ഐഎസ്ആർഒ മുൻ ചെയർമാനും മലയാളിയുമായ എസ്. സോമനാഥിനെ റിസർവ് ബാങ്ക് ഓഫ് ഇന്ത്യയുടെ (ആർബിഐ) സെൻട്രൽ ബോർഡിൽ പാർട്ട്-ടൈം നോൺ ഒഫീഷ്യൽ ഡയറക്ടറായി കേന്ദ്ര സർക്കാർ നിയമിച്ചു. നാല് വർഷത്തേക്കാണ് ഈ സുപ്രധാന നിയമനം. ഏറെക്കാലത്തിന് ശേഷമാണ് ഒരു മലയാളി ആർബിഐയുടെ ഉന്നത ബോർഡിലേക്ക് എത്തുന്നത്. ഒപ്പം പ്രമുഖ വ്യവസായി ആനന്ദ് മഹീന്ദ്രയെ ബോർഡിലെ നോൺ ഒഫീഷ്യൽ ഡയറക്ടറായി 4 വർഷത്തേക്ക് കൂടി കേന്ദ്രം നിലനിർത്തിയിട്ടുണ്ട്. 2022 മുതൽ ആർബിഐ ബോർഡിൽ പ്രവർത്തിച്ചു വരികയാണ് ആനന്ദ് മഹീന്ദ്ര.
രാജ്യത്തെ പരമോന്നത ബാങ്കിംഗ് സ്ഥാപനമായ റിസർവ് ബാങ്കിന്റെ ഭരണനിർവ്വഹണവും പ്രവർത്തനങ്ങളും ഏകോപിപ്പിക്കുന്ന നിർണ്ണായക ചുമതലയാണ് സെൻട്രൽ ബോർഡിനുള്ളത്. ആർബിഐ ഗവർണർ, നാല് ഡെപ്യൂട്ടി ഗവർണർമാർ എന്നിവർക്ക് പുറമെ സാമ്പത്തിക, ശാസ്ത്ര, സാങ്കേതിക, വ്യവസായ മേഖലകളിൽ നിന്നുള്ള 10 പ്രമുഖരെയാണ് കേന്ദ്ര സർക്കാരിന് നോൺ ഒഫീഷ്യൽ ഡയറക്ടർമാരായി നിയമിക്കാൻ സാധിക്കുന്നത്. കേന്ദ്ര ധനകാര്യ മന്ത്രാലയത്തിൽ നിന്നുള്ള രണ്ട് ഔദ്യോഗിക സെക്രട്ടറിമാരും ബോർഡിന്റെ ഭാഗമാണ്.
ഇതിന് പുറമെ മുംബൈ, കൊൽക്കത്ത, ചെന്നൈ, ന്യൂഡൽഹി എന്നിവിടങ്ങളിലെ ആർബിഐ ലോക്കൽ ബോർഡുകളെ പ്രതിനിധീകരിച്ച് നാല് ഡയറക്ടർമാരും സെൻട്രൽ ബോർഡിൽ അംഗങ്ങളായിരിക്കും. ശാസ്ത്ര-ബഹിരാകാശ രംഗത്തെ മികവിന് ശേഷമുള്ള എസ്. സോമനാഥിന്റെ ഈ പുതിയ ചുമതല മലയാളി സമൂഹത്തിന് വലിയ അഭിമാനമായി മാറുകയാണ്.
