഫ് കോച്ച് എന്നി നിലകളിൽ തിളങ്ങി നിൽക്കുന്ന താരമാണ് അശ്വതി ശ്രീകാന്ത് . സോഷ്യൽ മീഡിയയിൽ ആക്റ്റീവാണ് താരം . അശ്വതിയുടെ പല വീഡിയോകളും സോഷ്യൽ മീഡിയയിൽ വൻ വൈറലായിരുന്നു. ഇപ്പോഴിതാ ശിശു ദിനത്തിൽ താരം പങ്കിട്ട കുറിപ്പാണ് ശ്രദ്ധ നേടുന്നത്.
ഉള്ളിൽ നിറയെ സ്‌നേഹമുണ്ടായിട്ടും ഒരിറ്റ് പോലും പുറത്തു കാണിക്കാൻ അറിയാതെ വീർപ്പുമുട്ടുന്ന പല മനുഷ്യരുടെയും ഉള്ളിൽ അനുകമ്പയോ സ്‌നേഹമോ ചേർത്ത് പിടിക്കലുകളോ കിട്ടാത വളന്ന ഒരു കുട്ടിക്കാലം ഉണ്ടാവും. നമ്മളൊക്കെ ഇന്ന് എന്താണോ അതിലേറെ പങ്കും നമ്മുടെ കുട്ടിക്കാലം ആണെന്നാണ് അശ്വതി സൂചിപ്പിക്കുന്നത്.
കുറിപ്പിന്റെ പൂർണരൂപം
തന്നെ ഉപേക്ഷിച്ചു പോകുമോ എന്ന anxiety കൊണ്ട് പാർട്ണറിന്റെ പിന്നലെ കൂടി ശ്വാസം മുട്ടിക്കുന്നത്, പലപ്പോഴും ശരിക്കും ഉള്ള നമ്മളല്ല. അത് പണ്ടെന്നോ പേരെന്റ്‌സിൽ നിന്നോ കൂട്ടുകാരിൽ നിന്നോ abandonment, rejectio ഒക്കെ നേരിട്ടിട്ടുള്ള നമ്മുടെ ഉള്ളിലെ കുട്ടി ആണ്.
ആരോടും നോ പറയാൻ പറ്റാത്ത ആ ‘പീപ്പിൾ പ്ലീസർ’ പോത്തുപോലെ വളർന്ന ഈ നമ്മൾ അല്ല. മറിച്ച് ഗുഡ് ഗേൾ അല്ലെങ്കിൽ ഗുഡ് ബോയ് ആയാൽ മാത്രം അംഗീകാരം കിട്ടിയിരുന്ന, മാറ്റി നിർത്തലുകളെ ഭയക്കുന്ന നമ്മുടെ ഉള്ളിലെ കുട്ടിയാണ്.
ആരെങ്കിലും ഒച്ച ഉയർത്തിയാൽ പാനിക് ആവുന്ന, അവിടെ നിന്ന് ഓടിയോളിക്കാൻ തോന്നുന്ന നമ്മൾ ശരിക്കും നമ്മൾ ആണോ? അച്ഛനും അമ്മയും തമ്മിൽ വലിയ വഴക്കുകൾ നടക്കുമ്പോൾ ഭയന്ന് കട്ടിൽ കോണിൽ ഒളിച്ചിരുന്ന പഴയ കുട്ടിയാവും നമ്മൾ അപ്പോൾ.
ഉള്ളിൽ നിറയെ സ്‌നേഹമുണ്ടായിട്ടും ഒരിറ്റ് പോലും പുറത്തു കാണിക്കാൻ അറിയാതെ വീർപ്പുമുട്ടുന്ന പല മനുഷ്യരുടെയും ഉള്ളിൽ അനുകമ്പയോ സ്‌നേഹമോ ചേർത്ത് പിടിക്കലുകളോ കിട്ടാതെ വളർന്ന ഒരു കുട്ടിയുണ്ടാവും.
ക്രിട്ടിസിസം കേട്ടാൽ കലി തുള്ളുന്ന കൂട്ടുകാരില്ലേ നമുക്ക്? ‘Good enough’ അല്ലെന്ന് – മറ്റവനെ കണ്ടു പഠിക്കു എന്ന് നിരന്തരം കേട്ടു മടുത്തൊരു കുട്ടിയാണ് ആ കലി കൊള്ളുന്നതെന്ന് നമുക്ക് ഒട്ടും മനസ്സിലാവണമെന്നില്ല.
എല്ലാം ഇത് മാത്രമാണെന്നല്ല, പക്ഷേ നമ്മളൊക്കെ എന്താണോ അതിലേറിയ പങ്കും നമ്മുടെ കുട്ടിക്കാലമാണ്. ഭൂതകാലത്തിൽ മുറിവേറ്റ ഒരു കുട്ടിയെയും ചുമന്നാണ് നമ്മളൊക്കെയും ഈ വലിയ ശരീരത്തിൽ ജീവിക്കുന്നത്. ആ തിരിച്ചറിവാണ് എല്ലാ സെൽഫ് ഹീലിംഗിന്റെയും ആദ്യ പടി. ഉള്ളിലെ കുട്ടിയ്ക്ക് പറയാനുള്ളത് കൂടി കേൾക്കണം ഈ ശിശു ദിനത്തിൽ. സാരമില്ല, ഞാനില്ലേ എന്ന് സ്വയം ചേർത്തു പിടിക്കണം ??
