യുക്രെയ്ൻ യുദ്ധം അവസാനിപ്പിക്കുന്നതിനായി റഷ്യൻ ഊർജത്തിന്റെ പ്രധാന വാങ്ങലുകാരായ ഇന്ത്യ, ചൈന, തുർക്കി തുടങ്ങിയ രാജ്യങ്ങൾ റഷ്യയുമായുള്ള വ്യാപാരം അവസാനിപ്പിക്കണമെന്ന് യുക്രെയ്ൻ പ്രസിഡന്റ് വൊളോദിമിർ സെലെൻസ്‌കി ആവശ്യപ്പെട്ടു. ഐക്യരാഷ്ട്രസഭയുടെ പൊതുസഭയുടെ (യു.എൻ.ജി.എ) പശ്ചാത്തലത്തിൽ വാൾസ്ട്രീറ്റ് ജേണലിന് നൽകിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്.
ഈ രാജ്യങ്ങളിലേക്കുള്ള ഊർജ കയറ്റുമതിയെയാണ് റഷ്യയുടെ സമ്പദ്‌വ്യവസ്ഥ പ്രധാനമായും ആശ്രയിക്കുന്നതെന്നും, ഈ രാജ്യങ്ങൾ ഊർജ വ്യാപാരം നിർത്തിയാൽ റഷ്യക്ക് യുദ്ധം അവസാനിപ്പിക്കേണ്ടി വരുമെന്നും അദ്ദേഹം പറഞ്ഞു. പടിഞ്ഞാറൻ ഉപരോധങ്ങളെത്തുടർന്ന് റഷ്യൻ എണ്ണവ്യാപാരം ഏഷ്യൻ വിപണികളിലേക്ക് തിരിച്ചുവിട്ടിരുന്നുവെങ്കിലും, അടുത്തിടെ ഇന്ത്യയുടെ റഷ്യൻ എണ്ണ ഇറക്കുമതിയിൽ കുറവുണ്ടായിട്ടുണ്ട്.
റഷ്യൻ ഊർജം വാങ്ങുന്നത് തുടരുന്ന രാജ്യങ്ങൾക്ക് മേൽ 100 ശതമാനം വരെ തീരുവ ചുമത്താനുള്ള അധികാരം നൽകുന്ന ലിൻഡ്സെ ഒ ഗ്രഹാം സാങ്ഷനിംഗ് റഷ്യ ആൻഡ് ഇറാൻ ആക്റ്റിൽ യു.എസ് പ്രസിഡന്റ് ഡൊണാൾഡ് ട്രംപ് ഒപ്പുവെച്ചതും ഈ സാഹചര്യത്തിൽ നിർണായകമാണ്.
