ഇസ്ലാമാബാദ്: പശ്ചിമേഷ്യയിൽ രൂക്ഷമാകുന്ന സൈനിക സംഘർഷങ്ങളെ തുടർന്ന് ആഗോളതലത്തിൽ ക്രൂഡ് ഓയിൽ വില കുതിച്ചുയർന്നതോടെ കടുത്ത സാമ്പത്തിക-ഇന്ധന പ്രതിസന്ധിയിലായി പാക്കിസ്ഥാൻ. രാജ്യത്തെ പെട്രോളിയം ക്ഷാമം മറികടക്കാനും ഇന്ധന ഉപയോഗം പരമാവധി കുറയ്ക്കാനുമായി രാജ്യവ്യാപകമായി ‘സ്മാർട് ലോക്ഡൗൺ’ നടപ്പാക്കാൻ പാക് സർക്കാർ ഒരുങ്ങുന്നു. ഇത് സംബന്ധിച്ച് തീരുമാനമെടുക്കാൻ പ്രധാനമന്ത്രി ഷഹബാസ് ഷരീഫിന്റെ അധ്യക്ഷതയിൽ ചേർന്ന അടിയന്തര ഉന്നതതല യോഗത്തിലാണ് വർക്ക് ഫ്രം ഹോം ഉൾപ്പെടെയുള്ള വിപ്ലവകരമായ നിർദ്ദേശങ്ങൾ ചർച്ചയായത്.
പുതിയ പദ്ധതി പ്രകാരം ആഴ്ചയിൽ തൊഴിൽ ദിനങ്ങൾ നാലു ദിവസമായി ചുരുക്കാനും ശേഷിക്കുന്ന ദിവസങ്ങളിൽ ജീവനക്കാർക്ക് ‘വർക്ക് ഫ്രം ഹോം’ അനുവദിക്കാനുമാണ് സർക്കാർ ആലോചിക്കുന്നത്. കൂടാതെ രാത്രികാലങ്ങളിൽ ഇന്ധനവും വൈദ്യുതിയും ലാഭിക്കുന്നതിനായി വാണിജ്യ സ്ഥാപനങ്ങളും ഷോപ്പിംഗ് മാളുകളും ചന്തകളും വൈകുന്നേരങ്ങളിൽ നേരത്തേ തന്നെ അടയ്ക്കാനും നിർദ്ദേശമുണ്ട്. സർക്കാർ ഓഫീസുകളിലെ വാഹന ഉപയോഗത്തിന് നിയന്ത്രണം ഏർപ്പെടുത്താനും പൊതുഗതാഗതം പരമാവധി പ്രയോജനപ്പെടുത്താനും ജനങ്ങളോട് ആവശ്യപ്പെടും.
പശ്ചിമേഷ്യൻ യുദ്ധം കാരണം അന്താരാഷ്ട്ര വിപണിയിൽ എണ്ണ വിതരണം തടസ്സപ്പെടുകയും വില കുതിച്ചുയരുകയും ചെയ്തതാണ് പാക്കിസ്ഥാനെ പെട്ടെന്ന് ഇത്തരമൊരു തീരുമാനത്തിലേക്ക് നയിച്ചത്. നിലവിൽ തന്നെ രൂക്ഷമായ നാണയപ്പെരുപ്പവും വിദേശനാണ്യ ശേഖരത്തിന്റെ കുറവും മൂലം വലയുന്ന പാക് സമ്പദ്‌വ്യവസ്ഥയ്ക്ക് എണ്ണവിലവർദ്ധനവ് കനത്ത പ്രഹരമാണ് ഏൽപ്പിച്ചിരിക്കുന്നത്. അവശ്യ മേഖലകളെ ഒഴിവാക്കി കടുത്ത നിയന്ത്രണങ്ങൾ ഉടൻ തന്നെ പ്രാബല്യത്തിൽ വരുത്തുമെന്നാണ് ഇസ്ലാമാബാദിൽ നിന്നുള്ള റിപ്പോർട്ടുകൾ സൂചിപ്പിക്കുന്നത്.
