നിങ്ങളുടെ ശരീരത്തിൽ പതിപ്പിക്കുന്ന ടാറ്റൂ മഷി ചർമ്മത്തിൽ മാത്രം ഒതുങ്ങിനിൽക്കുന്ന ഒന്നാണെന്ന് കരുതുന്നുണ്ടെങ്കിൽ തെറ്റി. ടാറ്റൂ ചെയ്യുന്നത് ശരീരത്തിന്റെ സ്വാഭാവിക പ്രതിരോധ സംവിധാനത്തെ തളർത്തുമെന്നും മഷി ആന്തരാവയവങ്ങളിലേക്ക് പടരുമെന്നും പുതിയ പഠനങ്ങൾ വ്യക്തമാക്കുന്നു. ‘പ്രൊസീഡിംഗ്‌സ് ഓഫ് നാഷണൽ അക്കാദമി ഓഫ് സയൻസസ്’ (PNAS) പ്രസിദ്ധീകരിച്ച പഠനത്തിലാണ് പച്ചകുത്തുന്നത് ചർമ്മത്തിന് പുറത്തുള്ള അലങ്കാരം എന്നതിലുപരി ആന്തരിക ആരോഗ്യത്തെ ബാധിക്കുന്ന ഒന്നാണെന്ന് വെളിപ്പെടുത്തിയിരിക്കുന്നത്.
ടാറ്റൂ ചെയ്യുമ്പോൾ സൂചി ഉപയോഗിച്ച് ചർമ്മത്തിന്റെ മധ്യപാളിയായ ഡെർമിസിലേക്കാണ് മഷി നിക്ഷേപിക്കുന്നത്. ഈ മഷിയെ ഒരു ബാഹ്യ ശത്രുവായി (Foreign Particle) കാണുന്ന ശരീരം ഉടനടി പ്രതിരോധ പ്രവർത്തനങ്ങൾ ആരംഭിക്കുന്നു. വെളുത്ത രക്താണുക്കളിലെ മാക്രോഫേജുകൾ (Macrophages) ഈ മഷി കണങ്ങളെ വിഴുങ്ങാൻ ശ്രമിക്കും. എന്നാൽ ചില കണങ്ങൾ അവിടെത്തന്നെ നിൽക്കുമ്പോൾ, ചെറിയ കണികകൾ ലിംഫറ്റിക് സിസ്റ്റം വഴി ശരീരത്തിന്റെ വിവിധ ഭാഗങ്ങളിലേക്ക് സഞ്ചരിക്കുകയും ലിംഫ് നോഡുകളിൽ (Lymph Nodes) അടിഞ്ഞുകൂടുകയും ചെയ്യുന്നു. ശസ്ത്രക്രിയകൾക്കിടയിൽ രോഗികളുടെ ലിംഫ് നോഡുകൾ ടാറ്റൂ മഷിയുടെ നിറത്തിൽ കാണപ്പെടുന്നത് ഡോക്ടർമാർക്കിടയിൽ പതിവ് കാഴ്ചയായി മാറിക്കഴിഞ്ഞു.
ലിംഫ് നോഡുകളിൽ ഇത്തരത്തിൽ മഷി കുന്നുകൂടുന്നത് ലിംഫ് ഗ്രന്ഥികളുടെ വീക്കത്തിന് (Chronic Enlargement) കാരണമാകും. മഷിയിലെ ലോഹാംശങ്ങളും രാസവസ്തുക്കളും ശരീരത്തെ എപ്പോഴും ഒരു ‘അലേർട്ട്’ അവസ്ഥയിൽ നിർത്തുന്നതിനാൽ യഥാർത്ഥ രോഗാണുക്കൾ എത്തുമ്പോൾ ഫലപ്രദമായി പ്രതികരിക്കാൻ പ്രതിരോധ കോശങ്ങൾക്ക് കഴിയാതെ വരുന്നു. പച്ചകുത്തിയ പത്ത് ശതമാനം ആളുകളിലും വിട്ടുമാറാത്ത വീക്കം (Chronic Inflammation) ഉണ്ടാകാൻ സാധ്യതയുണ്ടെന്നും പഠനം പറയുന്നു. ഇതിനുപുറമെ, പ്രതിരോധ കോശങ്ങളുടെ ഈ ‘ശ്രദ്ധ തിരിക്കൽ’ വാക്സിനുകളുടെ ഫലപ്രാപ്തിയെ പോലും ബാധിച്ചേക്കാം. കഠിനമായി പച്ചകുത്തിയ ഭാഗങ്ങളിൽ വാക്സിൻ എടുക്കുന്നത് ആന്റിബോഡികളുടെ ഉത്പാദനം കുറയ്ക്കാൻ കാരണമായേക്കാമെന്നതിനാൽ ടാറ്റൂ ഇല്ലാത്ത ഭാഗങ്ങളിൽ കുത്തിവെപ്പ് എടുക്കുന്നതാണ് ഉചിതമെന്ന് ശാസ്ത്രജ്ഞർ നിർദ്ദേശിക്കുന്നു. അല്പം ഫാഷന് വേണ്ടി ശരീരത്തിന്റെ സ്വാഭാവിക കാവൽക്കാരെ തളർത്തണോ എന്ന് ആലോചിക്കുന്നത് നന്നായിരിക്കും.
