സംസ്ഥാനത്തെ സ്വകാര്യ ബസുകൾക്ക് ടിക്കറ്റ് ഇതര വരുമാനം കണ്ടെത്തുന്നതിനായി വൻ ഇളവുകൾ പ്രഖ്യാപിച്ച് ഗതാഗത വകുപ്പ് മന്ത്രി സി.പി. ജോൺ. സ്വകാര്യ ബസുകളുടെ അകത്തും പുറത്തും പരസ്യങ്ങൾ പ്രദർശിപ്പിക്കുന്നതിനുള്ള ഔദ്യോഗിക അനുമതി നൽകുന്നതായി മന്ത്രി അറിയിച്ചു. നിലവിൽ സ്വകാര്യ ബസ് ഉടമകൾ നേരിടുന്ന വിവിധ പ്രതിസന്ധികൾ പരിഹരിക്കുന്നതിനായി കേരള സർക്കാർ പുതിയ ഗതാഗതനയം ഉടൻ നടപ്പാക്കുമെന്നും മന്ത്രി ഉറപ്പുനൽകി.
സർക്കാരിന്റെ ഈ തീരുമാനത്തെ വലിയ പ്രതീക്ഷയോടെയാണ് സ്വകാര്യ ബസ് ഉടമകളുടെ സംഘടനകൾ സ്വാഗതം ചെയ്തിരിക്കുന്നത്. കെഎസ്ആർടിസി ബസുകളിൽ സ്ത്രീകൾക്കായി ‘പ്രിയദർശിനി’ സൗജന്യ യാത്രാ പദ്ധതി നടപ്പാക്കിയതിനെ തുടർന്ന് സ്വകാര്യ ബസ് മേഖലയ്ക്ക് കനത്ത സാമ്പത്തിക ആഘാതം നേരിട്ടിരുന്നു. ഈ വരുമാന നഷ്ടം മറികടക്കാനും ബസ് സർവീസുകൾ ലാഭകരമാക്കാനുമാണ് ഇപ്പോൾ പരസ്യങ്ങൾ പതിപ്പിക്കാനുള്ള അനുമതി നൽകിയിരിക്കുന്നത്.
പ്രിയദർശിനി പദ്ധതി എന്നത് ഒരു സർക്കാർ പോളിസിയുടെ ഭാഗമായി നടപ്പാക്കിയതാണെന്ന് മന്ത്രി വ്യക്തമാക്കി. എന്നാൽ ഇത് മൂലം സ്വകാര്യ ബസ് നിക്ഷേപകർക്ക് ഉണ്ടായിട്ടുള്ള പ്രായോഗിക ബുദ്ധിമുട്ടുകൾ സർക്കാർ വളരെ സൂക്ഷ്മമായി വിലയിരുത്തുന്നുണ്ട്. ഈ പദ്ധതി ഏതൊക്കെ മേഖലകളെയാണ് ഏറ്റവും കൂടുതൽ ബാധിച്ചതെന്ന് കൃത്യമായി പഠിക്കുന്നതിനായി ബി. പത്മകുമാർ ചെയർമാനായും ഡോ. ശ്രീദേവി വൈസ് ചെയർപേഴ്‌സണായും ഉള്ള ഒരു പ്രത്യേക സമിതിക്ക് രൂപം നൽകിയിട്ടുണ്ട്.
ഈ കമ്മിറ്റി 45 ദിവസത്തിനുള്ളിൽ സർക്കാരിന് വിശദമായ റിപ്പോർട്ട് സമർപ്പിക്കുമെന്നും അതിന്മേൽ തുടർനടപടികൾ ഉണ്ടാകുമെന്നും മന്ത്രി അറിയിച്ചു. പ്രിയദർശിനി പദ്ധതി കാരണം വരുമാന നഷ്ടം സംഭവിച്ച ബസുകൾ ടിക്കറ്റ് ഇതര മാർഗ്ഗങ്ങളിലൂടെ വരുമാനം കണ്ടെത്താൻ ശ്രമിക്കണമെന്ന് മന്ത്രി നേരത്തെ നിർദ്ദേശിച്ചിരുന്നു. ഇതിന് പിന്നാലെയാണ് ഇപ്പോൾ പരസ്യ വരുമാനത്തിനുള്ള വലിയ സാധ്യതയും ബസ് ഉടമകൾക്കായി സർക്കാർ തുറന്നുനൽകുന്നത്. കെഎസ്ആർടിസി ബസുകളിൽ ദീർഘകാലമായി പരസ്യങ്ങൾ പതിപ്പിച്ചു വരുന്നുണ്ടെങ്കിലും, സ്വകാര്യ ബസുകളുടെ പുറത്ത് വിപുലമായ രീതിയിൽ പരസ്യം ചെയ്യാൻ അനുമതി ലഭിക്കുന്നത് ഇതാദ്യമായാണ്.
