ചീഫ് ഇലക്ഷൻ കമ്മീഷണറെയും ഇലക്ഷൻ കമ്മീഷണർമാരെയും തിരഞ്ഞെടുക്കുന്ന സമിതിയിൽ നിന്ന് സുപ്രീം കോടതി ചീഫ് ജസ്റ്റിസിനെ ഒഴിവാക്കിയ 2023-ലെ നിയമത്തിന്റെ ഭരണഘടനാ സാധുത ചോദ്യം ചെയ്തുള്ള ഹർജികളിൽ പരമോന്നത കോടതി ഭിന്നവിധി പ്രസ്താവിച്ചു. കേസ് അഞ്ചംഗ ഭരണഘടനാ ബെഞ്ചിന് വിടണമോ എന്ന കാര്യത്തിലാണ് രണ്ട് ജഡ്ജിമാരടങ്ങുന്ന ബെഞ്ചിൽ ഭിന്നതയുണ്ടായത്. ജസ്റ്റിസ് ദീപാങ്കർ ദത്ത, ജസ്റ്റിസ് എസ്. സി. ശർമ്മ എന്നിവരടങ്ങിയ ബെഞ്ചാണ് അഞ്ച് ദിവസത്തിലധികം വാദം കേട്ട ശേഷം ഈ നിർണായകമായ ഭിന്നവിധി പുറപ്പെടുവിച്ചത്.
തൊഴിൽപരമായ ഐക്യത്തിനും സ്ഥാപനപരമായ നിലപാടിനും ഒറ്റ ശബ്ദത്തിൽ വിധി പറയുന്നതായിരുന്നു അഭികാമ്യമെന്ന് വിധി പ്രസ്താവിച്ചുകൊണ്ട് ജസ്റ്റിസ് ദീപാങ്കർ ദത്ത അഭിപ്രായപ്പെട്ടു. കേസ് വിശാല ബെഞ്ചിന് വിടേണ്ടതില്ലെന്ന നിലപാടാണ് ജസ്റ്റിസ് ദത്ത സ്വീകരിച്ചതെങ്കിൽ, ജസ്റ്റിസ് ശർമ്മ ഇതിനോട് വിയോജിക്കുകയായിരുന്നു. ഹർജികൾ വിശാല ബെഞ്ചിന് വിടണമോ എന്ന വിഷയം ഇനി സുപ്രീം കോടതി ചീഫ് ജസ്റ്റിസ് സൂര്യ കാന്ത് അധ്യക്ഷനായ ബെഞ്ച് തീരുമാനിക്കും.
പ്രധാനമന്ത്രി, കേന്ദ്ര കാബിനറ്റ് മന്ത്രി, ലോക്‌സഭയിലെ പ്രതിപക്ഷ നേതാവ് എന്നിവരടങ്ങുന്ന സമതിക്കാണ് പുതിയ നിയമപ്രകാരം തിരഞ്ഞെടുപ്പ് കമ്മീഷണർമാരെ നിയമിക്കാനുള്ള അധികാരമുള്ളത്. ഇത് തിരഞ്ഞെടുപ്പ് കമ്മീഷന്റെ സ്വതന്ത്രമായ പ്രവർത്തനത്തെ ബാധിക്കുമെന്നും സർക്കാരിന് കൂടുതൽ മേൽക്കോയ്മ നൽകുമെന്നുമാണ് ഹർജിക്കാരായ അസോസിയേഷൻ ഫോർ ഡെമോക്രാറ്റിക് റീഫോംസ് (എ.ഡി.ആർ) അടക്കമുള്ളവരുടെ പ്രധാന വാദം. രാജ്യത്തെ തിരഞ്ഞെടുപ്പ് സംവിധാനത്തിന്റെ സുതാര്യതയെ ചൊല്ലി നിയമപോരാട്ടം തുടരുന്നതിനിടെയാണ് ഇപ്പോൾ സുപ്രീം കോടതിയുടെ ഭാഗത്തുനിന്നും ഈ അപൂർവ്വമായ ഭിന്നവിധി ഉണ്ടായിരിക്കുന്നത്.
