തലസ്ഥാനത്തെ രാജ്യാന്തര വിമാനത്താവളത്തിൽ വൻ മയക്കുമരുന്ന് വേട്ട. കോടികൾ വിലമതിക്കുന്ന അതീവ പ്രഹരശേഷിയുള്ള ‘ഹൈഡ്രോപോണിക്’ കഞ്ചാവുമായി യുവ ഡോക്ടറെ കസ്റ്റംസ് പിടികൂടി. സിംഗപ്പൂരിൽ നിന്നെത്തിയ കണ്ണൂർ സ്വദേശി ലിബിൻ ദാസാണ് (27) പിടിയിലായത്. ഇയാളുടെ പക്കൽ നിന്നും ഏകദേശം 1.86 കോടി രൂപ വിലമതിക്കുന്ന മയക്കുമരുന്നാണ് ഉദ്യോഗസ്ഥർ കണ്ടെടുത്തത്. കേസിൽ മറ്റൊരു ഡോക്ടറായ കൊല്ലം സ്വദേശി ആനന്ദ് ജയപ്രകാശിനും (34) നേരിട്ട് പങ്കുണ്ടെന്ന് കസ്റ്റംസ് സ്ഥിരീകരിച്ചു. പിടിയിലായ രണ്ടുപേരും ചൈനയിലെ പ്രശസ്തമായ വുഹാൻ സർവകലാശാലയിൽ നിന്നും എംബിബിഎസ് പഠനം പൂർത്തിയാക്കിയവരാണെന്ന വിവരം ഞെട്ടലോടെയാണ് അധികൃതർ കേട്ടത്.
അതീവ തന്ത്രപരമായ നീക്കത്തിലൂടെ കസ്റ്റംസ് പരിശോധന വെട്ടിക്കാനായിരുന്നു പ്രതികളുടെ ശ്രമം. ബാങ്കോക്കിൽ നിന്നെത്തിയ ആനന്ദ് ജയപ്രകാശ്, തന്റെ കൈവശമുണ്ടായിരുന്ന മയക്കുമരുന്ന് അടങ്ങിയ ബാഗേജ് കൈപ്പറ്റാൻ ലിബിൻ ദാസിനോട് ആവശ്യപ്പെടുകയായിരുന്നു. എന്നാൽ രഹസ്യവിവരത്തെ തുടർന്ന് നിരീക്ഷണം ശക്തമാക്കിയ കസ്റ്റംസ് ഉദ്യോഗസ്ഥർ ബാഗ് പരിശോധിച്ചതോടെയാണ് അന്താരാഷ്ട്ര വിപണിയിൽ കോടികൾ വിലവരുന്ന ഹൈഡ്രോപോണിക് കഞ്ചാവ് കണ്ടെത്തിയത്. സാധാരണ കഞ്ചാവിനേക്കാൾ പത്തിരട്ടി വീര്യമുള്ളതും മണ്ണില്ലാതെ ലബോറട്ടറികളിൽ കൃത്രിമമായി വളർത്തുന്നതുമാണ് ഇത്തരത്തിലുള്ള ഹൈഡ്രോപോണിക് കഞ്ചാവുകൾ. വിദേശത്ത് നിന്ന് കേരളത്തിലെ വലിയ ലഹരി മാഫിയകൾക്ക് എത്തിച്ചു നൽകാനുള്ള ശ്രമമായിരുന്നു ഇതെന്നാണ് പ്രാഥമിക നിഗമനം. പിടിയിലായ ലിബിൻ ദാസിനെ കോടതിയിൽ ഹാജരാക്കി റിമാൻഡ് ചെയ്തു. ഒളിവിലുള്ള രണ്ടാമത്തെ ഡോക്ടർക്കായി തിരച്ചിൽ ഊർജ്ജിതമാക്കിയിരിക്കുകയാണ് പോലീസ്.
