അബുദാബി : യുഎഇയിലെ പ്രവാസികൾക്ക് വലിയ സാമ്പത്തിക ആശ്വാസമേകി പലിശ കുറഞ്ഞ വായ്പകളുടെ ആകർഷകമായ ഓഫറുകൾ പ്രഖ്യാപിച്ച് രാജ്യത്തെ പ്രമുഖ ബാങ്കുകൾ . പുതിയ കാർ വാങ്ങാനും, സ്വന്തമായി വീട് എന്ന സ്വപ്നം യാഥാർത്ഥ്യമാക്കാനും അല്ലെങ്കിൽ അടിയന്തിര വ്യക്തിഗത ആവശ്യങ്ങൾ നിറവേറ്റാനുമുള്ള മികച്ച വായ്പ പദ്ധതികളാണ് വിപണിയിലെ മത്സരം കടുപ്പിച്ചുകൊണ്ട് ബാങ്കുകൾ അവതരിപ്പിച്ചിരിക്കുന്നത്. പശ്ചിമേഷ്യൻ യുദ്ധസാഹചര്യങ്ങളെത്തുടർന്ന് തളർച്ചയിലായ ആഭ്യന്തര സാമ്പത്തിക രംഗത്തെ ഉണർത്താൻ ലക്ഷ്യമിട്ടാണ് യുഎഇയിലെ ബാങ്കുകൾ വായ്പകളുടെ പലിശ നിരക്ക് കഴിഞ്ഞ അഞ്ച് വർഷത്തെ ഏറ്റവും താഴ്ന്ന നിലയിലേക്ക് കുറച്ചിരിക്കുന്നത്. സ്വദേശികൾക്കും പ്രവാസികൾക്കും ഒരേപോലെ ആശ്വാസമേകുന്നതാണ് ബാങ്കുകളുടെ ഈ പുതിയ പദ്ധതി.
എമിറേറ്റ്‌സ് എൻബിഡി, എഫ്എബി, എഡിസിബി , ആർഎകെ ബാങ്ക് (RAKBANK) തുടങ്ങിയ മുൻനിര ബാങ്കുകളെല്ലാം പ്രവാസികൾക്കായി പ്രത്യേക ആനുകൂല്യങ്ങൾ പ്രഖ്യാപിച്ചിട്ടുണ്ട്. വിപണിയിലെ നിലവിലെ നിരക്കുകൾ പ്രകാരം പ്രവാസികൾക്കുള്ള വ്യക്തിഗത വായ്പകളുടെ പലിശ നിരക്കിൽ വലിയ ഇളവുകളാണ് ബാങ്കുകൾ നൽകുന്നത്. ബാങ്ക് അനുസരിച്ച് വാർഷിക പലിശ നിരക്കുകൾ ഫ്ലാറ്റ് റേറ്റിൽ 2.99% (റീഡ്യൂസിങ് നിരക്കിൽ ഏകദേശം 4.5% മുതൽ 5.99% വരെ) എന്ന ആകർഷകമായ നിലവാരത്തിലാണ് ആരംഭിക്കുന്നത്. യോഗ്യതയനുസരിച്ച് പ്രവാസികൾക്ക് 20 ലക്ഷം ദിർഹം മുതൽ 30 ലക്ഷം ദിർഹം വരെ വ്യക്തിഗത വായ്പയായി ലഭിക്കും. പരമാവധി 48 മാസം (4 വർഷം) വരെയാണ് തിരിച്ചടവ് കാലാവധി അനുവദിക്കുന്നത്.
വായ്പ തുക അക്കൗണ്ടിലെത്തി ആദ്യത്തെ 45 ദിവസം മുതൽ ചില ബാങ്കുകളിൽ 90 ദിവസം വരെ ഇൻസ്റ്റാൾമെന്റ് അടയ്ക്കുന്നതിൽ ഇളവ് ലഭിക്കും. വർഷത്തിൽ രണ്ട് തവണ വരെ ഇഎംഐ മാറ്റിവെക്കാനുള്ള സൗകര്യവും ചില ബാങ്കുകൾ നൽകുന്നുണ്ട്. അപേക്ഷകന് കുറഞ്ഞത് 21 വയസ്സ് പ്രായമുണ്ടായിരിക്കണം. വായ്പ കാലാവധി പൂർത്തിയാകുമ്പോൾ പ്രായം 60 വയസ്സ് കവിയരുത്. കുറഞ്ഞ പ്രതിമാസ ശമ്പളം ബാങ്ക് അനുസരിച്ച് 5,000 ദിർഹം മുതൽ 10,000 ദിർഹം വരെയായി നിശ്ചയിച്ചിട്ടുണ്ട്. കൂടാതെ നല്ലൊരു ക്രെഡിറ്റ് സ്കോറും (AECB Score 540-ന് മുകളിൽ) ഉണ്ടായിരിക്കണം.
