സാൻ ഫ്രാൻസിസ്കോ: നമ്മൾ ദിവസവും ധരിക്കുന്ന ജീൻസിന്റെ വലതുവശത്തെ പ്രധാന പോക്കറ്റിനുള്ളിലായി വളരെ ചെറിയൊരു പോക്കറ്റ് കൂടെ ശ്രദ്ധിച്ചിട്ടില്ലേ? ഇന്ന് പലരും ചില്ലറ പൈസയോ, കീയോ, അല്ലെങ്കിൽ ഇയർബഡ്സോ ഒക്കെ വെക്കാനാണ് ഈ കുഞ്ഞു പോക്കറ്റ് ഉപയോഗിക്കുന്നത്. എന്നാൽ 150 വർഷങ്ങൾക്കുമുമ്പ് ഈ പോക്കറ്റ് ഡിസൈൻ ചെയ്തത് കോയിൻ ഇടാനല്ല എന്നറിയുമ്പോഴാണ് പലരും ഞെട്ടുന്നത്. 19-ാം നൂറ്റാണ്ടിൽ ജോലി ചെയ്തിരുന്ന തൊഴിലാളികളുടെ പോക്കറ്റ് വാച്ചുകൾ (Pocket Watches) കേടുപാടുകൾ കൂടാതെ സുരക്ഷിതമായി സൂക്ഷിക്കാൻ വേണ്ടിയാണ് ഈ കുഞ്ഞി പോക്കറ്റ് നിർമ്മിച്ചത്.
1873-ൽ ലെവി സ്ട്രോസും (Levi Strauss) തയ്യൽക്കാരനായ ജേക്കബ് ഡേവിസും (Jacob Davis) ചേർന്ന് ആദ്യമായി റിവറ്റഡ് ഡെനിം പാന്റുകൾക്ക് (ഇന്നത്തെ ജീൻസ്) പേറ്റന്റ് എടുത്തപ്പോഴാണ് ഈ പ്രത്യേക പോക്കറ്റ് അവതരിപ്പിക്കുന്നത്. അന്നത്തെ കാലത്ത് ഖനി തൊഴിലാളികൾ, കൗബോയ്മാർ, മരപ്പണിക്കാർ, റെയിൽവേ തൊഴിലാളികൾ തുടങ്ങിയവരായിരുന്നു പ്രധാനമായും ഇത്തരം പാന്റുകൾ ഉപയോഗിച്ചിരുന്നത്. ആ കാലഘട്ടത്തിൽ കൈഘടികാരങ്ങൾ (Wristwatches) പ്രചാരത്തിലുണ്ടായിരുന്നില്ല. സമയം അറിയാൻ തൊഴിലാളികൾ ചെയിനിൽ ഘടിപ്പിച്ച പോക്കറ്റ് വാച്ചുകളെയാണ് ആശ്രയിച്ചിരുന്നത്. എന്നാൽ വലിയ പണിനായുധങ്ങളും ആണികളും കല്ലുകളുമൊക്കെ കിടക്കുന്ന പ്രധാന പോക്കറ്റിൽ വാച്ച് വെക്കുമ്പോൾ ഗ്ലാസ് പൊട്ടാനും പോറലുകൾ വീഴാനും സാധ്യതയേറെയായിരുന്നു.
ഈ പ്രശ്നത്തിന് പരിഹാരമായാണ് വലതുവശത്തെ പോക്കറ്റിന് മുകളിലായി വാച്ച് ഉറച്ചുനിൽക്കുന്ന രീതിയിലുള്ള ചെറിയൊരു പോക്കറ്റ് തുന്നിച്ചേർത്തത്. ഇത് വാച്ചിനെ ഇളകാതെ നിർത്തുമായിരുന്നു. പിന്നീട് 20-ാം നൂറ്റാണ്ടിന്റെ മധ്യത്തോടെ റിസ്റ്റ് വാച്ചുകൾ വ്യാപകമായതോടെ ഈ പോക്കറ്റിന്റെ യഥാർത്ഥ ആവശ്യം ഇല്ലാതായി. രണ്ടാം ലോകമഹായുദ്ധ സമയത്ത് ലോഹങ്ങളുടെ ക്ഷാമം വന്നപ്പോൾ ലെവീസ് ഈ പോക്കറ്റിന്റെ മൂലയിലുള്ള റിവറ്റുകൾ ഒഴിവാക്കുക വരെ ചെയ്തിരുന്നു. എങ്കിലും പിന്നീട് ജീൻസുകളുടെ ഒരു പ്രധാന ഡിസൈൻ അടയാളമായി മാറിയ ഈ അഞ്ചാം പോക്കറ്റ് (Fifth Pocket) 150 വർഷങ്ങൾക്കിപ്പുറവും സ്റ്റൈലായി തുടരുകയാണ്.
