ലോസ് ഏഞ്ചലസിൽ ഇസ്‌കോൺ (ISKCON) സംഘടിപ്പിച്ച പ്രശസ്തമായ ജഗന്നാഥ രഥയാത്രയിൽ സർപ്രൈസ് അതിഥിയായി ഹോളിവുഡ് സൂപ്പർതാരം ആർനോൾഡ് ഷ്വാസ്നെഗർ എത്തിയത് ആരാധകരെയും ഭക്തരെയും ഒരുപോലെ അത്ഭുതപ്പെടുത്തി. വെനീസ് ബീച്ചിലൂടെ കടന്നുപോയ വർണ്ണാഭമായ രഥയാത്രയ്ക്കിടെ തികച്ചും സന്തോഷവാനായി പ്രത്യക്ഷപ്പെട്ട ആർനോൾഡ്, വഴിയിൽ തടിച്ചുകൂടിയ ആരാധകർക്കൊപ്പം സൗഹൃദം പങ്കിടുകയും ചിത്രങ്ങൾക്കും സെൽഫികൾക്കും പുഞ്ചിരിയോടെ കൂടെനിൽക്കുകയും ചെയ്തു. 1977 മുതൽ ലോസ് ഏഞ്ചലസിൽ നടന്നുവരുന്ന സാന്താ മോണിക്കയിൽ നിന്ന് വെനീസ് ബീച്ചിലേക്കുള്ള ഈ 50-ാമത് വാർഷിക രഥയാത്രാഘോഷത്തിലെ താരത്തിന്റെ അപ്രതീക്ഷിത സാന്നിധ്യം ചടങ്ങിന് വലിയ പ്രചാരം നൽകുകയും ചിത്രങ്ങൾ സമൂഹമാധ്യമങ്ങളിൽ തരംഗമാവുകയും ചെയ്തു.
ലോകമെമ്പാടുമുള്ള ദശലക്ഷക്കണക്കിന് ആളുകൾ പങ്കെടുക്കുന്ന ഇത്തരം സാങ്കേതിക സാംസ്‌കാരിക സംഗമങ്ങൾക്കിടയിൽ ആർനോൾഡിനെപ്പോലൊരു ആഗോള താരം എത്തിയത് വിദേശികളായ ഭക്തർക്കിടയിലും വലിയ സന്തോഷത്തിന് കാരണമായി. മുൻ കാലിഫോർണിയ ഗവർണർ കൂടിയായ അദ്ദേഹം വളരെ എളിമയോടെ ആളുകളോട് ഇടപഴകുന്നതിന്റെ ചിത്രങ്ങളാണ് തരംഗമാകുന്നത്. നെറ്റ്ഫ്ലിക്സ് പുറത്തിറക്കിയ അദ്ദേഹത്തിന്റെ ആക്ഷൻ കോമഡി പരമ്പരയായ ‘ഫൂബാർ’ (Fubar) രണ്ടാം സീസണിന് ശേഷം റദ്ദാക്കിയെന്ന വിവരം കഴിഞ്ഞ ദിവസങ്ങളിൽ പുറത്തുവന്നിരുന്നു. എന്നാൽ ആരാധകർക്ക് ആവേശം പകരുന്ന മറ്റൊരു വാർത്തയായി തന്റെ ഐക്കണിക് ചിത്രമായ ‘കോനൻ ദി ബാർബേറിയന്റെ’ തുടർച്ചയായ ‘കിംഗ് കോനൻ’ (King Conan) സിനിമയുടെ ചിത്രീകരണം അടുത്ത വർഷം ആരംഭിക്കുമെന്നും അത് ഒടുവിൽ യാഥാർത്ഥ്യമാകാൻ പോവുകയാണെന്നും ആർനോൾഡ് അടുത്തിടെ സ്ഥിരീകരിച്ചിട്ടുണ്ട്.
