ന്യൂഡൽഹി: പഞ്ചസാര, ഉപ്പ്, കൊഴുപ്പ് എന്നിവ അമിതമായി അടങ്ങിയ പായ്ക്കറ്റ് ഭക്ഷണങ്ങളുടെ മുൻഭാഗത്ത് ചുവന്ന മുന്നറിയിപ്പ് ലേബലുകൾ (Red Warning Labels) നിർബന്ധമാക്കാൻ ഒരുങ്ങി കേന്ദ്ര ഭക്ഷ്യസുരക്ഷാ മാനദണ്ഡ അതോറിറ്റി (FSSAI). പായ്ക്കറ്റ് ഭക്ഷണങ്ങളിലെ മുന്നറിയിപ്പ് ലേബലുകളുമായി ബന്ധപ്പെട്ട് സെപ്റ്റംബർ 10-ന് സുപ്രീം കോടതി ഉന്നയിച്ച 13 നിർണായക ചോദ്യങ്ങൾക്ക് മറുപടിയായി എഫ്എസ്എസ്എഐ സമർപ്പിച്ച 43 പേജ് വരുന്ന സത്യവാങ്മൂലത്തിലാണ് ഇക്കാര്യം വ്യക്തമാക്കിയത്. നവംബർ 28-ലെ സമയപരിധിക്ക് മുന്നോടിയായി സെപ്റ്റംബർ 23-നാണ് എഫ്എസ്എസ്എഐ മറുപടി നൽകിയത്.
വെളുത്ത ചതുര പശ്ചാത്തലത്തിൽ ചുവന്ന ഷഡ്ഭുജാകൃതിയിലുള്ള (Red Hexagon) അടയാളമാണ് മുന്നറിയിപ്പ് ലേബലുകൾക്കായി നിർദ്ദേശിച്ചിരിക്കുന്നത്. പാക്കറ്റിന്റെ മുൻഭാഗത്ത് മുകളിൽ ഇടതുവശത്തായി ‘HIGH SUGAR’, ‘HIGH SALT’, ‘HIGH FAT’ എന്ന് വ്യക്തമായി രേഖപ്പെടുത്താനാണ് തീരുമാനം. എന്നാൽ, ഈ നിയമങ്ങൾ നടപ്പിലാക്കുന്നതിലും അതിന്റെ നിബന്ധനകളിലും നിരവധി സംശയങ്ങളും തർക്കങ്ങളും ഇപ്പോഴും ബാക്കിയാണ്.
പ്രകൃതിദത്തമായ പഞ്ചസാരയെയും കൊഴുപ്പിനെയും ഒഴിവാക്കി, ഉൽപ്പന്നങ്ങളിൽ പുറത്തുനിന്ന് ചേർക്കുന്ന പഞ്ചസാരയും കൊഴുപ്പും (Added Sugar and Fat) മാത്രമാണ് ഇതിനായി കണക്കാക്കുകയെന്ന് എഫ്എസ്എസ്എഐ കോടതിയെ അറിയിച്ചു. എന്നാൽ ആകെ അടങ്ങിയിരിക്കുന്ന പഞ്ചസാരയും കൊഴുപ്പും കണക്കിലെടുക്കാത്തത് ലേബലിംഗിന്റെ വ്യാപ്തി കുറയ്ക്കുമെന്ന വിമർശനവും ഉയരുന്നുണ്ട്. കൂടാതെ, നിലവിൽ ഇന്ത്യയിൽ പച്ച നിറം സസ്യാഹാരത്തെയും (Veg) ചുവപ്പ് നിറം മാംസാഹാരത്തെയും (Non-Veg) സൂചിപ്പിക്കാൻ ഉപയോഗിക്കുന്നതിനാൽ, മുന്നറിയിപ്പ് ലേബലിന് ചുവപ്പ് നിറം നൽകുന്നത് ഉപഭോക്താക്കളിൽ ആശയക്കുഴപ്പം ഉണ്ടാക്കുമോ എന്ന് സുപ്രീം കോടതി ചോദിച്ചിരുന്നു.
കമ്പനികൾക്ക് പുതിയ മാറ്റങ്ങളിലേക്ക് മാറാൻ 365 ദിവസത്തെ സ്വമേധയാ ഉള്ള സാവകാശം നൽകാനും എഫ്എസ്എസ്എഐ ശുപാർശ ചെയ്തിട്ടുണ്ട്. ഇതനുസരിച്ച് പുതിയ നിയന്ത്രണങ്ങൾ കടകളിൽ പൂർണ്ണമായി പ്രാബല്യത്തിൽ വരാൻ 2028 വരെ സമയമെടുത്തേക്കാം. കലോറിയില്ലാത്ത കൃത്രിമ മധുരം അടങ്ങിയ പാനീയങ്ങളിൽ പ്രത്യേക മുന്നറിയിപ്പുകൾ നൽകണമെന്നും നിർദ്ദേശമുണ്ട്. ഇന്ത്യക്കാരുടെ ഭക്ഷണ ശീലങ്ങളെയും വ്യാപാരികളുടെ പാക്കേജിംഗ് രീതികളെയും മാറ്റിമറിക്കാൻ പോകുന്ന ഈ നിർണായക വിഷയത്തിൽ സുപ്രീം കോടതി വീണ്ടും വാദം കേൾക്കും.
