ന്യൂഡൽഹി: നാഷണൽ ക്രിട്ടിക്കൽ മിനറൽ മിഷൻ ആരംഭിക്കുന്നതിന് അംഗീകാരം നൽകി പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്ന കേന്ദ്ര മന്ത്രിസഭാ യോഗം . 16,300 കോടി രൂപ അടങ്കലും പൊതുമേഖലാ സ്ഥാപനങ്ങൾ (പി.എസ്.യു) വഴി 18,000 കോടി രൂപയുടെ നിക്ഷേപവും ഉൾപ്പെടെ 34,300 കോടി രൂപ സമാഹരിച്ചു കൊണ്ടാണ് പദ്ധതി തുടക്കമിടാൻ പോകുന്നത് . നിർണായക ധാതുക്കളുടെ ഇറക്കുമതിയെ ആശ്രയിക്കുന്നത് കുറയ്ക്കുകയും സ്വാശ്രയത്വം ഉറപ്പാക്കുകയുമാണ് ദൗത്യത്തിന്റെ ലക്ഷ്യമെന്ന് മന്ത്രിസഭാ യോഗത്തിന് ശേഷം മാധ്യമങ്ങളോട് വിശദീകരിച്ച കേന്ദ്ര വാർത്താ വിതരണ പ്രക്ഷേപണ മന്ത്രി അശ്വിനി വൈഷ്ണവ് പറഞ്ഞു.
രാജ്യത്തിനകത്തും അതിന്റെ ഓഫ്‌ഷോർ പ്രദേശങ്ങളിലും നിർണായക ധാതുക്കളുടെ പര്യവേക്ഷണം ഈ ദൗത്യം കൂടുതൽ ശക്തമാക്കും. നിർണായക ധാതു ഖനന പദ്ധതികൾക്കായി ഒരു ഫാസ്റ്റ്-ട്രാക്ക് റെഗുലേറ്ററി അംഗീകാര പ്രക്രിയ സൃഷ്ടിക്കുക എന്നതാണ് ഇതിന്റെ ലക്ഷ്യം എന്ന് ഒരു ഔദ്യോഗിക പ്രസ്താവനയിൽ പറയുന്നു. രാജ്യത്തെ സെമി കണ്ടക്ടർ ഇലക്ട്രോണിക്സ് വ്യവസായത്തിന്റെയും, ഇലക്ട്രിക് വാഹനങ്ങളുടെയും നട്ടെല്ലാണ് നിർണായക ധാതുക്കൾ. ഇതിന്റെ ഫലപ്രദമായ പര്യവേഷണം സമ്പദ്‌വ്യവസ്ഥയ്ക്ക് വലിയ മുന്നേറ്റം തന്നെയാണ് നല്കാൻ പോകുന്നത്.
