ലോകമെമ്പാടുമുള്ള ഫിറ്റ്നസ് പ്രേമികളുടെയും സെലിബ്രിറ്റികളുടെയും പ്രിയപ്പെട്ട പാനീയമായ മാച്ചാ ടീ ഇനി ഇന്ത്യയിലും വ്യാവസായിക അടിസ്ഥാനത്തിൽ ഉത്പാദിപ്പിക്കും. അസമിലെ തപാലിലുള്ള ടിൻസുകിയ ജില്ലയിലെ ചോട്ടാ തിങ്ക്രായ് ടീ എസ്റ്റേറ്റ് ആണ് ഇന്ത്യയിലാദ്യമായി മാച്ചാ ചായ വിജയകരമായി ഉത്പാദിപ്പിച്ച് വിപണിയിലെത്തിച്ചത്.
അസം മുഖ്യമന്ത്രി ഹിമന്ത ബിശ്വ ശർമ്മയാണ് ഈ ചരിത്ര നേട്ടം സോഷ്യൽ മീഡിയയിലൂടെ പങ്കുവെച്ചത്. ഇന്ത്യ-ജപ്പാൻ ബന്ധത്തിന്റെ പത്തു വർഷത്തെ കൂട്ടായ്മയിലൂടെയാണ് ഈ വലിയ സ്വപ്നം യാഥാർത്ഥ്യമായത്. ജപ്പാനിൽ നിന്നുള്ള വിദഗ്ദ്ധരുടെ സഹായത്തോടെ പൂർണ്ണമായും ഓട്ടോമേറ്റഡ് ആയ അത്യാധുനിക ഫാക്ടറി ഇതിനായി അസമിൽ സജ്ജീകരിച്ചിട്ടുണ്ട്. അസമിൽ ഉത്പാദിപ്പിച്ച ആദ്യ ബാച്ച് മാച്ചാ ചായ ഗുവാഹത്തി ടീ ഓക്ഷൻ സെന്ററിൽ കിലോഗ്രാമിന് 3,000 രൂപയ്ക്കാണ് ലേലം ചെയ്തത്.
ശക്തമായ ബ്ലാക്ക് ടീക്ക് പേരുകേട്ട അസം, പ്രീമിയം ഗ്രീൻ ടീ വിഭാഗത്തിലേക്ക് ചുവടുവെക്കുന്നത് ആഗോള വിപണിയിൽ ഇന്ത്യൻ ചായയുടെ മൂല്യം വർദ്ധിപ്പിക്കും.
എന്താണ് മാച്ചാ ടീ ?
സാധാരണ ഗ്രീൻ ടീയിൽ നിന്നും തികച്ചും വ്യത്യസ്തമാണ് മാച്ചാ ടീ. ഇത് ‘കാമെലിയ സിനെൻസിസ്’ എന്ന ചെടിയിൽ നിന്നാണ് ഉണ്ടാക്കുന്നതെങ്കിലും ഇതിന്റെ കൃഷിരീതി പ്രത്യേകതയുള്ളതാണ്.
വിളവെടുക്കുന്നതിന് ഏതാനും ആഴ്ചകൾക്ക് മുമ്പ് ചായച്ചെടികൾ പൂർണ്ണമായും തണൽ വിരിച്ച് മൂടുന്നു. ഇത് ഇലകളിൽ കൂടുതൽ ‘ക്ലോറോഫിൽ’ ഉത്പാദിപ്പിക്കാൻ സഹായിക്കും. അതുകൊണ്ടാണ് മാച്ചാ ചായയ്ക്ക് ഇത്രയും തിളക്കമുള്ള പച്ചനിറം ലഭിക്കുന്നത്.
സാധാരണ ഗ്രീൻ ടീ ഇലകൾ വെള്ളത്തിലിട്ട് തിളപ്പിച്ച ശേഷം ഇലകൾ അരിച്ചുകളയുകയാണ് പതിവ്. എന്നാൽ മാച്ചാ ടീയിൽ, തണലിൽ വളർത്തിയ പ്രത്യേക ഇലകൾ ഉണക്കി നല്ലതുപോലെ പൊടിച്ചെടുക്കുന്നു. ഈ പൊടി നേരിട്ട് വെള്ളത്തിലോ പാലിലോ കലക്കിയാണ് കുടിക്കുന്നത്. അതുകൊണ്ട് തന്നെ ഇലയുടെ ഗുണങ്ങൾ പൂർണ്ണമായും ശരീരത്തിന് ലഭിക്കുന്നു.
മാച്ചാ ചായയുടെ ആരോഗ്യ ഗുണങ്ങൾ
സാധാരണ ഗ്രീൻ ടീയെക്കാൾ 10 മടങ്ങ് ആന്റിഓക്‌സിഡന്റുകൾ മാച്ചാ ചായയിൽ അടങ്ങിയിട്ടുണ്ട്. ഇത് ശരീരത്തിലെ വിഷാംശങ്ങളെ പുറന്തള്ളാനും കോശങ്ങളുടെ ആരോഗ്യം സംരക്ഷിക്കാനും സഹായിക്കും. ഇതിലടങ്ങിയിരിക്കുന്ന L-theanine എന്ന അമിനോ ആസിഡ് തലച്ചോറിനെ ശാന്തമാക്കാനും അതേസമയം കടുത്ത ഏകാഗ്രതയും ഉണർവും നൽകാനും സഹായിക്കുന്നു. കോഫി കുടിക്കുമ്പോൾ ഉണ്ടാകുന്ന അമിതമായ നെഞ്ചിടിപ്പോ ഉത്കണ്ഠയോ ഇതിൽ ഉണ്ടാകില്ല. ശരീരത്തിലെ കൊഴുപ്പ് വേഗത്തിൽ എരിച്ചുകളയാൻ മാച്ചാ ടീ സഹായിക്കുമെന്ന് പഠനങ്ങൾ വ്യക്തമാക്കുന്നു. ഭാരം കുറയ്ക്കാൻ ആഗ്രഹിക്കുന്നവർക്ക് ഇതൊരു മികച്ച ഡയറ്റ് പാനീയമാണ്.
ചീത്ത കൊളസ്ട്രോളിന്റെ അളവ് കുറയ്ക്കാനും രക്തസമ്മർദ്ദം നിയന്ത്രിക്കാനും മാച്ചാ ടീ പതിവായി കുടിക്കുന്നത് നല്ലതാണ്.
സാധാരണ ജാപ്പനീസ് ശൈലിയിൽ മാത്രമല്ല, മാച്ചാ പൊടി അല്പം തൈരും മാമ്പഴവും ചേർത്ത് ‘മാച്ചാ മാംഗോ സ്മൂത്തി’യായോ, ഇഞ്ചി, ഏലയ്ക്ക എന്നിവ ചേർത്ത് ‘മാച്ചാ മസാല ചായ’യായോ നമുക്ക് നമ്മുടെ ഇഷ്ടത്തിനനുസരിച്ച് കുടിക്കാവുന്നതാണ്!
