എൻഫോഴ്സ്മെന്റ് ഡയറക്ടറേറ്റിന്റെ നീക്കങ്ങൾക്കെതിരെ രൂക്ഷമായ വിമർശനവുമായി പി.എ. മുഹമ്മദ് റിയാസ് രംഗത്ത്. ഇ.ഡി പുറത്തുവിട്ട വിവരങ്ങൾ യാതൊരുവിധ അടിസ്ഥാനവുമില്ലാത്തതാണെന്നും, തന്നെ വ്യക്തിപരമായി കടന്നാക്രമിക്കാനും രാഷ്ട്രീയമായി തകർക്കാനുമുള്ള ആസൂത്രിത ശ്രമത്തിന്റെ ഭാഗമാണ് ഈ വെളിപ്പെടുത്തലുകളെന്നും അദ്ദേഹം കോഴിക്കോട്ട് വ്യക്തമാക്കി.
പാർട്ടിയുടെ സംസ്ഥാന സമ്മിറ്റും വലിയ ജനകീയ റാലിയും നടക്കാനിരിക്കുന്ന നിർണ്ണായക ദിവസമാണ് ഇത്തരത്തിലുള്ള വ്യാജ വാർത്തകൾ പ്രചരിപ്പിക്കുന്നതിനായി ബോധപൂർവ്വം തിരഞ്ഞെടുത്തതെന്നും കുറ്റപ്പെടുത്തി. തന്റെ പങ്കാളിയായ വീണ വിജയനെതിരെ ഉയർന്ന വന്നിരിക്കുന്ന ഹവാല ഇടപാട് ആരോപണങ്ങൾ ശുദ്ധ അസംബന്ധമാണെന്ന് റിയാസ് ആവർത്തിച്ചു. അന്വേഷണ ഉദ്യോഗസ്ഥർ പലതവണ വീണയെ ചോദ്യം ചെയ്തെങ്കിലും അത്തരത്തിലുള്ള ഒരു ചോദ്യാവലിയോ അന്വേഷണമോ ഉണ്ടായിരുന്നില്ലെന്നും, ഇപ്പോൾ പുറത്തുവരുന്ന വിവരങ്ങളെല്ലാം മാധ്യമങ്ങളിലൂടെ വ്യക്തിഹത്യ നടത്താൻ വേണ്ടിമാത്രം സൃഷ്ടിക്കപ്പെട്ടതാണെന്നും അദ്ദേഹം ചൂണ്ടിക്കാട്ടി.
ഇ.ഡി തയ്യാറാക്കുന്ന ഇത്തരം തിരക്കഥകൾക്ക് ദേശീയ തലത്തിൽ തന്നെ മികച്ച തിരക്കഥയ്ക്കുള്ള പുരസ്‌കാരമാണ് നൽകേണ്ടതെന്നും റിയാസ് പരിഹസിച്ചു. രാഷ്ട്രീയമായ ഇത്തരം വേട്ടയാടലുകൾ കണ്ട് തങ്ങളും പാർട്ടിയും ഒരടിപോലും പിന്നോട്ട് പോകില്ലെന്നും, എല്ലാ വ്യാജ പ്രചാരണങ്ങളെയും രാഷ്ട്രീയമായും നിയമപരമായും നേരിടുമെന്നും മുഹമ്മദ് റിയാസ് വ്യക്തമാക്കി.
