കേരളത്തിൽ തെക്കുപടിഞ്ഞാറൻ മൺസൂൺ അതീവ സജീവമായി തുടരുകയാണ്. കഴിഞ്ഞ ദിവസങ്ങളിൽ സംസ്ഥാനത്തുടനീളം പെയ്തിറങ്ങിയ അതിശക്തമായ മഴയ്ക്ക് നേരിയ ശമനമുണ്ടെങ്കിലും വരും ദിവസങ്ങളിലും പരക്കെ മഴയുണ്ടാകുമെന്നാണ് കേന്ദ്ര കാലാവസ്ഥാ വകുപ്പിന്റെ പ്രവചനം. എന്നാൽ കേരളക്കരയെ പ്രളയസമാനമായ അന്തരീക്ഷത്തിലേക്ക് നയിക്കുന്ന ഈ പ്രകൃതി പ്രതിഭാസത്തിന് പിന്നിൽ ആയിരക്കണക്കിന് കിലോമീറ്ററുകൾ അകലെ സമുദ്രത്തിന് മുകളിലൂടെ അതിവേഗത്തിൽ വീശിയടിക്കുന്ന ഒരു അദൃശ്യ കാറ്റാണെന്ന വിചിത്രമായ വിവരമാണ് ഇപ്പോൾ ശാസ്ത്രലോകം പങ്കുവെക്കുന്നത്. ‘സൊമാലി ജെറ്റ്’ (Somali Jet) അഥവാ ലോ-ലെവൽ മൺസൂൺ ജെറ്റ് എന്നറിയപ്പെടുന്ന ഈ നിഗൂഢ പ്രതിഭാസമാണ് കേരളത്തിലെ മഴയുടെ ആക്കം കൂട്ടുന്ന പ്രധാന ചാലകശക്തി.
മൊറീഷ്യസിനും മഡഗാസ്കറിനും സമീപമുള്ള തെക്കൻ സമുദ്രഭാഗങ്ങളിൽ നിന്നാണ് ഈ ഭീമൻ ജെറ്റ് പ്രവാഹം ഉദ്ഭവിക്കുന്നത്. അവിടെനിന്ന് അതിവേഗത്തിൽ വടക്കോട്ട് നീങ്ങുന്ന ഈ കാറ്റ് കിഴക്കൻ ആഫ്രിക്കൻ തീരത്തിന് സമാന്തരമായി സഞ്ചരിച്ച് ഭൂമധ്യരേഖ കടക്കുന്നു. സോമാലിയൻ തീരത്ത് എത്തുമ്പോഴേക്കും ഈ അന്തരീക്ഷ കാറ്റിന്റെ വേഗതയും ശക്തിയും പരമാവധിയിലാകും. തുടർന്നാണ് ഇത് വൻതോതിൽ ഈർപ്പവും നീരാവിയും വഹിച്ചുകൊണ്ട് നേരെ ഇന്ത്യൻ ഉപദ്വീപിലേക്ക്, പ്രത്യേകിച്ച് കേരള തീരത്തേക്ക് തിരിയുന്നത്. അറബിക്കടലിന് മുകളിലൂടെയുള്ള ഈ സഞ്ചാരത്തിനിടയിൽ സമുദ്രത്തിലെ വൻതോതിലുള്ള ഈർപ്പത്തെ മുഴുവൻ ആവാഹിച്ചെടുത്ത് കൊണ്ടുവന്ന് കേരളത്തിലെ മലനിരകളിൽ തട്ടിച്ച് പെയ്യിക്കുകയാണ് ഈ സോമാലി ജെറ്റ് ചെയ്യുന്നത്.
സാധാരണ കാലവർഷ കാറ്റിന്റെ ഇരട്ടി വേഗതയിലാണ് ഇപ്പോൾ കേരള തീരത്ത് കാറ്റ് വീശിയടിക്കുന്നത്. ഇതിന് പ്രധാന കാരണം സോമാലി ജെറ്റ് സ്ട്രീമിന്റെ അസാധാരണമായ ശക്തിയാണെന്ന് കേരള സർവകലാശാല പരിസ്ഥിതി ശാസ്ത്രവിഭാഗം ഉൾപ്പെടെയുള്ള ഗവേഷകർ വിലയിരുത്തുന്നു. ഇന്ത്യൻ മഹാസമുദ്രത്തിലെയും ഉത്തരേന്ത്യയിലെയും ഉപരിതല താപനിലയിലുണ്ടായ വലിയ വ്യത്യാസം, ലക്ഷദ്വീപിന് മുകളിലെ ചക്രവാതച്ചുഴി, അറബിക്കടലിലെ ഉയർന്ന താപനില എന്നിവയെല്ലാം ചേർന്ന് ഈ മഴക്കാറ്റിന്റെ തീവ്രത ഇരട്ടിയാക്കിയിരിക്കുകയാണ്. വരും ദിവസങ്ങളിലും ഈ സൊമാലി ജെറ്റ് ശക്തമായി തുടരുമെന്നാണ് ഉപഗ്രഹ ചിത്രങ്ങൾ നൽകുന്ന സൂചന. കനത്ത കാറ്റും കടൽക്ഷോഭവും ഉണ്ടാകാൻ സാധ്യതയുള്ളതിനാൽ മത്സ്യബന്ധന തൊഴിലാളികൾക്കും തീരദേശവാസികൾക്കും കടുത്ത ജാഗ്രതാ നിർദ്ദേശമാണ് അധികൃതർ നൽകിയിട്ടുള്ളത്. സമുദ്രത്തിനടിയിലെയും അന്തരീക്ഷത്തിലെയും ഈ അസാധാരണ മാറ്റങ്ങളെ അതീവ ഉത്കണ്ഠയോടെയാണ് കാലാവസ്ഥാ നിരീക്ഷകർ വീക്ഷിക്കുന്നത്.
