തുർക്കിയുമായുള്ള നയതന്ത്ര ബന്ധം വിച്ഛേദിക്കാതിരിക്കാൻ ലോകത്തെ അമ്പരപ്പിക്കുന്ന വിചിത്ര ആവശ്യങ്ങൾ മുന്നോട്ടുവച്ച് ഉഗാണ്ടൻ സൈനിക മേധാവി ജനറൽ മുഹൂസി കൈനേരുഗാബ. ഉഗാണ്ടൻ പ്രസിഡന്റ് യോവേരി മുസെവേനിയുടെ മകൻ കൂടിയായ കൈനേരുഗാബയുടെ ആവശ്യങ്ങൾ കേട്ട് നയതന്ത്ര ലോകം മൂക്കത്ത് വിരൽ വെക്കുകയാണ്. സൊമാലിയയിൽ തീവ്രവാദികളെ നേരിടാൻ ഉഗാണ്ട നൽകിയ സൈനിക സേവനങ്ങൾക്ക് പകരമായി 1 ബില്യൺ ഡോളർ നൽകണമെന്നതാണ് ആദ്യത്തെ ആവശ്യം. എന്നാൽ രണ്ടാമത്തെ ആവശ്യം തികച്ചും വ്യക്തിപരവും ലൈംഗികച്ചുവയുള്ളതുമാണ്. തുർക്കിയിലെ ഏറ്റവും സുന്ദരിയായ യുവതിയെ തനിക്ക് വിവാഹം കഴിക്കാൻ കൈമാറണമെന്നാണ് ജനറൽ ആവശ്യപ്പെട്ടിരിക്കുന്നത്. അവരെ തന്റെ ഭാര്യയാക്കുമെന്നും അദ്ദേഹം പ്രഖ്യാപിച്ചു കഴിഞ്ഞു.
30 ദിവസത്തിനുള്ളിൽ ഈ ആവശ്യങ്ങൾ അംഗീകരിച്ചില്ലെങ്കിൽ കടുത്ത നയതന്ത്ര പ്രത്യാഘാതങ്ങൾ നേരിടേണ്ടി വരുമെന്നാണ് തുർക്കിക്ക് നൽകിയിരിക്കുന്ന മുന്നറിയിപ്പ്. ഉഗാണ്ടൻ തലസ്ഥാനമായ കമ്പാലയിലുള്ള തുർക്കി എംബസി അടച്ചുപൂട്ടുന്നത് ഉൾപ്പെടെയുള്ള നീക്കങ്ങളിലേക്ക് കടക്കുമെന്നാണ് ഭീഷണി. ജനറൽ കൈനേരുഗാബ ഇത്തരം വിചിത്രമായ ആവശ്യങ്ങൾ ഉന്നയിക്കുന്നത് ഇതാദ്യമല്ല. 2022-ൽ ഇറ്റാലിയൻ പ്രധാനമന്ത്രി ജോർജിയ മെലോണിയെ വിവാഹം കഴിക്കാൻ ആഗ്രഹമുണ്ടെന്നും അതിന് പകരമായി നൂറ് പശുക്കളെ നൽകാമെന്നും അദ്ദേഹം പരസ്യമായി വാഗ്ദാനം ചെയ്തിരുന്നു. വർഷങ്ങൾക്ക് ശേഷം വീണ്ടും സമാനമായ ഒരു സ്ത്രീവിരുദ്ധവും അസംബന്ധവുമായ ആവശ്യവുമായി അദ്ദേഹം രംഗത്തെത്തിയത് അന്താരാഷ്ട്ര തലത്തിൽ വലിയ ചർച്ചയായിരിക്കുകയാണ്.
അധികാരത്തിന്റെ ഹുങ്കിൽ ഒരു സൈനിക മേധാവി നടത്തുന്ന ഇത്തരം പ്രസ്താവനകൾക്കെതിരെ സോഷ്യൽ മീഡിയയിൽ വലിയ രീതിയിലുള്ള പ്രതിഷേധമാണ് ഉയരുന്നത്. തുർക്കി പോലുള്ള ഒരു രാജ്യത്തോട് ഇത്തരമൊരു ആവശ്യം ഉന്നയിക്കുന്നത് നയതന്ത്രപരമായ മര്യാദകളുടെ ലംഘനമാണെന്ന് വിദേശകാര്യ വിദഗ്ധർ ചൂണ്ടിക്കാട്ടുന്നു. ഉഗാണ്ടൻ പ്രസിഡന്റിന്റെ മകനായതിനാൽ തന്നെ ഇദ്ദേഹത്തിന്റെ വാക്കുകൾക്ക് ഭരണകൂടത്തിന്റെ പിന്തുണയുണ്ടോ എന്ന കാര്യത്തിലും ആശങ്ക നിലനിൽക്കുന്നുണ്ട്. സൈനിക മേധാവിയുടെ ഈ ഭീഷണിയോട് തുർക്കി ഇതുവരെ ഔദ്യോഗികമായി പ്രതികരിച്ചിട്ടില്ല.
