2026-ലെ ഐസിസി പുരുഷ ടി20 ലോകകപ്പിൽ ഇന്ത്യയ്ക്ക് കിരീടം നേടിക്കൊടുക്കുന്നതിൽ നിർണ്ണായക പങ്ക് വഹിച്ച മലയാളി താരം സഞ്ജു സാംസണിന് അന്താരാഷ്ട്ര ക്രിക്കറ്റ് കൗൺസിലിന്റെ (ICC) ആദരം. 2026 മാർച്ചിലെ ഐസിസിയുടെ മികച്ച പുരുഷ താരമായി (IC സഞ്ജു സാംസണിനെ തിരഞ്ഞെടുത്തു.
ടൂർണമെന്റിന്റെ നിർണ്ണായക ഘട്ടങ്ങളിലെ സഞ്ജുവിന്റെ വെടിക്കെട്ട് പ്രകടനമാണ് ഇന്ത്യയുടെ വിജയത്തിൽ നിർണ്ണായകമായത്. തുടക്കത്തിൽ പ്ലേയിംഗ് ഇലവനിൽ ഇല്ലാതിരുന്ന താരത്തിന് സൂപ്പർ 8 ലാണ് അവസരം ലഭിക്കുന്നത്. കിട്ടിയ അവസരം ഇരു കയ്യും നീട്ടി സ്വീകരിച്ച സഞ്ജു പിന്നീട് ഇന്ത്യയുടെ ഏറ്റവും വലിയ മാച്ച് വിന്നറായി മാറുകയായിരുന്നു.
സിംബാബ്‌വെയ്‌ക്കെതിരെ 24 റൺസ് നേടി തുടങ്ങിയ സഞ്ജു, വെസ്റ്റ് ഇൻഡീസിനെതിരെ പുറത്താകാതെ 97 റൺസ് അടിച്ചുകൂട്ടി ഇന്ത്യയെ സെമിയിലെത്തിച്ചു. വാംഖഡെ സ്റ്റേഡിയത്തിൽ ഇംഗ്ലണ്ടിനെതിരായ സെമി ഫൈനലിൽ വെടിക്കെട്ട് ബാറ്റിംഗ് പുറത്തെടുത്ത സഞ്ജു 89 റൺസ് നേടി ഇന്ത്യയ്ക്ക് കൂറ്റൻ സ്കോർ സമ്മാനിച്ചു. ഫൈനലിലും തന്റെ മികവ് ആവർത്തിച്ച താരം, വീണ്ടും 89 റൺസ് നേടി ഇന്ത്യയ്ക്ക് തുടർച്ചയായ രണ്ടാം ടി20 ലോകകപ്പ് കിരീടം ഉറപ്പാക്കി.
മാർച്ച് മാസത്തിലെ മൂന്ന് പ്രധാനപ്പെട്ട മത്സരങ്ങളിൽ നിന്നുമായി 137.50 എന്ന മികച്ച ശരാശരിയിലും 200-നോടടുത്ത് സ്ട്രൈക്ക് റേറ്റിലുമായി 275 റൺസാണ് ഈ 31-കാരൻ അടിച്ചുകൂട്ടിയത്. ടി20 ക്രിക്കറ്റിലെ എലൈറ്റ് ബാറ്റർമാരുടെ നിരയിലേക്ക് സഞ്ജു ഈ പ്രകടനത്തോടെ തന്റെ പേര് ഉറപ്പിച്ചു കഴിഞ്ഞു.
നിലവിൽ ഇന്ത്യൻ പ്രീമിയർ ലീഗിൽ ചെന്നൈ സൂപ്പർ കിങ്സിനായി കളിക്കുന്ന സഞ്ജു മികച്ച ഫോമിലാണ് തുടരുന്നത്.
