ന്യൂഡൽഹി : ദേശീയ ഗാനമായ ജനഗണ മനയ്ക്ക് നിലവിലുള്ള അതേ നിയമസംരക്ഷണം ദേശീയ ഗീതമായ വന്ദേ മാതരത്തിനും ഉറപ്പാക്കുന്ന ദേശീയ ബഹുമാന ലംഘന നിരോധന ഭേദഗതി ബിൽ, 2026 പാർലമെന്റിന്റെ ഇരുസഭകളും പാസാക്കി. കഴിഞ്ഞ ദിവസം രാജ്യസഭ പാസാക്കിയ ബില്ലിന് പ്രതിപക്ഷ ബഹളത്തിനിടയിൽ ശബ്ദവോട്ടോടെയാണ് ലോക്‌സഭയും അംഗീകാരം നൽകിയത്. രാഷ്ട്രപതി ഒപ്പുവെക്കുന്നതോടെ നിയമമായി മാറുന്ന ഈ ഭേദഗതിയനുസരിച്ച് വന്ദേ മാതരം ആലപിക്കുന്നത് തടസ്സപ്പെടുത്തുകയോ മനഃപൂർവ്വം ആദരിക്കാതിരിക്കുകയോ ചെയ്യുന്നവർക്ക് മൂന്ന് വർഷം വരെ തടവോ പിഴയോ അല്ലെങ്കിൽ ഇവ രണ്ടും കൂടിയോ ലഭിക്കും. 1971-ലെ ദേശീയ ബഹുമാന ലംഘന നിരോധന നിയമത്തിൽ ഭേദഗതി വരുത്തിയാണ് വന്ദേ മാതരത്തെയും ഇതിന്റെ പരിധിയിൽ ഉൾപ്പെടുത്തിയത്.
പ്രതിപക്ഷം ഉയർത്തിയ ശക്തമായ പ്രതിഷേധങ്ങൾക്കിടയിലാണ് കേന്ദ്ര ആഭ്യന്തര സഹമന്ത്രി നിത്യാനന്ദ് റായ് സഭയിൽ ബിൽ അവതരിപ്പിച്ചത്. സ്വാതന്ത്ര്യസമര പോരാട്ടങ്ങളിൽ രാജ്യത്തെ ഏകോപിപ്പിച്ച ദേശീയ ഗീതത്തിന് അർഹമായ നിയമസംരക്ഷണം നൽകുന്നത് ഭാരതീയ അഭിമാനത്തിന്റെ ഭാഗമാണെന്നും ഒരു പ്രത്യയശാസ്ത്രത്തിനും സംസ്ഥാനത്തിനും എതിരല്ലെന്നും കേന്ദ്ര സർക്കാർ വ്യക്തമാക്കി. അതേസമയം, വന്ദേ മാതരത്തെ ദേശീയഗാനത്തിന് തുല്യമായ ഭരണഘടനാ പദവിയിൽ ഭരണഘടനാ ശില്പികൾ ഉൾപ്പെടുത്തിയിരുന്നില്ലെന്ന് ചൂണ്ടിക്കാട്ടി സിപിഐഎം, ഡിഎംകെ അടക്കമുള്ള പ്രതിപക്ഷ കക്ഷികൾ ബില്ലിനെതിരെ വിയോജിപ്പ് അറിയിച്ചു. വന്ദേ മാതരത്തിന്റെ നൂറ്റമ്പതാം വാർഷിക ആഘോഷങ്ങളുടെ പശ്ചാത്തലത്തിൽ കൊണ്ടുവന്ന ഈ നിയമനിർമ്മാണം രാഷ്ട്രപതി ഒപ്പുവെക്കുന്നതോടെ രാജ്യത്തുടനീളം പ്രാബല്യത്തിൽ വരും.
