മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഇൻഡി സഖ്യം സംഘടിപ്പിച്ച പ്രതിഷേധ മാർച്ചിന് പിന്തുണയുമായി ബിജു ജനതാ ദൾ (ബിജെഡി). പശ്ചിമ ബംഗാൾ മുഖ്യമന്ത്രിയും തൃണമൂൽ കോൺഗ്രസ് അധ്യക്ഷയുമായ മമത ബാനർജി ബിജെഡി അധ്യക്ഷൻ നവീൻ പട്നായിക്കുമായി നടത്തിയ വ്യക്തിപരമായ ചർച്ചകളെത്തുടർന്നാണ് പ്രതിഷേധത്തിൽ പങ്കെടുക്കാൻ ബിജെഡി തീരുമാനിച്ചത്. കേന്ദ്ര ഭരണപക്ഷത്തോടും പ്രതിപക്ഷത്തോടും സമദൂരം പാലിച്ചിരുന്ന ഒഡീഷയിലെ മുൻ ഭരണകക്ഷിയായ ബിജെഡി ഇതാദ്യമായാണ് ഇൻഡി മുന്നണിയുടെ പ്രതിഷേധ പരിപാടിയിൽ നേരിട്ട് പങ്കാളികളാകുന്നത്. ബിജെഡിയുടെ ഈ അപ്രതീക്ഷിത പിന്തുണ പ്രതിപക്ഷ ഐക്യത്തിന് വലിയ ഊർജ്ജം നൽകിയതായിമമത ബാനർജി വ്യക്തമാക്കി.
ഡൽഹിയിൽ നടന്ന പ്രതിഷേധ മാർച്ചിൽ ബിജെഡി പ്രതിനിധികളായി എംപിമാരായ മാനസ് മംഗരാജ്, സുലത ദേവ് എന്നിവരാണ് പങ്കെടുത്തത്. എന്നാൽ ഈ നീക്കം പ്രതിപക്ഷ സഖ്യത്തിലെ ഔദ്യോഗിക അംഗത്വമല്ലെന്നും ഉത്തരവാദിത്തമുള്ള ഒരു പ്രാദേശിക രാഷ്ട്രീയ പാർട്ടി എന്ന നിലയിലാണ് പ്രതിഷേധത്തിൽ പങ്കെടുത്തതെന്നും ബിജെഡി നേതാക്കൾ വ്യക്തമാക്കിയിട്ടുണ്ട്. എൻഡിഎ സർക്കാരിനോടും ‘ഇന്ത്യ’ മുന്നണിയോടും തങ്ങൾക്ക് തുല്യ അകലമാണുള്ളതെന്ന നിലപാടിൽ മാറ്റമില്ലെന്ന് പാർട്ടിയുടെ മുതിർന്ന നേതാക്കൾ മാധ്യമങ്ങളോട് പ്രതികരിച്ചു. തെരഞ്ഞെടുപ്പ് പ്രക്രിയയിലെ സുതാര്യത ഉറപ്പാക്കാനാണ് തങ്ങൾ ഈ വിഷയത്തിൽ സംയുക്തമായി പ്രതിഷേധിക്കാൻ തീരുമാനിച്ചതെന്നും അവർ കൂട്ടിച്ചേർത്തു.
ലോക്‌‌സഭാ പ്രതിപക്ഷ നേതാവ് രാഹുൽ ഗാന്ധി, കോൺഗ്രസ് നേതാവ് പ്രിയങ്ക ഗാന്ധി, മല്ലികാർജുൻ ഖാർഗെ, അഖിലേഷ് യാദവ് എന്നിവരുൾപ്പെടെയുള്ള പ്രമുഖ പ്രതിപക്ഷ നേതാക്കൾ പങ്കെടുത്ത പ്രതിഷേധ മാർച്ച് ഡൽഹി പോലീസ് തടഞ്ഞതിനെ തുടർന്ന് സംഘർഷഭരിതമായി. തെരഞ്ഞെടുപ്പ് കമ്മീഷൻ ഓഫീസിലേക്ക് നീങ്ങിയ നേതാക്കളെ വഴിമധ്യേ തടഞ്ഞതിനെ തുടർന്ന് ആകാശവാണി ഭവന് സമീപം നേതാക്കൾ ധർണയിരുന്നു. പിന്നീട് രാഹുൽ ഗാന്ധിയും പ്രിയങ്ക ഗാന്ധിയും ഉൾപ്പെടെ നിരവധി എംപിമാരെ പോലീസ് തടഞ്ഞുവെച്ച് കസ്റ്റഡിയിലെടുത്തു മാറ്റുകയായിരുന്നു. രാജ്യവ്യാപകമായി സമരം ശക്തമാക്കാനാണ് ഇൻഡി മുന്നണിയുടെ തീരുമാനം.
