അന്താരാഷ്ട്ര നയതന്ത്ര ലോകത്തെ അമ്പരപ്പിച്ചുകൊണ്ട് ഉഗാണ്ടൻ സൈനിക മേധാവി ജനറൽ മുഹൂസി കെയ്‌നെറുഗാബ തുർക്കിക്കെതിരെ രംഗത്ത്. സൊമാലിയയിലെ ഭീകരവാദ വിരുദ്ധ പോരാട്ടത്തിൽ ഉഗാണ്ട നൽകിയ സേവനത്തിന് പ്രതിഫലമായി 100 കോടി ഡോളർ (ഏകദേശം 8400 കോടി രൂപ) നൽകണമെന്നാണ് പ്രധാന ആവശ്യം. എന്നാൽ ഇതിനൊപ്പം അദ്ദേഹം ഉന്നയിച്ച രണ്ടാമത്തെ ആവശ്യമാണ് ലോകത്തെ ഞെട്ടിച്ചത് – “തുർക്കിയിലെ ഏറ്റവും സുന്ദരിയായ യുവതിയെ എനിക്ക് ഭാര്യയായി നൽകണം.”
ഉഗാണ്ടൻ പ്രസിഡന്റ് യോവേരി മുസേവേനിയുടെ മകൻ കൂടിയായ മുഹൂസി, ശനിയാഴ്ച എക്‌സിലൂടെയാണ് ഈ ആവശ്യങ്ങൾ ഉന്നയിച്ചത്. 30 ദിവസത്തിനുള്ളിൽ തുർക്കി ഇതിനോട് പ്രതികരിച്ചില്ലെങ്കിൽ നയതന്ത്ര ബന്ധം അവസാനിപ്പിക്കുമെന്നും കമ്പാലയിലെ തുർക്കി എംബസി പൂട്ടിക്കുമെന്നും അദ്ദേഹം മുന്നറിയിപ്പ് നൽകി. തുർക്കി എയർലൈൻസിനെ ഉഗാണ്ടൻ ആകാശത്ത് പ്രവേശിക്കാൻ അനുവദിക്കില്ലെന്നും അദ്ദേഹം ഭീഷണി മുഴക്കി.
സൊമാലിയയിൽ അൽ-ഷബാബ് ഭീകരർക്കെതിരെ ഉഗാണ്ടൻ സൈന്യം കഴിഞ്ഞ രണ്ട് പതിറ്റാണ്ടായി പോരാടുമ്പോൾ, തുർക്കി അവിടുത്തെ അടിസ്ഥാന സൗകര്യ വികസനത്തിലൂടെയും വിമാനത്താവള നടത്തിപ്പിലൂടെയും ലാഭമുണ്ടാക്കുകയാണെന്ന് മുഹൂസി ആരോപിച്ചു. ഇതിനുള്ള ‘സുരക്ഷാ വിഹിതം’ എന്ന നിലയിലാണ് 100 കോടി ഡോളർ ആവശ്യപ്പെട്ടത്.
മുഹൂസിയുടെ ഇത്തരം വിചിത്ര ആവശ്യങ്ങൾ ഇതാദ്യമല്ല. : 2022-ൽ ഇറ്റാലിയൻ പ്രധാനമന്ത്രി ജോർജിയ മെലോനിയെ വിവാഹം കഴിക്കാൻ പകരം 100 പശുക്കളെ നൽകാമെന്ന് അദ്ദേഹം വാഗ്ദാനം ചെയ്തിരുന്നു. ആവശ്യം നിരസിച്ചാൽ റോം പിടിച്ചെടുക്കുമെന്നും അന്ന് അദ്ദേഹം ഭീഷണിപ്പെടുത്തി. രണ്ടാഴ്ചയ്ക്കുള്ളിൽ നെയ്‌റോബി പിടിച്ചെടുക്കുമെന്ന് ഭീഷണിപ്പെടുത്തിയതിനെത്തുടർന്ന് പിതാവായ പ്രസിഡന്റ് മുസേവേനിക്ക് അയൽരാജ്യങ്ങളോട് മാപ്പ് പറയേണ്ടി വന്നിരുന്നു.
