പഞ്ചാബിൽ ബി.ജെ.പി അധികാരത്തിൽ വന്നാൽ 2029 ഡിസംബർ മുപ്പത്തിയൊന്നിനകം സംസ്ഥാനത്തെ പൂർണ്ണമായും ലഹരിമുക്തമാക്കുമെന്ന് കേന്ദ്ര ആഭ്യന്തര മന്ത്രി അമിത് ഷാ. ജലന്ധറിൽ ബി.ജെ.പി സംഘടിപ്പിച്ച നാലായിരം കിലോമീറ്റർ നീണ്ട ‘നഷാ മുക്ത് പഞ്ചാബ് യാത്ര’യുടെ സമാപന സമ്മേളനത്തിൽ സംസാരിക്കുകയായിരുന്നു അദ്ദേഹം. നിലവിലെ ആം ആദ്മി പാർട്ടി സർക്കാരിന്റെ ദുരണവും വീഴ്ചകളുമാണ് സംസ്ഥാനത്തെ രൂക്ഷമായ ലഹരി പ്രതിസന്ധിക്ക് കാരണമെന്ന് അമിത് ഷാ കുറ്റപ്പെടുത്തി. അരവിന്ദ് കെജ്രിവാളിനെയും മുഖ്യമന്ത്രി ഭഗവന്ത് മന്നിനെയും കടുത്ത ഭാഷയിലാണ് അദ്ദേഹം വിമർശിച്ചത്.
ഡൽഹിയിലെ മദ്യകുംഭകോണത്തിൽ പിടിക്കപ്പെട്ടവർക്ക് പഞ്ചാബിലെ ലഹരി മാഫിയയെ അടിച്ചമർത്താൻ കഴിയില്ലെന്ന് അമിത് ഷാ പറഞ്ഞു. മുൻപ് ഭരണത്തിലുണ്ടായിരുന്ന കോൺഗ്രസിനെയും നിലവിലെ ആം ആദ്മി പാർട്ടിയെയും ജനങ്ങൾ കണ്ടുകഴിഞ്ഞ സാഹചര്യത്തിൽ ബി.ജെ.പിക്ക് അഞ്ചുവർഷം അവസരം നൽകണമെന്ന് അദ്ദേഹം അഭ്യർത്ഥിച്ചു. പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ കശ്മീരിലെ ഭീകരവാദവും വടക്കുകിഴക്കൻ സംസ്ഥാനങ്ങളിലെ അക്രമങ്ങളും അവസാനിപ്പിച്ചതുപോലെ പഞ്ചാബിലെ ലഹരി വ്യാപാരവും ഇല്ലാതാക്കുമെന്ന് അമിത് ഷാ വ്യക്തമാക്കി.
ലഹരിക്ക് ഇരയായി ജീവൻ നഷ്ടപ്പെട്ടവരുടെ കുടുംബങ്ങളെ നേരിൽ കണ്ട വിവരവും അദ്ദേഹം പങ്കുവെച്ചു. നരേന്ദ്ര മോദി സർക്കാരിന്റെ കാലത്ത് ലക്ഷക്കണക്കിന് കിലോഗ്രാം ലഹരിമരുന്നുകൾ പിടിച്ചെടുത്ത കണക്കുകൾ അദ്ദേഹം ചൂണ്ടിക്കാട്ടി. വരാനിരിക്കുന്ന നിയമസഭാ തെരഞ്ഞെടുപ്പിൽ ലഹരി നിർമാർജനം തന്നെയാകും ബി.ജെ.പിയുടെ പ്രധാന പ്രചാരണ വിഷയം. സംസ്ഥാനത്തിന്റെ സമഗ്ര വികസനത്തിനും സുരക്ഷയ്ക്കുമായി ജനങ്ങൾ മാറ്റത്തിനായി വോട്ട് ചെയ്യണമെന്ന് അദ്ദേഹം ആഹ്വാനം ചെയ്തു.
