സൗദി അറേബ്യയുടെ തലസ്ഥാനമായ റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിന് നേരെ ഉണ്ടായ മിസൈലാക്രമണങ്ങളെ അതിശക്തമായി അപലപിച്ച് ഭാരതം. കഴിഞ്ഞ ഒക്ടോബർ 10-ന് നടന്ന ഭീകരാക്രമണത്തിൽ 12 പേർ കൊല്ലപ്പെടുകയും മുന്നൂറിലധികം പേർക്ക് പരിക്കേൽക്കുകയും ചെയ്ത സംഭവത്തിൽ വിദേശകാര്യ മന്ത്രാലയം (MEA) കടുത്ത ആശങ്ക രേഖപ്പെടുത്തി. സിവിലിയൻമാർക്കും ജനവാസ കേന്ദ്രങ്ങൾക്കും പൗരന്മാരുടെ സുരക്ഷയ്ക്കും എതിരായ ഇത്തരം ആവർത്തിച്ചുള്ള ആക്രമണങ്ങൾ ഒരിക്കലും അംഗീകരിക്കാനാകില്ലെന്നും അവ ഉടനടി അവസാനിപ്പിക്കണമെന്നും ഇന്ത്യ വ്യക്തമാക്കി.
ഈ ആഴ്ച മാത്രം റിയാദ് വിമാനത്താവളത്തിന് നേരെ നടക്കുന്ന മൂന്നാമത്തെ ആക്രമണമാണിത്. ആഭ്യന്തര വിമാന സർവീസുകൾ കൈകാര്യം ചെയ്യുന്ന 3, 4 ടെർമിനലുകൾക്ക് നേരെയാണ് മിസൈൽ പതിച്ചത്. കഴിഞ്ഞ പത്ത വർഷത്തിനിടെ സൗദി മണ്ണിലുണ്ടായ ഏറ്റവും വലിയ രക്തച്ചൊരിച്ചിലാണിത്. ആക്രമണത്തിൽ കൊല്ലപ്പെട്ട 12 പേരിൽ 4 സൗദി പൗരന്മാരും, 2 ബംഗ്ലാദേശ് സ്വദേശികളും, അമേരിക്ക, ജോർദാൻ, ഫലസ്തീൻ, സിറിയ, സുഡാൻ, ഈജിപ്ത് എന്നിവിടങ്ങളിൽ നിന്നുള്ള ഓരോരുത്തരും ഉൾപ്പെടുന്നു. മുന്നറിയിപ്പുകളൊന്നുമില്ലാതെ ഉണ്ടായ ഈ അപ്രതീക്ഷിത ആക്രമണത്തെ തുടർന്ന് വിമാനത്താവളത്തിന്റെ പ്രവർത്തനം താത്കാലികമായി നിർത്തിവയ്ക്കുകയും വിമാനങ്ങൾ വഴിതിരിച്ചുവിടുകയും ചെയ്തു.
സൗദി അറേബ്യയുടെ പരമാധികാരത്തെയും സുരക്ഷയെയും പിന്തുണയ്ക്കുന്നതായി വ്യക്തമാക്കിയ ഇന്ത്യ, സൗദി ജനതയോടും സർക്കാരിനോടും പൂർണ്ണ ഐക്യദാർഢ്യം പ്രഖ്യാപിച്ചു. മേഖലയിൽ എത്രയും പെട്ടെന്ന് സമാധാനവും സാധാരണ നിലയും തിരിച്ചുവരുമെന്ന് പ്രതീക്ഷിക്കുന്നതായും വിദേശകാര്യ മന്ത്രാലയം കൂട്ടിച്ചേർത്തു. യെമനിലെ ഹൂതി വിമതർക്കെതിരെ സൗദി സഖ്യസേന നടത്തുന്ന സൈനിക നീക്കങ്ങളുടെ പശ്ചാത്തലത്തിലുണ്ടായ ഈ പുതിയ ആക്രമണം മിഡിൽ ഈസ്റ്റിൽ കടുത്ത സംഘർഷാവസ്ഥയാണ് സൃഷ്ടിച്ചിരിക്കുന്നത്. ആക്രമണത്തിന് ശക്തമായ തിരിച്ചടി നൽകുമെന്ന് സൗദി സഖ്യസേനയും വ്യക്തമാക്കിയിട്ടുണ്ട്.
