ഇന്ത്യൻ വ്യോമസേനയുടെ കരുത്ത് ആകാശത്തോളം ഉയർത്താൻ പോകുന്ന AMCA (Advanced Medium Combat Aircraft) എന്ന അഞ്ചാം തലമുറ സ്റ്റെൽത്ത് യുദ്ധവിമാന പദ്ധതിക്ക് നിർണായക ഘട്ടത്തിലേക്ക്. വിമാനത്തിന്റെ മാതൃകകൾ നിർമ്മിക്കുന്നതിനായി 15,000 കോടി രൂപയുടെ ഔദ്യോഗിക ടെൻഡർ നടപടികളുമായി കേന്ദ്ര പ്രതിരോധ മന്ത്രാലയം രംഗത്തിറങ്ങി. ഇതോടെ, പൊതുമേഖലാ സ്ഥാപനമായ HAL-ന് പുറമെ ഇന്ത്യയിൽ മറ്റൊരു അത്യാധുനിക യുദ്ധവിമാന നിർമ്മാണ കേന്ദ്രം കൂടി യാഥാർത്ഥ്യമാകാൻ പോവുകയാണ്.
ടാറ്റ , എൽ ആൻഡ് ടി , ഭാരത് ഫോർജ് തുടങ്ങിയ പ്രമുഖ സ്വകാര്യ-പൊതുമേഖലാ കമ്പനികളുടെ കൂട്ടായ്മകളാണ് ഈ വൻ പദ്ധതിക്കായി തിരഞ്ഞെടുക്കപ്പെട്ടിരിക്കുന്നത്. കടുത്ത മത്സരത്തിനൊടുവിൽ ഇതിലൊരു സഖ്യമാകും ഇന്ത്യയുടെ സ്വപ്ന വിമാനത്തിന് ചിറകുകൾ നൽകുക.
നിലവിൽ ലോകത്ത് അമേരിക്ക , ചൈന , റഷ്യ എന്നീ രാജ്യങ്ങൾക്ക് മാത്രമാണ് അഞ്ചാം തലമുറയിൽപ്പെട്ട സ്റ്റെൽത്ത് യുദ്ധവിമാനങ്ങൾ സ്വന്തമായുള്ളത്.
പ്രത്യേക രൂപകൽപ്പനയും കോട്ടിങ്ങും ഉള്ളതിനാൽ ശത്രുക്കളുടെ റഡാറുകൾക്ക് AMCA വിമാനങ്ങളെ കണ്ടെത്തുക അസാധ്യമാണ്. ശത്രുരാജ്യത്തിന്റെ വ്യോമാതിർത്തിക്കുള്ളിൽ കടന്ന് ആക്രമണം നടത്താൻ ഇത് സഹായിക്കും. ആഫ്റ്റർബേണറുകൾ ഉപയോഗിക്കാതെ തന്നെ ശബ്ദത്തേക്കാൾ വേഗതയിൽ ദീർഘദൂരം പറക്കാൻ ഈ വിമാനങ്ങൾക്ക് സാധിക്കും.
യുദ്ധമുഖത്ത് പൈലറ്റിന്റെ ജോലിഭാരം കുറയ്ക്കുന്നതിനും തത്സമയ തീരുമാനങ്ങൾ എടുക്കുന്നതിനും സഹായിക്കുന്ന AI സാങ്കേതികവിദ്യ ഇതിന്റെ പ്രത്യേകതയാണ്.
