നിലവിൽ നടക്കുന്ന ഇന്ത്യൻ പ്രീമിയർ ലീഗ് സീസണിൽ ലഖ്‌നൗ സൂപ്പർ ജയന്റ്‌സിന്റെ കുപ്പായമണിഞ്ഞ അർജുൻ ടെണ്ടുൽക്കറെച്ചൊല്ലി ക്രിക്കറ്റ് ലോകത്ത് വാക്പോര് മുറുകുന്നു. അർജുന് ലഖ്‌നൗവിന്റെ പ്ലേയിംഗ് ഇലവനിൽ സ്ഥാനം ലഭിക്കില്ലെന്ന ആർ. അശ്വിൻ്റെ പ്രസ്താവനയ്ക്ക് കടുത്ത മറുപടിയുമായി മുൻ ഇന്ത്യൻ താരം യോഗ്‌രാജ് സിംഗ് രംഗത്തെത്തി.
മുംബൈ ഇന്ത്യൻസിൽ നിന്ന് 30 ലക്ഷം രൂപയ്ക്കാണ് അർജുനെ ലഖ്‌നൗ സ്വന്തമാക്കിയത്. എന്നാൽ ടീമിലെ ആഭ്യന്തര പേസർമാരുടെ ബാഹുല്യം കാരണം അർജുന് അവസരം ലഭിക്കില്ലെന്നായിരുന്നു അശ്വിൻ്റെ പക്ഷം. “അർജുൻ ടെണ്ടുൽക്കർ കളിക്കാൻ സാധ്യതയില്ല. മായങ്ക് യാദവ്, ആവേശ് ഖാൻ, മൊഹ്‌സിൻ ഖാൻ, മുഹമ്മദ് ഷമി എന്നിവരുള്ളപ്പോൾ അർജുൻ എങ്ങനെ ടീമിലിടം പിടിക്കാനാണ്? ഒന്നിലധികം താരങ്ങൾക്ക് പരിക്കേറ്റാൽ മാത്രമേ അർജുന് അവസരം ലഭിക്കൂ.” – ആർ. അശ്വിൻ തന്റെ യൂട്യൂബ് ചാനലിൽ പറഞ്ഞു.
എന്തായാലും ഈ വാക്കുകൾക്ക് പിന്നാലെ യുവരാജ് സിംഗിന്റെ പിതാവും അർജുന്റെ മുൻ പരിശീലകനുമായ യോഗ്‌രാജ് സിംഗ് അശ്വിൻ്റെ വാക്കുകളോട് ക്ഷോഭത്തോടെയാണ് പ്രതികരിച്ചത്. “അശ്വിൻ പറയുന്നത് വിഡ്ഢിത്തമാണ്. ഒരാളെക്കുറിച്ച് ഇങ്ങനെയൊക്കെ പറയാൻ അശ്വിൻ ആരാണ്? അർജുൻ സച്ചിൻ്റെ മകനാണ് എന്നത് വിടുക, അവനിലെ ബാറ്റിംഗ് പ്രതിഭ ആരും തിരിച്ചറിയുന്നില്ല. അവന് നട്ടെല്ലിന് പ്രശ്നമുണ്ടായിരുന്നു, അതുകൊണ്ട് പന്തെറിയാൻ ബുദ്ധിമുട്ടുണ്ട്. എന്നാൽ അവൻ സിക്സറുകൾ പറത്തുന്നത് ഞാൻ കണ്ടിട്ടുണ്ട്.” – യോഗ്‌രാജ് സിംഗ് ഇൻസൈഡ് സ്പോർട്ടിനോട് പറഞ്ഞു.
കൂടാതെ അർജുന്റെ പ്രതിഭയെക്കുറിച്ച് ഒരു വലിയ വെല്ലുവിളിയും അദ്ദേഹം നടത്തി.”ലോകത്തെ ആരെയും ഞാൻ വെല്ലുവിളിക്കുന്നു, അർജുൻ ആറ് മാസം എന്റെ കൂടെ പരിശീലിച്ചാൽ അവൻ ലോകത്തെ മികച്ച ബാറ്റർമാരെ കടത്തിവെട്ടും. അങ്ങനെ സംഭവിച്ചില്ലെങ്കിൽ ഞാൻ എന്റെ താടി വടിച്ചു കളയാൻ തയ്യാറാണ്.”
