തിരുവനന്തപുരം: സൗദി അറേബ്യയിൽ തടവിൽ കഴിഞ്ഞിരുന്ന മൂന്ന് യുവാക്കളുടെ മോചനം സാധ്യമാക്കിയ കേന്ദ്ര സർക്കാരിനും പ്രധാനമന്ത്രി നരേന്ദ്ര മോദിക്കും ബിഗ് സല്യൂട്ടുമായി മലങ്കര മാർത്തോമ്മാ സുറിയാനി സഭ. മാർത്തോമ്മാ സഭാംഗങ്ങളായ യുവാക്കളുടെ മോചനം ഉറപ്പാക്കാൻ പ്രധാനമന്ത്രി നരേന്ദ്ര മോദിയും പ്രധാനമന്ത്രിയുടെ ഓഫീസും (PMO) നടത്തിയ നിരന്തരവും ഫലപ്രദവുമായ നയതന്ത്ര ഇടപെടലുകൾക്കാണ് സഭയുടെ പരമാധ്യക്ഷൻ ഡോ. തിയഡോഷ്യസ് മാർത്തോമ്മാ മെത്രാപ്പൊലീത്ത നേരിട്ട് നന്ദി അറിയിച്ചിരിക്കുന്നത്.
ഇതുസംബന്ധിച്ച് ഈ മാസം 9-ാം തീയതി പ്രധാനമന്ത്രിക്ക് ഔദ്യോഗിക മുദ്രയോടും ഒപ്പോടും കൂടിയ കത്ത് മെത്രാപ്പൊലീത്ത അയച്ചു. സൗദി അറേബ്യയിലെ ജയിൽ മോചനം സാധ്യമായത് തടവിലായിരുന്ന യുവാക്കളുടെ കുടുംബങ്ങൾക്കും സഭാ സമൂഹത്തിനും നൽകിയ ആശ്വാസവും സന്തോഷവും ചെറുതല്ലെന്ന് കത്തിൽ വ്യക്തമാക്കുന്നുണ്ട്. വിദേശ രാജ്യങ്ങളിൽ സങ്കീർണ്ണമായ നിയമപ്രതിസന്ധികളിൽ അകപ്പെടുന്ന ഇന്ത്യൻ പൗരന്മാരുടെ സുരക്ഷ ഉറപ്പാക്കാൻ കേന്ദ്ര സർക്കാർ കാണിക്കുന്ന ജാഗ്രത പ്രശംസനീയമാണ്. രാജ്യത്തിന്റെയും ജനങ്ങളുടെയും ക്ഷേമത്തിനും പുരോഗതിക്കുമായി പ്രധാനമന്ത്രി നടത്തുന്ന തുടർ സേവനങ്ങൾക്കായി പ്രാർത്ഥിക്കുന്നുവെന്നും സഭാധ്യക്ഷൻ കത്തിൽ കുറിച്ചു. വിദേശകാര്യ മന്ത്രാലയത്തിന്റെയും സൗദിയിലെ ഇന്ത്യൻ എംബസിയുടെയും കൃത്യമായ ഇടപെടലിലൂടെയാണ് വർഷങ്ങളായി ആശങ്കയിലായിരുന്ന ഈ കുടുംബങ്ങൾക്ക് ഒടുവിൽ ആശ്വാസവാർത്ത എത്തിയത്.
