ലോക ചരിത്രത്തിലെ ഏറ്റവും വലിയ എണ്ണക്കരാറിൽ ഒപ്പുവെച്ച് അമേരിക്കയും വെനസ്വേലയും. വെനസ്വേലയുടെ 6,500 കോടിയോളം (65 ബില്യൺ) ബാരൽ എണ്ണ ശേഖരത്തിന്റെ ഭൂരിഭാഗവും ഇനി അമേരിക്കൻ പങ്കാളിത്തത്തിന് കീഴിലാകും. അമേരിക്കൻ വിദേശകാര്യ സെക്രട്ടറി മാർക്കോ റൂബിയോ, പ്രതിരോധ സെക്രട്ടറി പീറ്റ് ഹെഗ്സെത് എന്നിവർ വെനസ്വേലൻ ഇടക്കാല പ്രസിഡന്റ് ഡെൽസി റോഡ്രിഗസുമായി നടത്തിയ ചർച്ചയിലാണ് ഈ ചരിത്ര തീരുമാനമുണ്ടായത്. കരാറിലൂടെ അമേരിക്കൻ എണ്ണ ശേഖരം ഇരട്ടിയിലധികമാകുമെന്നും ഇന്ധനവില വലിയ തോതിൽ കുറയുമെന്നും പ്രസിഡന്റ് ഡൊണാൾഡ് ട്രംപ് വ്യക്തമാക്കി.
അമേരിക്കൻ സർക്കാരും പ്രമുഖ സ്വകാര്യ കമ്പനികളും ചേർന്നുള്ള സംയുക്ത സംരംഭത്തിനാണ് കരാറിന്റെ ഭാഗമായി 100 വർഷത്തെ പ്രവർത്തനാനുമതി നൽകിയിരിക്കുന്നത്. പുതിയ സഹകരണത്തിലൂടെ വെനസ്വേലയുടെ തകർന്നടിഞ്ഞ ഊർജ്ജ മേഖലയിലേക്ക് 10,000 കോടിയിലധികം ഡോളറിന്റെ വിദേശ നിക്ഷേപമെത്തും. 17 പ്രധാന എണ്ണപ്പാടങ്ങളുടെ വികസനത്തിലൂടെ രാജ്യത്തെ ഇന്ധന ഉത്പാദനം ഉയർത്താനും സാമ്പത്തിക തകർച്ചയിൽ നിന്ന് കരകയറാനും സാധിക്കുമെന്ന് വെനസ്വേലൻ ഭരണകൂടം പ്രത്യാശ പ്രകടിപ്പിച്ചു. ലോകത്തിലെ ഏറ്റവും വലിയ എണ്ണ ശേഖരമുള്ള രാജ്യങ്ങളിലൊന്നായ വെനസ്വേലയിലെ അടിസ്ഥാന സൗകര്യങ്ങൾ നവീകരിക്കാൻ ഈ നീക്കം സഹായിക്കും.
കഴിഞ്ഞ ജനുവരിയിൽ വെനസ്വേലൻ പ്രസിഡന്റ് നിക്കോളാസ് മഡുറോയെ അമേരിക്കൻ സൈന്യം അറസ്റ്റ് ചെയ്തതിന് പിന്നാലെയാണ് ഇരുരാജ്യങ്ങളും തമ്മിലുള്ള ബന്ധം മാറിയത്. ഇറാനുമായുള്ള യുദ്ധം ആറുമാസം പിന്നിട്ടതോടെ ഉണ്ടായ ആഗോള എണ്ണപ്രതിസന്ധിയും അമേരിക്കയിലെ ഇന്ധനവില വർദ്ധനവുമാണ് പുതിയ നീക്കത്തിന് വേഗം കൂട്ടിയത്. അമേരിക്കൻ സൈന്യത്തിനാവശ്യമായ ഇന്ധനം ഉറപ്പാക്കാനും തന്ത്രപ്രധാന എണ്ണ ശേഖരം പുനഃസ്ഥാപിക്കാനും ഈ കരാർ വഴിയൊരുക്കും. വിദേശ കമ്പനികൾക്ക് കൂടുതൽ പിന്തുണ നൽകുന്ന പുതിയ നയത്തിലൂടെ വെനസ്വേല ആഗോള ഊർജ്ജ വിപണിയിലേക്ക് ശക്തമായി തിരിച്ചെത്തുകയാണ്.
