ന്യൂഡൽഹി : ഡൽഹിയിൽ പ്രത്യേക തീവ്ര വോട്ടർപട്ടിക പുതുക്കൽ (എസ്.ഐ.ആർ) പ്രക്രിയയുടെ ഭാഗമായി തയ്യാറാക്കിയ കരട് വോട്ടർപട്ടിക പുറത്തിറക്കി. 1.45 കോടി വോട്ടർമാരിൽ 47.7 ലക്ഷം പേരുടെ പേരുകൾ ആണ് ഒഴിവാക്കപ്പെട്ടിരിക്കുന്നത്. വോട്ടർമാരുടെ വിവരങ്ങൾ ശേഖരിക്കുന്നതിനായി ഉദ്യോഗസ്ഥർ വീടുകൾ തോറും നടത്തിയ സർവേയിൽ ഫോം സമർപ്പിക്കാത്തവരെയും വിലാസത്തിൽ ലഭിക്കാത്തവരെയുമാണ് പട്ടികയ്ക്ക് പുറത്താക്കിയിരിക്കുന്നത്. മുൻപ് രജിസ്റ്റർ ചെയ്ത ആകെ വോട്ടർമാരുടെ ഏകദേശം മൂന്നിലൊന്ന് ഭാഗം ആളുകളാണ് നിലവിലെ പട്ടികയിൽ നിന്നും പുറത്തായിരിക്കുന്നത്.
സ്ഥിരമായി താമസം മാറിയവർ, മരണപ്പെട്ടവർ, വ്യാജ പേരുവിവരങ്ങൾ നൽകിയവർ, ഒരു സ്ഥലത്തും വിവരങ്ങൾ ലഭ്യമാകാത്തവർ എന്നീ വിഭാഗങ്ങളിലാണ് ഇവരെ തരംതിരിച്ചിരിക്കുന്നത്. മൊത്തം വോട്ടർമാരിൽ 97.5 ലക്ഷത്തോളം ആളുകളുടെ വിവരങ്ങൾ മാത്രമാണ് ഡിജിറ്റൈസ് ചെയ്ത് പട്ടികയിൽ ഉൾപ്പെടുത്താൻ സാധിച്ചതെന്ന് തെരഞ്ഞെടുപ്പ് കമ്മീഷൻ അറിയിച്ചു. ചില മണ്ഡലങ്ങളിൽ 80 ശതമാനത്തിലധികം ആളുകളുടെ വിവരങ്ങൾ ശേഖരിച്ചപ്പോൾ മറ്റ് ചിലയിടങ്ങളിൽ പകുതിയോളം വോട്ടർമാരുടെ വിവരങ്ങൾ മാത്രമാണ് ശേഖരിക്കാൻ കഴിഞ്ഞത്. റോഹിണി, ശാക്കൂർബസ്തി തുടങ്ങിയ പ്രദേശങ്ങളിലാണ് ഏറ്റവും കൂടുതൽ ഫോമുകൾ സമർപ്പിക്കപ്പെട്ടത്.
കരട് പട്ടികയിൽ നിന്ന് പുറത്തായവർക്ക് തങ്ങളുടെ പേരുകൾ വീണ്ടും ഉൾപ്പെടുത്തുന്നതിനായി ആഗസ്റ്റ് 31 മുതൽ സെപ്റ്റംബർ 30 വരെ പരാതികളും അപേക്ഷകളും സമർപ്പിക്കാവുന്നതാണ്. ഈ കാലയളവിൽ ഉദ്യോഗസ്ഥർ വിവരങ്ങൾ വീണ്ടും നേരിട്ടെത്തി പരിശോധിച്ച് ഉറപ്പുവരുത്തും. അതിനുശേഷമുള്ള അവസാന ഘട്ട തിരുത്തലുകൾക്ക് ശേഷം നവംബർ 4-ന് ഡൽഹിയിലെ അന്തിമ വോട്ടർപട്ടിക പ്രസിദ്ധീകരിക്കുമെന്ന് തെരഞ്ഞെടുപ്പ് കമ്മീഷൻ വ്യക്തമാക്കി. അർഹരായ എല്ലാ വോട്ടർമാർക്കും വോട്ട് അവകാശം ഉറപ്പാക്കാൻ തക്കതായ രേഖകൾ ഹാജരാക്കണമെന്ന് അധികൃതർ ആവശ്യപ്പെട്ടു.
