വിഷുവിനോടനുബന്ധിച്ച് ഒരു ഹോട്ടൽ പുറത്തിറക്കിയ പരസ്യ പോസ്റ്ററിനെതിരെ രൂക്ഷവിമർശനവുമായി നടൻ ഉണ്ണി മുകുന്ദൻ. ചേർത്തലയിലെ ഒരു ഹോട്ടൽ തങ്ങളുടെ പ്രചാരണത്തിനായി ശ്രീകൃഷ്ണൻ കുഴിമന്തി കഴിക്കുന്ന രീതിയിലുള്ള ചിത്രം ഉപയോഗിച്ചതാണ് താരത്തെ ചൊടിപ്പിച്ചത്. ഹിന്ദു വിശ്വാസങ്ങളെ പരിഹസിക്കുന്ന ഇത്തരം പ്രവണതകൾ ഒരു കാരണവശാലും അംഗീകരിക്കാൻ കഴിയില്ലെന്ന് ഉണ്ണി മുകുന്ദൻ വ്യക്തമാക്കി. സോഷ്യൽ മീഡിയയിലൂടെയായിരുന്നു താരത്തിന്റെ പ്രതികരണം. “എന്തിനും ഏതിനും ഒരു പരിധിയുണ്ട്. ദയവായി വിശ്വാസികളുടെ വികാരങ്ങളെ ബഹുമാനിക്കാൻ പഠിക്കൂ. ഇത് കണ്ടിട്ട് തികഞ്ഞ വെറുപ്പ് തോന്നുന്നു” എന്ന് ഉണ്ണി മുകുന്ദൻ തന്റെ ഇൻസ്റ്റാഗ്രാം സ്റ്റോറിയിൽ കുറിച്ചു.
സംഭവത്തിന് പിന്നാലെ താരത്തിന്റെ പോസ്റ്റിനെ അനുകൂലിച്ചും പ്രതികൂലിച്ചും നിരവധി പേർ രംഗത്തെത്തി. പോസ്റ്ററിനെ ലാഘവത്തോടെ കണ്ട ഒരു ആരാധകന്റെ കമന്റിനും ഉണ്ണി മുകുന്ദൻ കൃത്യമായ മറുപടി നൽകി. “ഇതൊരു വിഷു പോസ്റ്ററായി മാത്രമേ തനിക്ക് തോന്നിയുള്ളൂ” എന്നായിരുന്നു ആരാധകന്റെ പക്ഷം. എന്നാൽ ഇതിനെതിരെ ആഞ്ഞടിച്ച താരം, ഇത്തരം അസംബന്ധങ്ങൾ താൻ സഹിക്കാത്തതിന് കൃത്യമായ കാരണമുണ്ടെന്ന് വ്യക്തമാക്കി. ഓരോ തവണയും ഇത്തരം നിന്ദ്യമായ പ്രവർത്തികൾക്ക് നേരെ നിശബ്ദരായിരിക്കുമ്പോഴാണ് അവ സാധാരണമായ ഒന്നായി മാറുന്നതെന്ന് താരം ഓർമ്മിപ്പിച്ചു. സ്വന്തം വിശ്വാസങ്ങൾ പരിഹസിക്കപ്പെടുമ്പോൾ അത് ചിരിച്ചുതള്ളുന്ന പഴയ സിനിമാക്കാരനല്ല താനെന്നും ഉണ്ണി മുകുന്ദൻ തുറന്നടിച്ചു.
മതേതരത്വം എന്നാൽ എല്ലാ മതങ്ങളെയും ബഹുമാനിക്കലാണെന്നും മറ്റുള്ളവരുടെ മതവികാരങ്ങളെ താൻ ബഹുമാനിക്കുന്നത് പോലെ തന്റെ വികാരങ്ങളെ മാനിക്കാൻ മറ്റുള്ളവരും ബാധ്യസ്ഥരാണെന്നും താരം കുറിപ്പിൽ വ്യക്തമാക്കി. “ചെയ്യരുത് എന്ന് പറഞ്ഞാൽ ചെയ്യരുത്, അതിന് വിശദീകരണങ്ങളുടെ ആവശ്യമില്ല. ഇതിനെ ഒരു വിഷു പോസ്റ്ററായി കാണാൻ എനിക്ക് സാധിക്കുന്നില്ല” എന്നും ഉണ്ണി മുകുന്ദൻ തന്റെ നിലപാട് വ്യക്തമാക്കി. താരത്തിന്റെ പ്രതികരണം സോഷ്യൽ മീഡിയയിൽ വലിയ ചർച്ചകൾക്കാണ് വഴിതെളിച്ചിരിക്കുന്നത്. നേരത്തെയും സമാനമായ വിഷയങ്ങളിൽ താരം എടുത്ത നിലപാടുകൾ ശ്രദ്ധിക്കപ്പെട്ടിരുന്നു. ഹോട്ടലിന്റെ ഭാഗത്തുനിന്നുണ്ടായ ഈ നടപടിക്കെതിരെ വലിയ പ്രതിഷേധമാണ് വിശ്വാസികൾക്കിടയിൽ നിന്നും ഉയരുന്നത്.
