ചൈനീസ് സന്ദർശനം പൂർത്തിയാക്കി മടങ്ങുന്നതിനിടെ ബെയ്ജിങ് വിമാനത്താവളത്തിൽ വെച്ച് ചൈനീസ് അധികൃതർ നൽകിയ സമ്മാനങ്ങളും ബാഡ്ജുകളും ഉൾപ്പെടെയുള്ള വസ്തുക്കൾ പരസ്യമായി ചവറ്റുകുട്ടയിലെറിഞ്ഞ് യുഎസ് പ്രസിഡന്റ് ഡൊണാൾഡ് ട്രംപിന്റെ സുരക്ഷാ സംഘം.
ചൈനീസ് മണ്ണിൽ നിന്നും ലഭിച്ച ഒരു വസ്തു പോലും അമേരിക്കൻ പ്രസിഡന്റിന്റെ ഔദ്യോഗിക വിമാനമായ ‘എയർഫോഴ്സ് വണ്ണിൽ’ കയറ്റാൻ പാടില്ലെന്ന കർശന നിർദ്ദേശത്തെ തുടർന്നായിരുന്നു വിമാനത്തിന്റെ ഗോവണിയുടെ ചുവട്ടിൽ വെച്ച് തന്നെ യുഎസ് രഹസ്യാന്വേഷണ വിഭാഗം ചൈനീസ് വസ്തുക്കൾ ഒന്നൊഴിയാതെ തള്ളിക്കളഞ്ഞത്. ചൈനീസ് അധികൃതർ നൽകിയ മൊബൈൽ ഫോണുകൾ, മെമ്മോറാബിലിയകൾ, ലാപ്പൽ ബാഡ്ജുകൾ, പ്രസ്സ് ഇൻവിറ്റേഷനുകൾ തുടങ്ങിയ സുവനീറുകളെല്ലാം വിമാനത്താവളത്തിൽ വെച്ച് പരസ്യമായി തന്നെ യുഎസ് സംഘം ഉപേക്ഷിക്കുകയായിരുന്നു.
ചൈനയുടെ ഭാഗത്തുനിന്നുള്ള രഹസ്യ നിരീക്ഷണങ്ങളും ചാരക്കണ്ണുകളും (Spying) പൂർണ്ണമായും പ്രതിരോധിക്കുന്നതിന്റെ ഭാഗമായാണ് യുഎസ് രഹസ്യാന്വേഷണ വിഭാഗമായ സീക്രട്ട് സർവീസ് ഈ അതീവ ജാഗ്രത പുലർത്തിയത്. ന്യൂയോർക്ക് പോസ്റ്റിന്റെ വൈറ്റ് ഹൗസ് കറസ്പോണ്ടന്റായ എമിലി ഗുഡിൻ ആണ് എയർഫോഴ്സ് വണ്ണിന് തൊട്ടുമുന്നിൽ നടന്ന ഈ നാടകീയ സംഭവങ്ങൾ സോഷ്യൽ മീഡിയയിലൂടെ ലോകത്തെ അറിയിച്ചത്.
വ്യാപാര മേഖലയിലും അപൂർവ്വ ധാതുക്കളുടെ കൈമാറ്റത്തിലും വലിയ കരാറുകൾ പ്രതീക്ഷിച്ച് ചൈനയിലെത്തിയ ട്രംപിന് ബോയിങ് വിമാനങ്ങളുടെയും സോയാബീന്റെയും ഇടപാടുകൾ മാത്രമാണ് സ്വന്തമാക്കാനായത്. എന്നാൽ മടക്കയാത്രയിൽ കരാറുകൾ ഇല്ലെന്നുമാത്രമല്ല, ചൈനീസ് വംശജമായ ഒരു വസ്തു പോലും വിമാനത്തിൽ ഇല്ലെന്ന് ട്രംപിന്റെ സുരക്ഷാ വിഭാഗം ഉറപ്പുവരുത്തുകയായിരുന്നു.
