നമ്മുടെ സംസ്ഥാനത്തിന്റെ ഔദ്യോഗിക നാമം ‘കേരള’ എന്നതിൽ നിന്നും ‘കേരളം’ എന്ന് പുനർനാമകരണം ചെയ്യാനുള്ള നിർദ്ദേശത്തിന് കേന്ദ്ര മന്ത്രിസഭയുടെ അംഗീകാരം. പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ഇന്ന് (ചൊവ്വാഴ്ച) ചേർന്ന മന്ത്രിസഭാ യോഗമാണ് ഈ ചരിത്രപരമായ തീരുമാനത്തിന് അനുമതി നൽകിയത്. ഇതോടെ മലയാളികളുടെ ദീർഘകാലത്തെ ആവശ്യത്തിനാണ് ദേശീയ തലത്തിൽ അംഗീകാരമാകുന്നത്. കേന്ദ്ര ആഭ്യന്തര മന്ത്രി അമിത് ഷായുടെ പ്രത്യേക താൽപ്പര്യപ്രകാരം ആഭ്യന്തര മന്ത്രാലയം തയ്യാറാക്കിയ കുറിപ്പിന് നിയമമന്ത്രാലയവും നേരത്തെ പച്ചക്കൊടി കാട്ടിയിരുന്നു.
ഭാഷാടിസ്ഥാനത്തിൽ സംസ്ഥാനങ്ങൾ രൂപീകരിച്ച 1956 നവംബർ ഒന്നു മുതൽ മലയാളികൾ തങ്ങളുടെ നാടിനെ ‘കേരളം’ എന്നാണ് വിളിച്ചിരുന്നതെങ്കിലും ഭരണഘടനയുടെ ഒന്നാം ഷെഡ്യൂളിൽ ‘കേരള’ എന്നാണ് രേഖപ്പെടുത്തിയിരുന്നത്. ഇത് മാറ്റണമെന്ന് ആവശ്യപ്പെട്ട് 2024 ജൂൺ 24-ന് കേരള നിയമസഭ ഐകകണ്ഠേന പ്രമേയം പാസാക്കി കേന്ദ്രത്തിന് അയച്ചിരുന്നു. ഭരണഘടനയുടെ അനുച്ഛേദം 3 പ്രകാരം സംസ്ഥാനങ്ങളുടെ പേര് മാറ്റാൻ പാർലമെന്റിന് അധികാരമുണ്ട്. ഇതിന്റെ ഭാഗമായുള്ള ‘കേരള (പേരുമാറ്റം) ബിൽ 2026’ ഉടൻ തന്നെ രാഷ്ട്രപതിയുടെ പരിഗണനയ്ക്ക് എത്തും. രാഷ്ട്രപതി ഈ ബിൽ അഭിപ്രായ രൂപീകരണത്തിനായി വീണ്ടും കേരള നിയമസഭയ്ക്ക് അയക്കും. സഭയുടെ മറുപടി ലഭിച്ചാലുടൻ പാർലമെന്റിന്റെ ഇരുസഭകളിലും ബിൽ അവതരിപ്പിച്ച് നിയമമാക്കും.
ദേശീയ സ്വാതന്ത്ര്യ സമര കാലം മുതൽക്കേ മലയാളം സംസാരിക്കുന്നവരുടെ നാട് ‘കേരളം’ എന്നറിയപ്പെടണമെന്ന ശക്തമായ ആവശ്യം ഉയർന്നിരുന്നു. മാതൃഭാഷയിലെ ഉച്ചാരണം തന്നെ ഔദ്യോഗിക രേഖകളിലും വരണമെന്ന സംസ്ഥാന സർക്കാരിന്റെ ആവശ്യം കേന്ദ്രം അംഗീകരിച്ചത് വലിയ നയതന്ത്ര വിജയമായാണ് വിലയിരുത്തപ്പെടുന്നത്. പേര് മാറുന്നതോടെ കേന്ദ്ര സർക്കാർ രേഖകളിലും ഗസറ്റുകളിലും അന്താരാഷ്ട്ര വേദികളിലും ഇനി മുതൽ ‘കേരളം’ എന്നാകും സംസ്ഥാനം അറിയപ്പെടുക. ഭാഷാപരമായ സ്വത്വം വീണ്ടെടുക്കാനുള്ള ഈ നീക്കത്തെ രാഷ്ട്രീയ ഭേദമന്യേ എല്ലാ വിഭാഗം ജനങ്ങളും സ്വാഗതം ചെയ്തിട്ടുണ്ട്.
