ന്യൂഡൽഹി : ലോക്സഭയിൽ പ്രതിപക്ഷ നേതാവ് രാഹുൽ ഗാന്ധി വലിയ വിവാദമാക്കി മാറ്റിയ ‘ഫോർ സ്റ്റാർസ് ഓഫ് ഡെസ്റ്റിനി’ എന്ന പുസ്തകം ഇതുവരെ പ്രസിദ്ധീകരിച്ചിട്ടില്ല എന്ന് വ്യക്തമാക്കി മുൻ കരസേനാ മേധാവി ജനറൽ മനോജ് മുകുന്ദ് നരവാനെ. തന്റെ ആത്മകഥയായ ‘ഫോർ സ്റ്റാർസ് ഓഫ് ഡെസ്റ്റിനി’ എന്ന പുസ്തകം ഇതുവരെ പ്രസിദ്ധീകരിക്കുകയോ വിതരണം ചെയ്യുകയോ വിൽക്കുകയോ ചെയ്തിട്ടില്ല എന്ന് എക്സിൽ പങ്കുവെച്ച ഒരു പോസ്റ്റിലൂടെ ജനറൽ നരവാനെ സ്ഥിരീകരിച്ചു. രാഹുൽ ഗാന്ധി ലോക്സഭയിൽ ഉയർത്തിയ വിവാദങ്ങൾക്ക് ഒടുവിൽ പുസ്തകത്തിന്റെ രചയിതാവ് തന്നെ സത്യം വെളിപ്പെടുത്തി അന്ത്യം കുറിച്ചിരിക്കുകയാണ്.
‘ഫോർ സ്റ്റാർസ് ഓഫ് ഡെസ്റ്റിനി’ എന്നാ മോൻ കരസേന മേധാവിയുടെ ആത്മകഥാ പ്രസിദ്ധീകരിക്കാനിരിക്കുന്ന പെൻഗ്വിൻ റാൻഡം ഹൗസ് എന്ന പ്രസാദകർ തന്നെ നേരത്തെ പുസ്തകം ഇതുവരെ പ്രസിദ്ധീകരിച്ചിട്ടില്ല എന്ന് വ്യക്തമാക്കിയിരുന്നു. എന്നാൽ പ്രതിപക്ഷ നേതാവ് രാഹുൽ ഗാന്ധി ഈ പുസ്തകത്തിന്റെ ഒരു പകർപ്പ് പാർലമെന്റിലും പാർലമെന്റിനു മുൻപിൽ മാധ്യമങ്ങളെയും കാണിച്ചിരുന്നു. എന്നാൽ ഇതുവരെ പ്രസിദ്ധീകരിച്ചിട്ടില്ലാത്ത ഒരു പുസ്തകം എങ്ങനെയാണ് രാഹുൽ ഗാന്ധി കാണിക്കുന്നത് എന്ന ചോദ്യമാണ് ഇപ്പോഴും അവശേഷിക്കുന്നത്.
സംഭവം വിവാദമായി മാറിയതോടെ തങ്ങൾ പുസ്തകം ആമസോണിലാണ് വായിച്ചത് എന്നാണ് കോൺഗ്രസ് നേതാവ് കെസി വേണുഗോപാൽ ഇന്ന് മാധ്യമങ്ങളോട് പറഞ്ഞത്. എന്നാൽ ഇതുവരെ പ്രസിദ്ധീകരിച്ചിട്ടില്ലാത്ത ഒരു പുസ്തകം എങ്ങനെ ആമസോണിൽ ലഭ്യമായി എന്നുള്ള ചോദ്യങ്ങൾക്ക് കോൺഗ്രസ് നേതാക്കൾ ആരും ഇതുവരെ മറുപടി നൽകിയിട്ടില്ല. പുസ്തകം പ്രസിദ്ധീകരിച്ചിട്ടില്ലെന്നും ആമസോൺ ഉൾപ്പെടെയുള്ള ഒരു ഓൺലൈൻ പ്ലാറ്റ്ഫോമിലും പുസ്തകം ലഭ്യമല്ല എന്നുമാണ് പ്രസാധകരായ പെൻഗ്വിൻ ഉറപ്പിച്ചു വ്യക്തമാക്കുന്നത്. ഈ പുസ്തകം എങ്ങനെ ലഭിച്ചു എന്നുള്ളതിനെ കുറിച്ച് രാഹുൽ ഗാന്ധി തന്നെ നേരിട്ട് മറുപടി പറയണമെന്നാണ് ഇപ്പോൾ ബിജെപി ആവശ്യപ്പെടുന്നത്.
