ന്യൂഡൽഹി: വയനാട് ദുരന്തത്തിനുള്ള കേന്ദ്ര സർക്കാർ പാക്കേജ് സമയബന്ധിതമായി അംഗീകരിച്ച് നടപ്പിലാക്കുമെന്ന് കേന്ദ്ര ധനകാര്യ മന്ത്രി നിർമല സീതാരാമൻ. കേരളത്തിന്റെ ഡൽഹിയിലെ പ്രത്യേക പ്രതിനിധി പ്രൊഫ. കെ വി തോമസുമായി നടന്ന ചർച്ചയിലാണ് കേന്ദ്ര ധനകാര്യ മന്ത്രി ഇക്കാര്യം വ്യക്തമാക്കിയത്.
കേന്ദ്രസർക്കാരിന്റെ ഉന്നത ഉദ്യോഗസ്ഥരുടെ സംഘം കഴിഞ്ഞ ഓഗസ്റ്റ് 8, 9, 10, തീയതികളിൽ വയനാട് സന്ദർശിക്കുകയും, കേരള ചീഫ് സെക്രട്ടറി ഉൾപ്പെടെയുള്ളവരുമായി ആശയവിനിമയം നടത്തുകയും ചെയ്തിരുന്നു. ഇതിനു ശേഷം റിപ്പോർട്ട് ആഭ്യന്തരമന്ത്രി, ധനകാര്യമന്ത്രി, കൃഷിമന്ത്രി എന്നിവരുടെ സബ് കമ്മിറ്റിക്ക് സമർപ്പിച്ചിട്ടുണ്ടെന്നും നിർമല സീതരാമൻ വ്യക്തമാക്കി.
അതോടൊപ്പം കേരള സർക്കാരിന്റെയും വിശദമായ റിപ്പോർട്ടുകൾ കേന്ദ്രത്തിന് ലഭിച്ചിട്ടുണ്ട്. ഈ റിപ്പോർട്ടുകൾ പരിശോധിച്ച് വയനാടിന് നൽകേണ്ട പ്രത്യേക കേന്ദ്ര സഹായം ഉടൻ പ്രഖ്യാപിക്കുമെന്നും ധനമന്ത്രി കെ വി തോമസിന് ഉറപ്പ് നൽകിയിട്ടുണ്ട്.
കേന്ദ്രം ഈ റിപ്പോർട്ടുകൾ സമഗ്രമായി പരിശോധിച്ച് കേരളത്തിന് സാമ്പത്തിക സഹായം പ്രഖ്യാപിക്കുമെന്ന് ധനമന്ത്രി എനിക്ക് ഉറപ്പുനൽകിയതായി കെ വി തോമസ് പുറത്ത് വിട്ട പ്രസ്താവനയിൽ പറഞ്ഞു.
അതേസമയം കേരളത്തിനുള്ള കടത്തിൻ്റെ പരിധിയിൽ ഇളവ് നൽകുമെന്ന് സീതാരാമൻ ഉറപ്പുനൽകുകയും സംസ്ഥാന സർക്കാരിനെ അധിക ഫണ്ട് കടമെടുക്കാൻ അനുവദിക്കുകയും ചെയ്തതായും പ്രൊഫ. തോമസ് പരാമർശിച്ചു. ധനമന്ത്രി, കേരള മുഖ്യമന്ത്രി പിണറായി വിജയൻ, സംസ്ഥാന ധനമന്ത്രി കെ.എൻ. ബാലഗോപാൽ എന്നിവരുമായി നിരവധി തവണ കൂടിക്കാഴ്ച നടത്തിയതിന് ശേഷമാണ് ഉറപ്പ് പറഞ്ഞതെന്നും കെ വി തോമസ് വെളിപ്പെടുത്തി.
