2026 ഫിഫ ലോകകപ്പിൽ ഒരിക്കൽ കൂടി മെസ്സി മാജിക്! ഗ്രൂപ്പ് ഘട്ടത്തിലെ രണ്ടാം മത്സരത്തിൽ ഓസ്ട്രിയക്കെതിരെ ഇരട്ട ഗോളുകളുമായി തിളങ്ങിയ ലയണൽ മെസ്സി അർജന്റീനയ്ക്ക് തകർപ്പൻ വിജയവും ഒപ്പം ചരിത്ര നേട്ടവും സമ്മാനിച്ചു. 38-ാം വയസ്സിലും കളിക്കളത്തിൽ അത്ഭുതങ്ങൾ സൃഷ്ടിക്കുന്ന മെസി മനുഷ്യൻ തന്നെ ആണോ എന്നാണ് ആരാധകർ ചോദിക്കുന്നത്.
അമേരിക്കയിലെ എ.ടി ആൻഡ് ടി സ്റ്റേഡിയത്തിൽ നടന്ന ആവേശകരമായ മത്സരത്തിൽ ഓസ്ട്രിയയെ എതിരില്ലാത്ത രണ്ട് ഗോളുകൾക്കാണ് അർജന്റീന പരാജയപ്പെടുത്തിയത്. മത്സരത്തിന്റെ 39-ാം മിനിറ്റിൽ ആദ്യ ഗോൾ നേടിയ നായകൻ ലയണൽ മെസ്സി, ഇഞ്ചുറി ടൈമിന്റെ അഞ്ചാം മിനിറ്റിൽ (90+5′) തന്റെ രണ്ടാമത്തെ ഗോളും വലയിലെത്തിച്ച് ടീമിന്റെ വിജയം ഉറപ്പിച്ചു.
ഈ ഇരട്ട ഗോളുകളോടെ ഫിഫ ലോകകപ്പിന്റെ ചരിത്രത്തിൽ തുടർച്ചയായ മൂന്ന് മത്സരങ്ങളിൽ രണ്ട് അല്ലെങ്കിൽ അതിലധികം ഗോളുകൾ നേടുന്ന ലോകത്തിലെ മൂന്നാമത്തെ മാത്രം താരം എന്ന അപൂർവ്വ റെക്കോർഡ് മെസ്സി സ്വന്തമാക്കി. ഓസ്ട്രിയക്കെതിരെയുള്ള മത്സരത്തിന് മുൻപ്, 2026 ലോകകപ്പിലെ അർജന്റീനയുടെ ആദ്യ മത്സരത്തിൽ അൾജീരിയക്കെതിരെ മെസ്സി ഹാട്രിക് നേടിയിരുന്നു. അതിനും മുൻപ് കളിച്ച 2022 ലോകകപ്പ് ഫൈനലിൽ ഫ്രാൻസിനെതിരെ ലുസൈൽ സ്റ്റേഡിയത്തിൽ മെസ്സി ഇരട്ട ഗോളുകളും സ്വന്തമാക്കിയിരുന്നു. ഇതാണ് തുടർച്ചയായ 3 മത്സരങ്ങളിലെ മൾട്ടിപ്പിൾ ഗോൾ റെക്കോർഡിലേക്ക് മെസ്സിയെ എത്തിച്ചത്.
ലോകകപ്പ് ചരിത്രത്തിൽ ഈ നേട്ടം കൈവരിച്ച മറ്റ് രണ്ട് താരങ്ങൾ ഇവരാണ്:
*ഗില്ലെർമോ സ്റ്റാബിലി (അർജന്റീന – 1930): കന്നി ലോകകപ്പിൽ മെക്സിക്കോയ്ക്കെതിരെ ഹാട്രിക്കും, തുടർന്ന് ചിലി, യു.എസ്.എ എന്നിവർക്കെതിരെ ഇരട്ട ഗോളുകളും നേടി.
*സാൻഡോർ കോക്സിസ് (ഹംഗറി – 1954): ദക്ഷിണ കൊറിയക്കെതിരെ ഹാട്രിക്, പശ്ചിമ ജർമ്മനിക്കെതിരെ 4 ഗോളുകൾ, ക്വാർട്ടറിൽ ബ്രസീലിനെതിരെയും സെമിയിൽ ഉറുഗ്വേക്കെതിരെയും ഇരട്ട ഗോളുകൾ. തുടർച്ചയായി 4 മത്സരങ്ങളിൽ ഈ നേട്ടം കൈവരിച്ച ഏക താരവും കോക്സിസ് ആണ്.
1954-ൽ കോക്സിസ് ഈ റെക്കോർഡ് ഇട്ടതിന് ശേഷം കഴിഞ്ഞ 72 വർഷമായി മറ്റൊരു കളിക്കാരനും ഈ നേട്ടത്തിനടുത്തെത്തിയിരുന്നില്ല. ആ കാത്തിരിപ്പാണ് 2026 ജൂൺ 22-ന് മെസ്സി അവസാനിപ്പിച്ചത്. നടപ്പ് ലോകകപ്പിലെ ആദ്യ രണ്ട് മത്സരങ്ങളിൽ നിന്ന് മാത്രം മെസ്സിക്ക് ഇപ്പോൾ 5 ഗോളുകളായി. നിലവിൽ ടൂർണമെന്റിൽ ഏറ്റവും കൂടുതൽ ഗോൾ നേടിയതും മെസ്സിയാണ്. ഒരു ലോകകപ്പ് പതിപ്പിന്റെ ആദ്യ രണ്ട് മത്സരങ്ങളിൽ നിന്ന് 5 അല്ലെങ്കിൽ അതിലധികം ഗോളുകൾ നേടുന്ന ചരിത്രത്തിലെ നാലാമത്തെ മാത്രം താരമാണ് മെസ്സി.
