വേനൽക്കാലത്ത് മാമ്പഴക്കാലം എത്തുമ്പോൾ പ്രമേഹരോഗികൾ പലപ്പോഴും നേരിടുന്ന വലിയൊരു ചോദ്യമുണ്ട്—”എനിക്ക് മാമ്പഴം കഴിക്കാമോ?”. മധുരം അധികമുള്ളതിനാൽ ഭൂരിഭാഗം പേരും മാമ്പഴത്തോട് പൂർണ്ണമായി നോ പറയാറാണ് പതിവ്. എന്നാൽ പ്രമേഹരോഗികൾക്കും മാമ്പഴം കഴിക്കാമെന്നും എന്നാൽ അതിന് കൃത്യമായ ചില നിബന്ധനകളുണ്ടെന്നും വ്യക്തമാക്കുകയാണ് ഇന്ത്യയിലെ പ്രമുഖ ഡയബറ്റോളജിസ്റ്റായ ഡോ. അനൂപ് മിശ്രയുടെ നേതൃത്വത്തിൽ നടത്തിയ പുതിയ പഠനം.
മിതത്വം പ്രധാനം പ്രമേഹമുള്ളവർക്ക് മാമ്പഴം പൂർണ്ണമായി ഒഴിവാക്കേണ്ടതില്ലെന്നും എന്നാൽ വളരെ നിയന്ത്രിതമായ അളവിൽ ) മാത്രമേ കഴിക്കാവൂ എന്നും ഡോ. അനൂപ് മിശ്ര പറയുന്നു. ഭക്ഷണക്രമത്തിൽ കൃത്യമായ മേൽനോട്ടമുണ്ടെങ്കിൽ മാമ്പഴം ഉൾപ്പെടുത്തുന്നത് രക്തത്തിലെ പഞ്ചസാരയുടെ അളവ് പെട്ടെന്ന് വർദ്ധിപ്പിക്കില്ലെന്നാണ് പഠനങ്ങൾ വ്യക്തമാക്കുന്നത്.
കാർബോഹൈഡ്രേറ്റ് മാറ്റിസ്ഥാപിക്കണം. മാമ്പഴം കഴിക്കുമ്പോൾ ശ്രദ്ധിക്കേണ്ട ഏറ്റവും പ്രധാനപ്പെട്ട കാര്യം ഇതാണ്, നിങ്ങൾ മാമ്പഴം കഴിക്കുന്ന ദിവസം, അതിലടങ്ങിയിരിക്കുന്ന കാർബോഹൈഡ്രേറ്റിന് (അതായത് മധുരത്തിനും അന്നജത്തിനും) തുല്യമായ മറ്റ് ആഹാരങ്ങൾ ഉദാഹരണത്തിന് ചോറ് അല്ലെങ്കിൽ ചപ്പാത്തി ഭക്ഷണത്തിൽ നിന്ന് കുറയ്ക്കണം.
ലളിതമായി പറഞ്ഞാൽ, സാധാരണ കഴിക്കുന്ന ഭക്ഷണത്തിന്റെ അളവ് കുറച്ചുകൊണ്ട് അതിന് പകരമായി വേണം മാമ്പഴം കഴിക്കാൻ. അല്ലാതെ സാധാരണ കഴിക്കുന്ന ഭക്ഷണത്തോടൊപ്പം അധികമായി മാമ്പഴം കഴിച്ചാൽ അത് രക്തത്തിലെ പഞ്ചസാരയുടെ അളവ് കുത്തനെ കൂട്ടും.
തുടർച്ചയായ നിരീക്ഷണങ്ങളിലൂടെയും പഠനങ്ങളിലൂടെയുമാണ് ഗവേഷകർ ഈ നിഗമനത്തിൽ എത്തിച്ചേർന്നത്. കൃത്യമായ അളവിലും ശരിയായ രീതിയിലും മാമ്പഴം ഭക്ഷണത്തിന്റെ ഭാഗമാക്കുമ്പോൾ പ്രമേഹബാധിതരിൽ അത് ആരോഗ്യപ്രശ്നങ്ങൾ ഉണ്ടാക്കുന്നില്ലെന്ന് കണ്ടെത്താൻ കഴിഞ്ഞിട്ടുണ്ട്.
മാമ്പഴത്തിൽ ശരീരത്തിന് ആവശ്യമായ വിറ്റാമിനുകളും നാരുകളും അടങ്ങിയിട്ടുള്ളതിനാൽ, നിയന്ത്രിതമായി കഴിക്കുന്നത് വഴി ഈ പോഷകങ്ങൾ ശരീരത്തിന് ലഭിക്കുകയും ചെയ്യും.
ഒരു ദിവസം എത്രത്തോളം മാമ്പഴം കഴിക്കാം എന്നത് നിങ്ങളുടെ നിലവിലെ ഷുഗർ ലെവൽ അനുസരിച്ച് ഡോക്ടറുടെയോ ഡയറ്റീഷ്യന്റെയോ നിർദ്ദേശപ്രകാരം മാത്രം തീരുമാനിക്കുക. മാമ്പഴം കഴിക്കുന്ന ദിവസം മറ്റ് പ്രധാന ഭക്ഷണങ്ങളിലെ കാർബോഹൈഡ്രേറ്റിന്റെ അളവ് കുറയ്ക്കുക.
മാമ്പഴം കഴിച്ചതിന് ശേഷം രക്തത്തിലെ പഞ്ചസാരയുടെ അളവ് കൂടുന്നുണ്ടോ എന്ന് ഗ്ലൂക്കോമീറ്റർ ഉപയോഗിച്ച് പരിശോധിക്കുന്നത് നന്നായിരിക്കും. ചുരുക്കത്തിൽ, പ്രമേഹ രോഗികൾക്ക് മാമ്പഴം ഒരു ‘വിലക്കപ്പെട്ട കനി’ അല്ല. എന്നാൽ വിവേകത്തോടെയും മിതത്വത്തോടെയും കഴിച്ചാൽ മാത്രമേ പ്രമേഹം നിയന്ത്രണവിധേയമായി മുന്നോട്ട് കൊണ്ടുപോകാൻ സാധിക്കൂ എന്ന് ഡോക്ടർമാർ ഓർമ്മിപ്പിക്കുന്നു.
