ലോകകപ്പ് ഗ്രൂപ്പ് ഘട്ടത്തിലെ രണ്ടാം മത്സരത്തിൽ ഉസ്ബെക്കിസ്ഥാനെ എതിരില്ലാത്ത അഞ്ച് ഗോളുകൾക്ക് തകർത്ത് പോർച്ചുഗൽ അജയ്യത പ്രഖ്യാപിച്ചതിന് പിന്നാലെ, മാധ്യമപ്രവർത്തകരുടെ ചോദ്യങ്ങൾക്ക് മുന്നിൽ തൻ്റെ പതിവ് ശൈലിയിൽ മാസ്സ് മറുപടിയുമായി ക്രിസ്റ്റ്യാനോ റൊണാൾഡോ. മത്സരത്തിൽ ഇരട്ട ഗോളുകളോടെ ഫോമിലേക്ക് തിരിച്ചെത്തിയ റൊണാൾഡോ, ലയണൽ മെസ്സിയുമായുള്ള താരതമ്യങ്ങളെക്കുറിച്ചുള്ള ചോദ്യങ്ങളിൽ നിന്നും കടുത്ത അതൃപ്തിയോടെയാണ് ഒഴിഞ്ഞുമാറിയത്.
ഗ്രൂപ്പിലെ ആദ്യ മത്സരം ഗോൾരഹിത സമനിലയിൽ പിരിഞ്ഞതോടെ കടുത്ത വിമർശനങ്ങളാണ് 41-കാരനായ റൊണാൾഡോ നേരിട്ടിരുന്നത്. എന്നാൽ രണ്ടാം മത്സരത്തിൽ ഉസ്ബെക്കിസ്ഥാനെ തരിപ്പണമാക്കിക്കൊണ്ട് പോർച്ചുഗൽ നായകൻ രണ്ട് ഗോളുകൾ അടിച്ചുകൂട്ടി. മത്സരശേഷം മിക്സഡ് സോണിൽ മാധ്യമങ്ങളെ കണ്ടപ്പോൾ കഴിഞ്ഞ ആഴ്ചകൾ തനിക്ക് എത്രത്തോളം പ്രയാസമേറിയതായിരുന്നു എന്ന് റൊണാൾഡോ തുറന്നുപറഞ്ഞു:
“കഴിഞ്ഞ ഒരാഴ്ച എനിക്ക് വല്ലാത്തൊരു ഇരുണ്ട കാലഘട്ടമായിരുന്നു. ഞാൻ ഫുട്ബോൾ തന്നെ ഉപേക്ഷിച്ചു എന്ന രീതിയിലായിരുന്നു ആളുകളുടെ സംസാരം. എന്നാൽ പോർച്ചുഗൽ ശക്തമായി തന്നെ തിരിച്ചെത്തിയിരിക്കുന്നു.” അദ്ദേഹം പറഞ്ഞു. കരിയറിന്റെ അവസാന ഘട്ടത്തിലും വാർത്തകളിൽ നിറഞ്ഞുനിൽക്കുന്നത് മെസ്സി-റൊണാൾഡോ പോരാട്ടം തന്നെയാണ്. ആദ്യ രണ്ട് മത്സരങ്ങളിൽ നിന്ന് 5 ഗോളുകളുമായി മെസ്സി ലോകകപ്പ് ടോപ്പ് സ്കോറർ പട്ടികയിൽ മുന്നിൽ നിൽക്കുമ്പോഴാണ് റൊണാൾഡോ തന്റെ രണ്ടാം മത്സരത്തിൽ ഇരട്ട ഗോൾ നേടുന്നത്. ഇതോടെ ഇരുവരെയും കുറിച്ചുള്ള ചോദ്യങ്ങളുമായി മാധ്യമപ്രവർത്തകർ റൊണാൾഡോയെ വളഞ്ഞു.
ലയണൽ മെസ്സിയെയും കിലിയൻ എംബാപ്പെയെയും കുറിച്ച് ഒരു റിപ്പോർട്ടർ ചോദ്യം ആരംഭിച്ച്, “ഇന്നലെ ലയണൽ മെസ്സി രണ്ട് ഗോളുകൾ നേടി, എംബാപ്പെ…” എന്ന് പറഞ്ഞയുടൻ റൊണാൾഡോ കടുത്ത അതൃപ്തിയോടെ മുഖം തിരിക്കുകയായിരുന്നു. ചോദ്യം പൂർത്തിയാക്കാൻ പോലും അനുവദിക്കാതെ തൊട്ടടുത്ത് നിന്ന മറ്റൊരു റിപ്പോർട്ടറോട് ചോദ്യം തുടരാൻ ആവശ്യപ്പെടുന്ന റൊണാൾഡോയുടെ വീഡിയോ നിലവിൽ സോഷ്യൽ മീഡിയയിൽ വൈറലാണ്.
മറ്റൊരു റിപ്പോർട്ടർ ചോദ്യം ചോദിക്കാൻ അനുവാദം ചോദിച്ചപ്പോൾ ചിരിച്ചുകൊണ്ടായിരുന്നു റൊണാൾഡോയുടെ പ്രതികരണം. “അത് നീ ചോദിക്കുന്ന ചോദ്യത്തെ ആശ്രയിച്ചിരിക്കും, ചോദ്യം കൊള്ളില്ലെങ്കിൽ ഞാൻ ഉത്തരം പറയില്ല” എന്ന് റൊണാൾഡോ തമാശയായി പറഞ്ഞു. ടൂർണമെന്റിന്റെ അടുത്ത ഘട്ടങ്ങളിൽ മെസ്സിയുടെ അർജന്റീനയുമായി ഒരു മത്സരം പ്രതീക്ഷിക്കുന്നുണ്ടോ എന്ന ചോദ്യത്തിന് റൊണാൾഡോയുടെ മറുപടി ഇങ്ങനെയായിരുന്നു: “അതിന് എങ്ങനെ ഉത്തരം നൽകണമെന്ന് എനിക്കറിയില്ല. നിലവിൽ വലിയ അർത്ഥമില്ലാത്ത ഒരു ചോദ്യമാണത്. പക്ഷേ, അങ്ങനെ സംഭവിക്കുകയാണെങ്കിൽ അത് തികച്ചും ‘ടോപ്പ്’ ആയിരിക്കും.”
തുടർന്ന് മിക്സഡ് സോണിൽ നിന്ന് മടങ്ങാൻ നേരം വീണ്ടും മെസ്സിയെക്കുറിച്ച് ചോദിച്ച റിപ്പോർട്ടറോട് താരം പരസ്യമായി തന്നെ അതൃപ്തി പ്രകടിപ്പിച്ചു. നിലവിൽ കളിച്ച രണ്ട് മത്സരങ്ങളിൽ നിന്ന് 4 പോയിന്റുള്ള പോർച്ചുഗൽ റൗണ്ട് ഓഫ് 32 യോഗ്യത ഇതുവരെ പൂർണ്ണമായി ഉറപ്പിച്ചിട്ടില്ല. എന്നാൽ ലയണൽ മെസ്സിയുടെ അർജന്റീന ഇതിനോടകം തന്നെ അടുത്ത ഘട്ടത്തിലേക്ക് യോഗ്യത നേടിക്കഴിഞ്ഞു.
