അന്താരാഷ്ട്ര പോപ്പ് ഗായികയും ശതകോടീശ്വരിയായ ബിസിനസ് സംരംഭകയുമായ റിഹാന വീണ്ടും ഇന്ത്യയിൽ തരംഗം സൃഷ്ടിക്കുന്നു. തന്റെ സൗന്ദര്യവർദ്ധക ബ്രാൻഡായ ‘ഫെന്റി ബ്യൂട്ടി’യുടെ (Fenty Beauty) ഔദ്യോഗിക ലോഞ്ചിംഗിനായി മുംബൈയിലെത്തിയ താരം, പ്രമുഖ വ്യവസായി മുകേഷ് അംബാനിയുടെ വസതിയായ ആന്റിലിയ സന്ദർശിച്ച ദൃശ്യങ്ങളാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. കേവലം ഒരു സന്ദർശനത്തിനപ്പുറം ഭാരതീയ ആചാരങ്ങളിൽ പങ്കുചേർന്ന റിഹാനയുടെ ചിത്രങ്ങൾ ആരാധകർ ഏറ്റെടുത്തു കഴിഞ്ഞു.
ആന്റിലിയയിൽ എത്തിയ റിഹാനയെ ഇഷ അംബാനി, ശ്ലോക മേത്ത, രാധിക മെർച്ചന്റ്, അനന്ത് അംബാനി എന്നിവർ ചേർന്നാണ് സ്വീകരിച്ചത്. പരമ്പരാഗത നൃത്തചുവടുകളോടെയായിരുന്നു താരത്തിന് ലഭിച്ച വരവേൽപ്പ്. തുടർന്ന് അംബാനി കുടുംബത്തോടൊപ്പം പ്രത്യേക പൂജയിലും ആരതിയിലും റിഹാന പങ്കുചേർന്നു. പൂക്കൾ കൊണ്ട് ഹോളി ആഘോഷിക്കുന്ന ‘ഫൂലോം കി ഹോളി’ ചടങ്ങിൽ താരം ആവേശത്തോടെ പങ്കെടുക്കുന്നതും പൂവിതളുകൾ എറിഞ്ഞ് അംബാനി കുടുംബാംഗങ്ങൾക്കൊപ്പം നൃത്തം ചെയ്യുന്നതും വീഡിയോകളിൽ കാണാം. ചടങ്ങുകൾക്ക് ശേഷം കുടുംബത്തോടൊപ്പം പ്രത്യേക ഉച്ചഭക്ഷണത്തിലും താരം പങ്കാളിയായി.
തന്റെ ബ്രാൻഡിന്റെ മുംബൈയിലെ സ്റ്റോറായ ‘ഫെന്റി ബ്യൂട്ടി കി ഹവേലി’യുടെ ഉദ്ഘാടനത്തിനായാണ് റിഹാന ഇത്തവണ ഇന്ത്യയിലെത്തിയത്. ചടങ്ങിനിടെ ഹിന്ദിയിൽ ‘നന്ദി’ എങ്ങനെ പറയണമെന്ന് താരം ചോദിക്കുന്ന വീഡിയോ നേരത്തെ തന്നെ ആരാധകർക്കിടയിൽ ചർച്ചയായിരുന്നു. ഉദ്ഘാടനത്തിന് ശേഷം നടന്ന ആഫ്റ്റർ പാർട്ടിയിൽ ബോളിവുഡ് നടി ജാൻവി കപൂർ, പ്രശസ്ത ഡിസൈനർ മനീഷ് മൽഹോത്ര എന്നിവർക്കൊപ്പം റിഹാന സമയം ചെലവഴിച്ചു. ആരാധകരുമായും ഇൻഫ്ലുവൻസർമാരുമായും സംസാരിക്കാനും താരം സമയം കണ്ടെത്തി.
ലോകത്തിലെ ഏറ്റവും ധനികയായ വനിതാ സംഗീതജ്ഞയായ റിഹാന, സംഗീതത്തിനൊപ്പം തന്നെ ബിസിനസ് രംഗത്തും വലിയ സാമ്രാജ്യം കെട്ടിപ്പടുത്ത വ്യക്തിയാണ്. 2024-ൽ അനന്ത് അംബാനി-രാധിക മെർച്ചന്റ് വിവാഹാഘോഷങ്ങളിൽ പങ്കെടുക്കാൻ താരം ജാംനഗറിൽ എത്തിയത് വലിയ വാർത്തയായിരുന്നു. റാപ്പർ എഎസ്എപി റോക്കിയുമായുള്ള ബന്ധത്തിൽ മൂന്ന് മക്കളാണ് റിഹാനയ്ക്കുള്ളത്. 2026-ന്റെ തുടക്കത്തിലാണ് ഇവരുടെ മൂന്നാമത്തെ കണ്മണിയായ റോക്കി ജനിച്ചത്. ഭാരതീയ സംസ്കാരത്തോടുള്ള റിഹാനയുടെ താൽപ്പര്യവും എളിമയുമാണ് സോഷ്യൽ മീഡിയയിൽ ഇപ്പോൾ പ്രശംസിക്കപ്പെടുന്നത്.
