രാജ്യത്തെ പാർലമെന്ററി ചരിത്രത്തിൽ നിർണ്ണായകമായ വലിയ മാറ്റത്തിന് കേന്ദ്രസർക്കാർ ഒരുങ്ങുന്നു. നിലവിൽ 543 അംഗങ്ങളുള്ള ലോക്സഭയുടെ അംഗസംഖ്യ 850 ആയി ഉയർത്താനാണ് കേന്ദ്രത്തിന്റെ ആലോചന. ഇത് സംബന്ധിച്ച ഭരണഘടനാ ഭേദഗതി ബില്ലിന്റെ കരട് എംപിമാർക്ക് കൈമാറിയതായാണ് വിവരം. മണ്ഡലപുനർനിർണ്ണയവും (Delimitation) വർഷങ്ങളായി മുടങ്ങിക്കിടക്കുന്ന വനിതാ സംവരണ നിയമവും നടപ്പിലാക്കുന്നതിന്റെ ഭാഗമായാണ് ഈ വിപ്ലവകരമായ നീക്കം. പാർലമെന്റിന്റെ പ്രത്യേക മൂന്ന് ദിവസത്തെ സമ്മേളനത്തിൽ ഈ ഭേദഗതികൾ സഭയിൽ അവതരിപ്പിക്കാനാണ് സർക്കാർ പദ്ധതിയിടുന്നത്.
ജനസംഖ്യാ വർദ്ധനവിന് ആനുപാതികമായി ലോക്സഭാ സീറ്റുകൾ വർദ്ധിപ്പിക്കണമെന്ന ആവശ്യം കാലങ്ങളായി നിലനിൽക്കുന്നുണ്ട്. പുതിയ പാർലമെന്റ് മന്ദിരം കൂടുതൽ അംഗങ്ങളെ ഉൾക്കൊള്ളാൻ ശേഷിയുള്ള രീതിയിലാണ് നിർമ്മിച്ചിരിക്കുന്നത് എന്നത് ഈ നീക്കത്തിന് നേരത്തെ തന്നെ സൂചനകൾ നൽകിയിരുന്നു. സീറ്റുകളുടെ എണ്ണം 850 ആയി ഉയരുന്നതോടെ വലിയ സംസ്ഥാനങ്ങളിലെ ജനപ്രതിനിധികളുടെ എണ്ണത്തിൽ ഗണ്യമായ വർദ്ധനവുണ്ടാകും. ഇതോടൊപ്പം വനിതാ സംവരണം കൂടി നടപ്പിലാക്കുമ്പോൾ പാർലമെന്റിലെ സ്ത്രീ പ്രാതിനിധ്യം വലിയ രീതിയിൽ മെച്ചപ്പെടുമെന്നാണ് സർക്കാർ പ്രതീക്ഷിക്കുന്നത്. മണ്ഡലപുനർനിർണ്ണയം നടപ്പിലാക്കുന്നതിനായുള്ള സാങ്കേതിക നടപടികൾ ഉടൻ ആരംഭിച്ചേക്കും.
