പ്രതിപക്ഷ നേതാവ് പിണറായി വിജയനെതിരെ ‘നീ പോ മോനേ വിജയാ’ പരാമർശം ആവർത്തിച്ച് തെലങ്കാന മുഖ്യമന്ത്രി രേവന്ത് റെഡ്ഡി. നിലമ്പൂരിൽ നടന്ന മുതിർന്ന കോൺഗ്രസ് നേതാവും മുൻ മന്ത്രിയുമായ ആര്യാടൻ മുഹമ്മദിന്റെ അനുസ്മരണ യോഗത്തിൽ സംസാരിക്കുകയായിരുന്നു അദ്ദേഹം.
തെരഞ്ഞെടുപ്പ് കാലത്ത് കേരളം സന്ദർശിച്ചപ്പോഴുണ്ടായ അനുഭവം അനുസ്മരിച്ചുകൊണ്ടാണ് പിണറായി വിജയനെ ലക്ഷ്യമിട്ട് രേവന്ത് റെഡ്ഡി തന്റെ ശ്രദ്ധേയമായ മലയാളം പ്രയോഗം വീണ്ടും നടത്തിയത്. കേരളത്തിലെത്തിയ സമയത്ത് പിണറായി വിജയനെതിരെ നടത്തിയ പരാമർശം ഓർമിപ്പിച്ച അദ്ദേഹം, ‘നീ പോ മോനേ വിജയാ’ എന്ന് വീണ്ടും പറയുകയായിരുന്നു.
പ്രധാനമന്ത്രി നരേന്ദ്ര മോദിക്കെതിരെയും രേവന്ത് റെഡ്ഡി രൂക്ഷ വിമർശനം ഉന്നയിച്ചു. മോദി എല്ലാത്തിനെയും തകർക്കുകയാണെന്നും രാജ്യത്തെ യുവാക്കളുടെ ഭാവി നശിപ്പിക്കുകയാണെന്നും അദ്ദേഹം ആരോപിച്ചു. ജനാധിപത്യത്തെയും കൂട്ടായ ഐക്യമെന്ന ആശയത്തെയും ബിജെപി ദുർബലപ്പെടുത്തുകയാണെന്നും അദ്ദേഹം പറഞ്ഞു.
കേരളത്തിൽ നിന്ന് കോൺഗ്രസ് പുതിയൊരു മുന്നേറ്റത്തിന് തുടക്കം കുറിക്കുകയാണെന്നും ഈ മുന്നേറ്റം കേന്ദ്രത്തിൽ കോൺഗ്രസിനെ അധികാരത്തിലെത്തിക്കുന്ന സുനാമിയായി മാറണമെന്നും രേവന്ത് റെഡ്ഡി പറഞ്ഞു. കേരളത്തോട് തനിക്ക് പ്രത്യേക സ്നേഹമുണ്ടെന്നും രാഹുൽ ഗാന്ധിയുടെയും പ്രിയങ്ക ഗാന്ധിയുടെയും തെരഞ്ഞെടുപ്പ് വിജയത്തിൽ കേരളത്തിലെ ജനങ്ങൾ നിർണായക പങ്കുവഹിച്ചെന്നും അദ്ദേഹം പറഞ്ഞു.
രാഹുൽ ഗാന്ധി ഇന്ത്യയുടെ പ്രധാനമന്ത്രിയാകുന്നത് കാണുക എന്നതാണ് തന്റെ അവശേഷിക്കുന്ന സ്വപ്നമെന്നും രാജ്യം ഇന്ന് മാറ്റം ആഗ്രഹിക്കുകയാണെന്നും രേവന്ത് റെഡ്ഡി പറഞ്ഞു. രാജ്യത്ത് ഗാന്ധി കുടുംബവും സംഘപരിവാറും തമ്മിലാണ് പോരാട്ടം നടക്കുന്നതെന്നും രാജ്യത്തെ രക്ഷിക്കാൻ ജനങ്ങൾ ഒറ്റക്കെട്ടായി നിൽക്കണമെന്നും അദ്ദേഹം ആഹ്വാനം ചെയ്തു.
ചടങ്ങിൽ 2026ലെ മികച്ച പൊതുപ്രവർത്തകനുള്ള ആര്യാടൻ മുഹമ്മദ് പുരസ്‌കാരം രേവന്ത് റെഡ്ഡി ഏറ്റുവാങ്ങി. തെലങ്കാനയിൽ കർഷകർ, പിന്നാക്ക വിഭാഗങ്ങൾ, സാധാരണക്കാർ എന്നിവർക്കായി നടപ്പാക്കിയ പ്രവർത്തനങ്ങൾ പരിഗണിച്ചാണ് പുരസ്‌കാരത്തിന് അദ്ദേഹത്തെ തെരഞ്ഞെടുത്തത്.
