മുംബൈ : ഉദ്ധവ് താക്കറെയുടെ നേതൃത്വത്തിലുള്ള ശിവസേന യുബിടി പിളർപ്പിലേക്ക് നീങ്ങുന്നതായി റിപ്പോർട്ടുകൾ പുറത്ത് വന്നതിന് പിന്നാലെ എംപിമാരുടെ അടിയന്തര യോഗം വിളിച്ച് ഉദ്ധവ് താക്കറെ. പാർട്ടിയിലെ 9 ലോക്സഭാ എംപിമാരിൽ 6 മുതൽ 7 പേർ വരെ ഭരണപക്ഷത്തുള്ള മുഖ്യമന്ത്രി ഏകനാഥ് ഷിൻഡെയുടെ ശിവസേന പക്ഷത്തേക്ക് ചേക്കേറാൻ ഒരുങ്ങുന്നു എന്ന അഭ്യൂഹങ്ങൾ ശക്തമായിരിക്കുന്ന സാഹചര്യത്തിലാണ് ഈ നീക്കം.
ശിവസേനയുടെ ഔദ്യോഗിക ചിഹ്നമായ ‘കടുവ’യെ മുൻനിർത്തിയാണ് ഷിൻഡെ വിഭാഗം ഈ നീക്കത്തിന് ‘ഓപ്പറേഷൻ ടൈഗർ’ എന്ന് പേരിട്ടിരിക്കുന്നത്. പൂനെ ഉൾപ്പെടെയുള്ള നഗരങ്ങളിൽ “ഓപ്പറേഷൻ ടൈഗർ – ജസ്റ്റ് വെയ്റ്റ് ആൻഡ് വാച്ച്” എന്ന പേരിലുള്ള പോസ്റ്ററുകൾ പ്രത്യക്ഷപ്പെട്ടത് താക്കറെ ക്യാമ്പിൽ വലിയ ആശങ്ക പരത്തിയിട്ടുണ്ട്. നിലവിൽ 6 മുതൽ 7 എംപിമാർ വരെ ഷിൻഡെ പക്ഷവുമായി ദില്ലിയിലെ ഹോട്ടലിൽ വെച്ച് ചർച്ചകൾ നടത്തിയതായാണ് വിവരം. ഇവർ ലോക്സഭാ സ്പീക്കർ ഓം ബിർളയെ കണ്ട് പ്രത്യേക ഗ്രൂപ്പായി അംഗീകരിക്കാൻ കത്ത് നൽകിയേക്കുമെന്നും സൂചനയുണ്ട്.
വിമത എംപിമാരുടെ നീക്കത്തെ കുറിച്ചുള്ള റിപ്പോർട്ടുകൾ പുറത്തുവന്നതിന് പിന്നാലെ അതിനെ പ്രതിരോധിക്കാൻ ഉദ്ധവ് പക്ഷത്തെ ചീഫ് വിപ്പ് അരവിന്ദ് സാവന്ത് സ്പീക്കർക്ക് അടിയന്തരമായി കത്തയച്ചു. ഭരണഘടനയുടെ പത്താം ഷെഡ്യൂൾ അനുസരിച്ച് പാർട്ടിയിലെ ഇത്തരം വിമത ഗ്രൂപ്പുകളെ പ്രത്യേക വിഭാഗമായി അംഗീകരിക്കരുതെന്നും അയോഗ്യരാക്കണമെന്നുമാണ് ഉദ്ധവ് പക്ഷത്തിന്റെ ആവശ്യം. വരുന്ന ജൂൺ 22-ന് മഹാരാഷ്ട്ര നിയമസഭയുടെ മൺസൂൺ സെഷൻ ആരംഭിക്കാനിരിക്കെ, എംഎൽഎമാരുടെയും എംഎൽസിമാരുടെയും അടിയന്തര യോഗവും ഉദ്ധവ് താക്കറെ വിളിച്ചിട്ടുണ്ട്. 2022-ൽ ഏകനാഥ് ഷിൻഡെയുടെ നേതൃത്വത്തിൽ നടന്ന സമാനമായ പിളർപ്പിലൂടെയാണ് ഉദ്ധവ് താക്കറെയ്ക്ക് മഹാരാഷ്ട്ര മുഖ്യമന്ത്രി പദം നഷ്ടമായത്. അതിനു സമാനമായ ഒരു രാഷ്ട്രീയ ഭൂകമ്പത്തിനാണ് ഇപ്പോൾ ദില്ലിയിലും മുംബൈയിലുമായി വീണ്ടും കളമൊരുങ്ങുന്നത്.
