വിവാദപരമായ സിഎംആർഎൽ – എക്സാലോജിക് സാമ്പത്തിക ഇടപാടിൽ (മാസപ്പടി കേസ്) മുൻ മുഖ്യമന്ത്രി പിണറായി വിജയനും മുൻ മന്ത്രി പി.എ. മുഹമ്മദ് റിയാസിനും വൻ തിരിച്ചടി. ഇരുവർക്കുമെതിരെ പ്രഥമദൃഷ്ട്യാ കേസെടുത്ത് എഫ്.ഐ.ആർ (FIR) രജിസ്റ്റർ ചെയ്ത് വിശദമായ അന്വേഷണം നടത്താൻ കേരള ഹൈക്കോടതി നിർണ്ണായക ഉത്തരവിട്ടു. വിജിൻസ് കോടതി കേസ് തള്ളിയതിനെ ചോദ്യം ചെയ്തും, നിഷ്പക്ഷ അന്വേഷണം ആവശ്യപ്പെട്ടും സമർപ്പിക്കപ്പെട്ട ഹർജികളിലാണ് ഹൈക്കോടതിയുടെ ഈ ചരിത്രപരമായ വിധി.
സ്വകാര്യ കരിമണൽ കമ്പനിയായ സിഎംആർഎല്ലിൽ നിന്ന് സർവീസുകളൊന്നും നൽകാതെ തന്നെ എക്സാലോജിക് കമ്പനിയും മുൻ മുഖ്യമന്ത്രിയുടെ കുടുംബാംഗങ്ങളും കോടിക്കണക്കിന് രൂപ കൈപ്പറ്റിയെന്ന ആദായനികുതി തർക്ക പരിഹാര ബോർഡിന്റെ കണ്ടെത്തലുകളാണ് മാസപ്പടി വിവാദത്തിന് വഴിവെച്ചത്. കേസിൽ ഉന്നതർക്ക് പങ്കുണ്ടെന്ന് ചൂണ്ടിക്കാണിച്ച് അന്ന് പ്രതിപക്ഷം അടക്കം ശക്തമായ രാഷ്ട്രീയ പ്രക്ഷോഭങ്ങൾ സംഘടിപ്പിച്ചിരുന്നു. കേസെടുക്കാതെയുള്ള അന്വേഷണത്തിനെതിരെ അഡ്വ. കെ.എം. ഷാജഹാൻ ഫയൽചെയ്ത ഹർജിയിൽ ജസ്റ്റിസ് എ. ബദറുദ്ദീനാണ് വിധി പറഞ്ഞത്
ഹൈക്കോടതി ഉത്തരവോടെ വിജിലൻസോ ഉത്തരവാദപ്പെട്ട അന്വേഷണ ഏജൻസികളോ വിഷയത്തിൽ അടിയന്തരമായി അന്വേഷണം നടത്തി റിപ്പോർട്ട് സമർപ്പിക്കേണ്ടിവരും. മുതിർന്ന നേതാക്കൾക്കെതിരെ തന്നെ എഫ്.ഐ.ആർ രജിസ്റ്റർ ചെയ്ത് അന്വേഷണത്തിന് ഹൈക്കോടതി ഉത്തരവിട്ടത് സംസ്ഥാന രാഷ്ട്രീയത്തിൽ വൻ കൊടുങ്കാറ്റിന് തിരികൊളുത്തിയിരിക്കുകയാണ്.
