തൊഴിൽ വിപണിയിലെ തരംഗങ്ങൾ ഓരോ വർഷവും മാറിക്കൊണ്ടിരിക്കുകയാണ്. ‘ക്വയറ്റ് ക്വിറ്റിംഗ്’ (Quiet Quitting), ‘ബെയർ മിനിമം മൺഡേയ്സ്’ (Bare Minimum Mondays) തുടങ്ങിയ ട്രെൻഡുകൾക്ക് പിന്നാലെ ഇപ്പോൾ കോർപ്പറേറ്റ് ലോകത്ത് ചർച്ചയാകുന്നത് ‘ജോബ് ഹഗ്ഗിംഗ്’ (Job Hugging) ആണ്. നിലവിലുള്ള ജോലിയിൽ ഒട്ടും സംതൃപ്തിയില്ലെങ്കിലും, ആ ജോലിയിൽ ഒട്ടും വളർച്ചയില്ലെന്ന് ബോധ്യമുണ്ടെങ്കിലും അത് വിട്ടുപോകാൻ ഭയപ്പെട്ട് അവിടെത്തന്നെ തൂങ്ങിക്കിടക്കുന്ന രീതിയാണിത്. സാമ്പത്തിക അനിശ്ചിതത്വവും പുതിയ ജോലി കിട്ടുമോ എന്ന ആശങ്കയുമാണ് യുവാക്കളെപ്പോലും ഇത്തരമൊരു നിലപാടിലേക്ക് നയിക്കുന്നത്. ജോലി മാറ്റം ഒരു വലിയ സാഹസമായി കാണുന്ന കാലഘട്ടത്തിലേക്കാണ് നാം നീങ്ങുന്നതെന്ന് വിദഗ്ധർ വിലയിരുത്തുന്നു.
കോസ്മോപൊളിറ്റൻ (Cosmopolitan) റിപ്പോർട്ട് പ്രകാരം, കോവിഡിന് ശേഷമുള്ള കാലത്ത് ശമ്പളം കൂടുതൽ കിട്ടുന്ന പുതിയ ജോലികളിലേക്ക് ചാടിപ്പോകുന്ന ‘ജോബ് ഹോപ്പിംഗ്’ വലിയ ട്രെൻഡായിരുന്നു. എന്നാൽ ഇന്ന് സ്ഥിതി മാറി. സ്ഥിരമായ ഒരു വരുമാനം (Steady Paycheque) നഷ്ടപ്പെടുമോ എന്ന പേടിയാണ് പലരെയും പഴയ ജോലിയിൽ തന്നെ തുടരാൻ പ്രേരിപ്പിക്കുന്നത്. ഇതിനെ കമ്പനിയോടുള്ള കൂറായി കാണാൻ കഴിയില്ല, മറിച്ച് സുരക്ഷിതത്വത്തിനായുള്ള ഒരു കരുതൽ മാത്രമാണിത്. 2013-ന് ശേഷമുള്ള ഏറ്റവും കുറഞ്ഞ നിയമന നിരക്കാണ് (Hiring Activity) ഇപ്പോൾ ആഗോളതലത്തിൽ രേഖപ്പെടുത്തുന്നത്. ഇതിനുപുറമെ ആർട്ടിഫിഷ്യൽ ഇന്റലിജൻസിന്റെ (AI) കടന്നുവരവ് തന്റെ ജോലി തെറിപ്പിക്കുമോ എന്ന ഭയവും പലരെയും നിലവിലുള്ള സീറ്റിൽ മുറുകെപ്പിടിക്കാൻ പ്രേരിപ്പിക്കുന്നു.
മോൺസ്റ്ററിന്റെ 2025-ലെ റിപ്പോർട്ട് പ്രകാരം 75 ശതമാനം ജീവനക്കാരും 2027 വരെ തങ്ങളുടെ നിലവിലെ ജോലിയിൽ തന്നെ തുടരാനാണ് ആഗ്രഹിക്കുന്നത്. ഇതിൽ 48 ശതമാനം പേരും ജോലിയിൽ സന്തോഷവതികളായതുകൊണ്ടല്ല, മറിച്ച് സാമ്പത്തിക ഭയം കാരണമാണ് അവിടെ തുടരുന്നത്. കൗതുകകരമായ മറ്റൊരു കാര്യം, ഉദ്യോഗാർത്ഥികൾ മാത്രമല്ല തൊഴിലുടമകളും തങ്ങളുടെ ജീവനക്കാരെ വിട്ടുനൽകാൻ തയ്യാറാകാതെ ‘ഹഗ്’ (Hugging) ചെയ്യുന്നു എന്നതാണ്. മികച്ച പ്രതിഭകളെ കണ്ടെത്താനുള്ള പ്രയാസം കാരണം കമ്പനികളും തങ്ങളുടെ സ്റ്റാഫിനെ മുറുകെപ്പിടിക്കുന്നു. എന്നാൽ ഒരേ ജോലിയിൽ വളർച്ചയില്ലാതെ തുടരുന്നത് പ്രൊഫഷണൽ സ്റ്റാഗ്നേഷനും (Stagnation) മാനസിക സമ്മർദ്ദത്തിനും കാരണമാകുമെന്ന് കരിയർ കോച്ചുമാർ മുന്നറിയിപ്പ് നൽകുന്നു. ഒരേ കമ്പനിയിൽ നിന്നുകൊണ്ട് തന്നെ പുതിയ കാര്യങ്ങൾ പഠിക്കാനും (Pivoting in place) നെറ്റ്‌വർക്കിംഗ് ശക്തമാക്കാനും ശ്രദ്ധിക്കണമെന്നാണ് വിദഗ്ധരുടെ ഉപദേശം.
