ഫോൺ വിളിക്കാനും എസ്.എം.എസുകൾ അയക്കാനും മാത്രം മൊബൈൽ റീച്ചാർജ് ഉപയോഗിക്കുന്ന സാധാരണക്കാർക്ക് വൻ ആശ്വാസ വാർത്ത. ഇൻ്റർനെറ്റ് അഥവാ ഡാറ്റാ സേവനങ്ങൾ കൂട്ടിക്കെട്ടാതെ, കുറഞ്ഞ ചെലവിൽ വോയ്‌സ്, എസ്.എം.എസ്. സേവനങ്ങൾ മാത്രം ഉൾപ്പെടുന്ന പ്രത്യേക റീച്ചാർജ് വൗച്ചറുകൾ പുറത്തിറക്കാൻ ടെലികോം കമ്പനികൾക്ക് നിർദ്ദേശം നൽകി ടെലികോം റെഗുലേറ്ററി അതോറിറ്റി ഓഫ് ഇന്ത്യ (TRAI). ടെലികോം ഉപഭോക്തൃ സംരക്ഷണ ചട്ടത്തിൽ വരുത്തിയ പതിമ്മൂന്നാം ഭേദഗതിയിലൂടെയാണ് ട്രായ് നിർണ്ണായക ഉത്തരവിറക്കിയത്.
നിലവിൽ ഡാറ്റ ആവശ്യമില്ലാത്ത സാധാരണ ഫോൺ ഉപഭോക്താക്കളും ഡാറ്റ അടങ്ങിയ വിലകൂടിയ അൺലിമിറ്റഡ് പാക്കുകൾ തിരഞ്ഞെടുക്കാൻ നിർബന്ധിതരാകുന്ന സാഹചര്യം നിലനിൽക്കുന്നുണ്ട്. ഇതിന് പരിഹാരമായാണ് 30 ദിവസവും അതിൽ കുറവുമുള്ള കാലാവധികളിൽ ഡാറ്റയില്ലാത്ത, വില കുറഞ്ഞ താരിഫ് വൗച്ചറുകൾ (Special Tariff Vouchers – STVs) ലഭ്യമാക്കാൻ ട്രായ് ഉത്തരവിട്ടത്. ഇതോടൊപ്പം എല്ലാ മാസവും ഒരേ തീയതിയിൽ പുതുക്കാവുന്ന (Calendar Month Renewal) വൗച്ചറുകളും, ഡാറ്റയില്ലാത്ത ദീർഘകാല വൗച്ചറുകളും ടെലികോം സേവന ദാതാക്കൾ നിരത്തിലിറക്കേണ്ടി വരും.
സാധാരണക്കാർക്കും ഗ്രാമീണ മേഖലയിലുള്ള ഉപഭോക്താക്കൾക്കും വലിയ സാമ്പത്തിക ലാഭം ഉണ്ടാക്കാൻ സഹായിക്കുന്നതാണ് ട്രായിയുടെ പുതിയ തീരുമാനം. മൊബൈൽ റീച്ചാർജ് ചാർജുകൾ ഉയർന്നുനിൽക്കുന്ന സാഹചര്യത്തിൽ, തങ്ങൾക്ക് ആവശ്യമുള്ള സേവനങ്ങൾക്ക് മാത്രം പണം നൽകിയാൽ മതിയെന്നത് ദരിദ്ര-ഇടത്തരം വിഭാഗങ്ങൾക്ക് വലിയ ആശ്വാസമാകും. ഔദ്യോഗിക ഗസറ്റിൽ വിജ്ഞാപനം വന്ന് 30 ദിവസത്തിനകം പുതിയ നിയമം പൂർണ്ണമായി പ്രാബല്യത്തിൽ വരും.
