സൂപ്പർ-8 ലെ നിർണ്ണായക മത്സരത്തിൽ സിംബാബ്‌വെയെ 72 റൺസിന് പരാജയപ്പെടുത്തി ഇന്ത്യ വിജയവഴിയിൽ തിരിച്ചെത്തി. ഇന്ത്യ ഉയർത്തിയ 257 റൺസ് എന്ന ഹിമാലയൻ ലക്ഷ്യം പിന്തുടർന്ന സിംബാബ്‌വെയ്ക്ക് നിശ്ചിത 20 ഓവറിൽ 6 വിക്കറ്റ് നഷ്ടത്തിൽ 184 റൺസെടുക്കാനേ സാധിച്ചുള്ളൂ. സിംബാബ്‌വെയ്ക്കായി ബ്രയാൻ ബെന്നറ്റ് (59 പന്തിൽ 97) തകർപ്പൻ പ്രകടനം നടത്തിയെങ്കിലും ഇന്ത്യൻ ബൗളിംഗ് കരുത്തിന് മുന്നിൽ അത് മതിയാകുമായിരുന്നില്ല.
ടോസ് നഷ്ടമായി ബാറ്റിംഗിന് ഇറങ്ങിയ ഇന്ത്യ ആഗ്രഹിച്ച രീതിയിൽ ഉള്ള ബാറ്റിംഗാണ് നടത്തിയത്. ആദ്യ പന്ത് മുതൽ ആക്രമിച്ചു കളിച്ച ഇന്ത്യൻ ബാറ്റർമാർ ടി20 ലോകകപ്പിലെ ഇന്ത്യയുടെ എക്കാലത്തെയും ഉയർന്ന സ്കോറായ 256/4 എന്ന പടുകൂറ്റൻ സ്കോറിലെത്തി. പ്ലേയിംഗ് ഇലവനിലെ ഓരോ താരവും തങ്ങളുടെ പങ്ക് ഭംഗിയായി നിർവ്വഹിച്ച ഇന്നിംഗ്‌സായിരുന്നു ഇത്. ഈ ലോകകപ്പിൽ താളം കണ്ടെത്താൻ ബുദ്ധിമുട്ടിയ അഭിഷേക് ശർമ്മ 30 പന്തിൽ 55 റൺസുമായി തകർപ്പൻ തുടക്കം നൽകി. വിക്കറ്റ് കീപ്പർ ബാറ്ററായി തിരിച്ചെത്തിയ മലയാളി താരം സഞ്ജു സാംസൺ (15 പന്തിൽ 24) രണ്ട് സിക്സറുകളുമായി ചെപ്പോക്കിനെ ആവേശം കൊള്ളിച്ചു. ശേഷം വന്ന ഇഷാൻ കിഷനും (38) ക്യാപ്റ്റൻ സൂര്യകുമാർ യാദവും (33) സ്കോർ ബോർഡിന്റെ വേഗത കുറയാതെ കാത്തു.
ഇന്നിംഗ്‌സിന്റെ അവസാന ഓവറുകളിൽ ഹാർദിക് പാണ്ഡ്യയും തിലക് വർമ്മയും നടത്തിയ പ്രകടനമാണ് സ്കോർ 250 കടത്തിയത്. വെറും 23 പന്തിൽ 50 റൺസുമായി ഹാർദിക് പുറത്താകാതെ നിന്നപ്പോൾ, വെറും 16 പന്തിൽ 44 റൺസ് അടിച്ചുകൂട്ടി തിലക് വർമ്മ ലോകത്തെ ഞെട്ടിച്ചു. സിക്കന്ദർ റാസയുൾപ്പെടെയുള്ള സിംബാബ്‌വെ ബൗളർമാർക്ക് ഒരവസരവും നൽകാതെയായിരുന്നു ഇന്ത്യയുടെ ഈ ബാറ്റിംഗ് വിരുന്ന്. മറുപടിയിൽ ബ്രയൻ ഒഴികെയുള്ള താരങ്ങൾ ബുദ്ധിമുട്ടിയപ്പോൾ സിംബാബ്‌വെയ്ക്ക് ലക്ഷ്യത്തിനടുത്ത് എത്താനായില്ല. ഇന്ത്യക്കായി മൂന്ന് വിക്കറ്റ് നേടിയ അർശ്ദീപ്‌ സിംഗ് തിളങ്ങി.
ഇന്ത്യൻ ജയത്തോടെ സൂപ്പർ-8 ഗ്രൂപ്പിലെ അവസാന മത്സരം ഇപ്പോൾ ഒരു ക്വാർട്ടർ ഫൈനലിന് തുല്യമായി മാറിയിരിക്കുകയാണ്. ഞായറാഴ്ച കൊൽക്കത്തയിലെ ഈഡൻ ഗാർഡൻസിൽ ഇന്ത്യ വെസ്റ്റ് ഇൻഡീസിനെ നേരിടും. ഈ മത്സരത്തിൽ വിജയിക്കുന്നവർ നേരിട്ട് സെമി ഫൈനലിലേക്ക് യോഗ്യത നേടും. തോൽക്കുന്നവർ ടൂർണമെന്റിൽ നിന്ന് പുറത്താകും എന്നതിനാൽ ഇതൊരു ജീവൻമരണ പോരാട്ടമാണ്.
