അബുദാബി : ഇറാൻ ആക്രമണം തുടരുന്നതിനിടെ യുഎഇയിൽ കനത്ത മഴ. കനത്ത മഴയും കാറ്റും തുടരുന്ന സാഹചര്യത്തിൽ ഓറഞ്ച് അലർട്ട് പ്രഖ്യാപിച്ചു. മിന്നൽ പ്രളയത്തിന് സാധ്യതയുണ്ടെന്നും മുന്നറിയിപ്പുണ്ട്. വെള്ളപ്പൊക്ക താഴ്‌വരയിലെ നിയമലംഘനങ്ങൾക്ക് യുഎഇ ഭരണകൂടം കർശന ശിക്ഷകൾ ഏർപ്പെടുത്തിയിട്ടുണ്ട്.
മഴക്കാലത്ത് വാഹനമോടിക്കുന്നവരും താമസക്കാരും ജാഗ്രത പാലിക്കണമെന്ന് യുഎഇ അധികൃതർ മുന്നറിയിപ്പ് നൽകി. വെള്ളപ്പൊക്ക സാധ്യതയുള്ള പ്രദേശങ്ങൾക്കും അടിയന്തര പ്രതികരണ മേഖലകൾക്കും സമീപമുള്ള നിയമലംഘനങ്ങൾക്ക് 1000 ദിർഹം മുതൽ 2000 ദിർഹം വരെ പിഴ ഈടാക്കുമെന്നും മുന്നറിയിപ്പുണ്ട്. കനത്ത മഴയുള്ള സമയങ്ങളിൽ താഴ്‌വരകൾ, അണക്കെട്ടുകൾ, വെള്ളപ്പൊക്ക ചാലുകൾക്ക് സമീപം ഒത്തുകൂടുന്നത് ഒഴിവാക്കണമെന്ന് ആഭ്യന്തര മന്ത്രാലയം പൊതുജനങ്ങളോട് അഭ്യർത്ഥിച്ചു. അത്തരം പെരുമാറ്റത്തിന് 1,000 ദിർഹം പിഴയും ആറ് ട്രാഫിക് ബ്ലാക്ക് പോയിന്റുകളും ലഭിക്കുമെന്ന് മുന്നറിയിപ്പ് നൽകി.
കനത്ത മഴയും വെള്ളപ്പൊക്കവും ഉള്ള പ്രദേശങ്ങളിൽ അപകടത്തിന്റെ തോത് കണക്കിലെടുക്കാതെ പ്രവേശിക്കുന്നത് 2,000 ദിർഹം പിഴ, 23 ബ്ലാക്ക് പോയിന്റുകൾ, 60 ദിവസത്തേക്ക് വാഹനം കണ്ടുകെട്ടൽ എന്നിവ ലഭിക്കാവുന്ന ഗുരുതരമായ കുറ്റമാണെന്നും യുഎഇ ആഭ്യന്തര മന്ത്രാലയം അറിയിച്ചു. പോലീസ്, ആംബുലൻസ്, രക്ഷാപ്രവർത്തകർ എന്നിവരുൾപ്പെടെയുള്ള അടിയന്തര പ്രതികരണക്കാരെ തടസ്സപ്പെടുത്തിയാൽ 1,000 ദിർഹം പിഴയും നാല് ബ്ലാക്ക് പോയിന്റുകളും 60 ദിവസത്തെ വാഹന കണ്ടുകെട്ടലും ശിക്ഷയായി ലഭിക്കുന്നതാണ്.
