നേപ്പാളിലെ രസുവ ജില്ലയിലുണ്ടായ കനത്ത മിന്നൽ പ്രളയത്തിൽ ഇന്ത്യക്കാരായ സഞ്ചാരികൾ ഉൾപ്പെടെ നൂറുകണക്കിന് ആളുകളെ കാണാതായി. ഭോട്ടെ കോശി നദിയിൽ ബുധനാഴ്ച രാവിലെയോടെ രൂപപ്പെട്ട ശക്തമായ വെള്ളപ്പൊക്കത്തിൽ 105 ഇന്ത്യൻ പൗരന്മാർ അടക്കം 384 വിനോദസഞ്ചാരികളെ കാണാതായതായി നേപ്പാൾ ടൂറിസം ബോർഡ് സ്ഥിരീകരിച്ചു. കാണാതായവരിൽ 291 പേർ വിദേശികളും 93 പേർ നേപ്പാൾ സ്വദേശികളുമാണ്. കൈലാഷ് മാനസസരോവർ യാത്രയ്ക്കായി എത്തിയ തീർത്ഥാടകരും ട്രെക്കിംഗിനായി എത്തിയ മറ്റു രാജ്യങ്ങളിലെ സഞ്ചാരികളുമാണ് പ്രളയത്തിൽ പെട്ടിരിക്കുന്നത്.
ടിബറ്റ് അതിർത്തിയോട് ചേർന്നുള്ള ഹിമാലയൻ മേഖലയിൽ മഞ്ഞുരുകിയതോ ഹിമതടാകം പൊട്ടിയതോ ആവാം പെട്ടെന്നുള്ള ഈ ജലപ്രവാഹത്തിന് കാരണമെന്ന് സംശയിക്കുന്നു. വെള്ളപ്പൊക്കത്തിലും മണ്ണടിച്ചിലിലും പ്രദേശത്തെ പാലങ്ങളും റോഡുകളും ടെലികോം വിതരണ ശൃംഖലകളും തകർന്നത് ആശയവിനിമയത്തെ പൂർണ്ണമായി ബാധിച്ചിട്ടുണ്ട്. അതിനാൽ ദുരന്തമേഖലയിലുള്ള വിനോദസഞ്ചാരികളുടെ യഥാർത്ഥ വിവരങ്ങൾ ശേഖരിക്കാൻ വലിയ പ്രയാസമാണ് നേരിടുന്നത്. സൈന്യവും വിനോദസഞ്ചാര വകുപ്പും ചേർന്ന് ഹെലികോപ്റ്ററുകളുടെ സഹായത്തോടെ തിരച്ചിൽ ഊർജ്ജിതമാക്കിയിട്ടുണ്ട്.
ദുരന്തത്തിനിരയായ ഇന്ത്യക്കാരെയും അവരുടെ കുടുംബങ്ങളെയും സഹായിക്കുന്നതിനായി കാഠ്മണ്ഡുവിലെ ഇന്ത്യൻ എംബസി അടിയന്തര ഹെൽപ്പ് ലൈൻ നമ്പറുകൾ തുറന്നു. +977 9851316807, +977 9709107500 എന്നീ നമ്പറുകളിൽ ബന്ധപ്പെട്ട് ആളുകൾക്ക് വിവരങ്ങൾ അറിയാൻ സാധിക്കും. ഇതിന് പുറമെ നേപ്പാൾ ടൂറിസം ബോർഡും സഞ്ചാരികൾക്കായി സഹായ കേന്ദ്രങ്ങൾ ആരംഭിച്ചിട്ടുണ്ട്. പ്രളയസാധ്യതയുള്ള സമീപ പ്രദേശങ്ങളിലെ ആളുകളോട് സുരക്ഷിതമായ സ്ഥാനങ്ങളിലേക്ക് മാറിത്താമസിക്കാൻ അധികൃതർ നിർദ്ദേശം നൽകിയിട്ടുണ്ട്.
