അബുദാബി : ദുബായ് എമിറേറ്റ്സ് റോഡിലുണ്ടായ വാഹനാപകടത്തിൽ 8 മരണം. പ്രവാസി തൊഴിലാളികൾ സഞ്ചരിച്ചിരുന്ന മിനിബസ് ചരക്കുലോറിയുടെ പിന്നിലേക്ക് ഇടിച്ചുകയറി അപകടമുണ്ടായത്. മരിച്ചവരിൽ 6 പേർ ഇന്ത്യൻ തൊഴിലാളികളാണ്.
ദുബായിലെ ഒരു ടെക്നിക്കൽ സർവീസ്സ് കമ്പനിയിലെ ജീവനക്കാരാണ് അപകടത്തിൽപ്പെട്ടത്. നേപ്പാൾ, ശ്രീലങ്ക സ്വദേശികളാണ് മരിച്ച മറ്റ് രണ്ടുപേർ.
ദുബായ് പൊലീസ് ട്രാഫിക് വിഭാഗം ഡയറക്ടർ ബ്രിഗേഡിയർ ജുമാ സാലം ബിൻ സുവൈദാൻ അറിയിച്ച പ്രാഥമിക വിവരങ്ങൾ അനുസരിച്ച്,
സാങ്കേതിക തകരാറിനെ തുടർന്ന് ഒരു വലിയ ട്രക്ക് എമിറേറ്റ്സ് റോഡിന് നടുവിൽ പെട്ടെന്ന് നിന്നുപോവുകയായിരുന്നു. ഈ സമയം പുറകിൽ വരികയായിരുന്ന മിനിബസ് ഡ്രൈവർക്ക് ആവശ്യത്തിന് ശ്രദ്ധ കേന്ദ്രീകരിക്കാനോ സുരക്ഷിതമായ അകലം പാലിക്കാനോ സാധിച്ചില്ല. ഇതേത്തുടർന്ന് മിനിബസ് അതിശക്തമായി ട്രക്കിന്റെ പുറകിലേക്ക് ഇടിച്ചുകയറുകയായിരുന്നു. ഇടിയുടെ ആഘാതത്തിൽ മിനിബസ് പൂർണ്ണമായും തകർന്നു. എട്ടുപേർ സംഭവസ്ഥലത്ത് വച്ച് തന്നെ മരണപ്പെട്ടു.
മരിച്ച ഇന്ത്യക്കാരിൽ മൂന്ന് പേർ ഹൈദരാബാദ് സ്വദേശികളാണ്.
രണ്ട് പേർ ഉത്തർപ്രദേശ് സ്വദേശികളും ഒരാൾ പഞ്ചാബ് സ്വദേശിയുമാണ്. അപകടത്തിൽ ഒമ്പതോളം പേർക്ക് പരിക്കേറ്റിട്ടുണ്ട്. ഇവരിൽ രണ്ടുപേർ ഇന്ത്യക്കാരാണ്. പരുക്കേറ്റവരിൽ അഞ്ച് പേരുടെ നില അതീവ ഗുരുതരമായി തുടരുകയാണ്. അപകടത്തെക്കുറിച്ച് വിവരമറിഞ്ഞയുടൻ ദുബായിലെ ഇന്ത്യൻ കോൺസുലേറ്റ് അധികൃതർ ആശുപത്രികൾ സന്ദർശിച്ച് പരുക്കേറ്റ ഇന്ത്യക്കാരെ സന്ദർശിക്കുകയും ആവശ്യമായ എല്ലാ സഹായങ്ങളും നൽകുകയും ചെയ്തു വരികയാണ്.