മുൻപ് ഇത്തരത്തിൽ ലഭിച്ച ചൈനീസ് ചായപ്പാത്രത്തിനുള്ളിൽ നിന്ന് ഉദ്യോഗസ്ഥർ രഹസ്യ ശ്രവണ സഹായികൾ കണ്ടെത്തിയ ചരിത്രമുള്ളതിനാലാണ് അമേരിക്ക ഈ കടുത്ത മുൻകരുതൽ എടുത്തത്. ഇലോൺ മസ്‌കും എൻവിഡിയ സിഇഒ ജെൻസൻ ഹുവാങ്ങും അടങ്ങുന്ന വൻ സംഘമാണ് ട്രംപിനൊപ്പം ചൈനയിൽ ഉണ്ടായിരുന്നത്. ചൈനയിലേക്ക് തിരിക്കും മുൻപ് തന്നെ ഇവർ തങ്ങളുടെ വ്യക്തിഗത ഫോണുകളും ഇലക്ട്രോണിക് ഉപകരണങ്ങളും അമേരിക്കയിൽ തന്നെ വെച്ചിരുന്നു. യാത്രയിലുടനീളം വിവരങ്ങൾ ചോർത്താൻ കഴിയാത്ത താൽക്കാലിക ഫോണുകളും (Burner phones) താൽക്കാലിക ഇമെയിൽ വിലാസങ്ങളുമാണ് ഇവർ ഉപയോഗിച്ചത്. ട്രംപിന്റെ സ്വന്തം ഫോൺ സിഗ്നലുകൾ പൂർണ്ണമായും തടയുന്ന ഫാരഡെ ബാഗുകളിലാണ് വിമാനത്തിനുള്ളിൽ സൂക്ഷിച്ചിരുന്നത്. എപ്പോഴും സോഷ്യൽ മീഡിയയിൽ സജീവമാകാറുള്ള ട്രംപിന് ചൈനയിലെ ഈ 48 മണിക്കൂർ കടുത്ത നിയന്ത്രണങ്ങളുടേതായിരുന്നു.
സന്ദർശന വേളയിൽ ട്രംപും ഷി ജിൻപിങ്ങും തമ്മിൽ സൗഹൃദം പ്രകടിപ്പിച്ചെങ്കിലും পর্ദയ്ക്ക് പിന്നിൽ ഇരുരാജ്യങ്ങളുടെയും സുരക്ഷാ ഉദ്യോഗസ്ഥർ തമ്മിൽ കടുത്ത അസ്വാരസ്യങ്ങളാണ് അരങ്ങേറിയത്. ബെയ്ജിങ്ങിലെ ടെംപിൾ ഓഫ് ഹെവനിലേക്ക് ഇരു നേതാക്കളും എത്തിയപ്പോൾ തോക്ക് കൈവശം വെച്ച യുഎസ് സീക്രട്ട് സർവീസ് ഏജന്റിനെ ചൈനീസ് ഉദ്യോഗസ്ഥർ തടഞ്ഞത് വലിയ കൈയാങ്കളിയിലാണ് കലാശിച്ചത്. കൂടാതെ ഉഭയകക്ഷി ചർച്ചയ്ക്ക് മുന്നോടിയായി ചൈനീസ് മാധ്യമപ്രവർത്തകരുടെ തള്ളിക്കയറ്റത്തിനിടയിൽപ്പെട്ട് ഒരു വൈറ്റ് ഹൗസ് ഉദ്യോഗസ്ഥന് പരിക്കേൽക്കുക കൂടി ചെയ്തതോടെ യുഎസ് പ്രതിനിധികൾ കടുത്ത അമർഷത്തിലായി. ‘ഞങ്ങളും അവരെ പരമാവധി നിരീക്ഷിക്കുന്നുണ്ട്, അവരിങ്ങോട്ടും ചെയ്യും’ എന്ന് മാധ്യമങ്ങളോട് തുറന്നുപറഞ്ഞുകൊണ്ടാണ് ട്രംപ് ബെയ്ജിങ് വിട്ടത്. നയതന്ത്രത്തിന്റെ സകല മര്യാദകളും കാറ്റിൽപ്പറത്തി ചൈനീസ് സാധനങ്ങൾ വിമാനത്താവളത്തിൽ എറിഞ്ഞുതകർത്ത യുഎസ് നിലപാട് ആഗോള രാഷ്ട്രീയ രംഗത്തും സോഷ്യൽ മീഡിയയിലും വലിയ ചർച്ചകൾക്കാണ് വഴിതുറന്നിരിക്കുന്നത്.
