ന്യൂഡൽഹി : തൃണമൂൽ കോൺഗ്രസിന്റെ ഔദ്യോഗിക പേരും ‘ഇരട്ടപ്പൂവ്’ ചിഹ്നവും സ്വന്തമാക്കാനുള്ള പോരാട്ടം മുറുകുന്നു. പാർട്ടിയുടെ അവകാശവാദത്തെച്ചൊല്ലി മമത ബാനർജി നയിക്കുന്ന ഔദ്യോഗിക വിഭാഗത്തിനും ഋതബ്രത ബാനർജിയുടെ നേതൃത്വത്തിലുള്ള വിമത വിഭാഗത്തിനും കേന്ദ്ര തിരഞ്ഞെടുപ്പ് കമ്മീഷൻ നോട്ടീസ് അയച്ചു. സംഘടനാ തിരഞ്ഞെടുപ്പുകൾ, പാർട്ടിയുടെ ഔദ്യോഗിക പ്രതിനിധികൾ എന്നിവ സംബന്ധിച്ച തർക്കങ്ങളിലാണ് കമ്മീഷൻ ഇരുപക്ഷത്തോടും വിശദീകരണം തേടിയത്. ജൂലൈ 6 തിങ്കളാഴ്ച വൈകുന്നേരം 5.30-നകം ഇരുവിഭാഗവും തങ്ങളുടെ മറുപടി രേഖാമൂലം സമർപ്പിക്കണം.
വ്യാഴാഴ്ച ഉച്ചയ്ക്ക് 12 മണിയോടെ പശ്ചിമ ബംഗാൾ പ്രതിപക്ഷ നേതാവ് ഋതബ്രത ബാനർജിയുടെ നേതൃത്വത്തിലുള്ള പത്തംഗ പ്രതിനിധി സംഘം ന്യൂഡൽഹിയിലെ നിർവ്വചൻ സദനിൽ ചീഫ് ഇലക്ഷൻ കമ്മീഷണർ ജ്ഞാനേഷ് കുമാർ ഉൾപ്പെടുന്ന ഫുൾ ബെഞ്ചിനെ നേരിട്ട് കണ്ടിരുന്നു. തങ്ങളാണ് “യഥാർത്ഥ തൃണമൂൽ” എന്ന് വ്യക്തമാക്കുന്ന രേഖകൾ ഇവർ സമർപ്പിച്ചു. ഇതിന് തൊട്ടുപിന്നാലെയാണ് കമ്മീഷൻ ഇരുപക്ഷത്തിനും അടിയന്തര നോട്ടീസ് അയച്ചത്. നിയമസഭാ തിരഞ്ഞെടുപ്പിലെ കനത്ത പരാജയത്തിന് പിന്നാലെ തൃണമൂലിന്റെ 80 എംഎൽഎമാരിൽ 58 പേരും ഋതബ്രത ബാനർജിക്കൊപ്പം ചേർന്നതോടെയാണ് പാർട്ടിയിൽ അഭ്യന്തര തകർച്ച തുടങ്ങിയത്. ഇപ്പോൾ വിമതരെ പിന്തുണയ്ക്കുന്ന എംഎൽഎമാരുടെ എണ്ണം 64 ആയി ഉയർന്നിട്ടുണ്ട്.
അതേസമയം, വിമതരെ തിരഞ്ഞെടുപ്പ് കമ്മീഷൻ നേരിട്ട് ചർച്ചയ്ക്ക് വിളിച്ചതിനെതിരെ മമത ബാനർജി പക്ഷം ശക്തമായി രംഗത്തെത്തി. പാർട്ടിയിൽ നിന്ന് പുറത്താക്കപ്പെട്ട ഒരു വിഭാഗത്തിന് എങ്ങനെയാണ് കമ്മീഷൻ അവസരം നൽകുകയെന്ന് ടിഎംസി എംപി സാഗരിക ഘോഷ് ചോദിച്ചു.
തൃണമൂൽ കോൺഗ്രസ് എന്ന പാർട്ടിക്ക് മമത ബാനർജിയില്ലാതെ നിലനിൽപ്പില്ലെന്ന് പാർട്ടി വക്താവ് കുനാൽ ഘോഷും സൂചിപ്പിച്ചു. ശിവസേന, എൻസിപി തർക്കങ്ങളിൽ കമ്മീഷൻ സ്വീകരിച്ചത് പോലെ ജനപ്രതിനിധികളുടെ ഭൂരിപക്ഷം അടിസ്ഥാനമാക്കിയാകും ഈ കേസിലും കമ്മീഷൻ അന്തിമ തീരുമാനമെടുക്കുക. ജൂലൈ 6-ലെ മറുപടികൾക്ക് ശേഷം കമ്മീഷൻ ഈ വിഷയത്തിൽ വിശദമായ വാദം കേൾക്കും.
